قاراعاندىدا قولا داۋىرىنەن ورتا عاسىرعا دەيىنگى 25 ەسكەرتكىش تابىلدى
استانا. KAZINFORM - مامىر ايىندا سارىارقا ارحەولوگيالىق ينستيتۋتىنىڭ عالىمدارى شەت اۋدانىندا ىزدەستىرۋ- بارلاۋ جۇمىستارىن جۇرگىزىپ، 25 جاڭا تاريحي-مادەني مۇرا ەسكەرتكىشىن تاپتى، دەپ حابارلايدى قاراعاندى وبلىسىنىڭ اكىمدىگى.
بۇل تاريحي ەسكەرتكىشتەردىڭ نەگىزگى بولىگى - ءارتۇرلى داۋىرگە جاتاتىن جەكە قورعاندار مەن تۇتاس قورىمدار. ازىرگە ەگجەي-تەگجەيلى زەرتتەۋسىز ولاردىڭ ناقتى جاسىن انىقتاۋ مۇمكىن ەمەس.
الايدا، وزىنە ءتان بەلگىلەرىنىڭ جيىنتىعى بويىنشا عالىمدار تابىلعان ەسكەرتكىشتەردىڭ ءۇش داۋىرگە - قولا داۋىرىنە، ەرتە تەمىر داۋىرىنە جانە ورتا عاسىرعا جاتاتىنىن انىقتاي الدى.
- بارلىق تابىلعان ەسكەرتكىشتەر تۋرالى ءبىز جەرگىلىكتى اتقارۋشى ورگاندارعا رەسمي تۇردە حابارلاۋىمىز كەرەك. ال ولار بۇل ورىنداردى كۇزەتكە الۋعا ءتيىس. تەك وسىدان كەيىن عانا ودان ءارى زەرتتەۋلەر، قازبالار جۇرگىزۋگە بولادى. بۇل پروتسەسس جىلدام جاسالاتىن دۇنيە ەمەس، ءبىراق ءبىز وسى قورىمداردا قازبا جۇمىستارىن جۇرگىزەمىز. جۇمىستار شەت اۋدانىنىڭ اۋماعىن عاسىرلار بۇرىن مەكەندەگەن ادامداردىڭ ءومىرىن تولىقتىرۋعا جانە جاقسى تۇسىنۋگە كومەكتەسەدى، - دەيدى سارىارقا ارحەولوگيالىق ينستيتۋتىنىڭ ديرەكتورى الەكسەي كۋكۋشكين.
ەكسپەديتسيا مۇشەلەرى سونداي-اق بۇرىن تابىلعان شۇناق پەتروگليفتەرىن زەرتتەدى. عالىمدار ءجيى كەزدەسەتىن سيۋجەتتەردى سيپاتتاپ، پەتروگليفتەردىڭ ەڭ قىزىقتى ۇزىندىلەرىن سۋرەتتەدى. ماماندار پەتروگليفتەردىڭ نەگىزگى بولىگى قولا داۋىرىنە جاتادى دەگەن قورىتىندىعا كەلدى. بۇعان سول كەزەڭنىڭ ءداستۇرلى سيۋجەتتىك قاتارى دالەل بولا الادى - تۇتاس، ادورانتتار، سوليارلىق بەلگىلەر، جابايى وگىزدەر، اربالار، ارشالى جىلقىلار، جۇلدىزدى اسپان.
بۇعان دەيىن حابارلانعانداي، الماتىدا مەملەكەت قورعاۋىنا الىنعان قانشا ەسكەرتكىش بار ەكەنى انىقتالدى.
