قاراعاندىدا كولىك كيىكتەردى قاعىپ كەتىپ، جولاۋشى زارداپ شەكتى

استانا. قازاقپارات - 17-مامىر ساعات 03:00 شاماسىندا قاراعاندى وبلىسى، وشاعان اۋىلىنىڭ ماڭىندا «استانا - قاراعاندى (اينالما) - الماتى» اۆتوجولىنىڭ 1395 شاقىرىمىندا جول اپاتى بولدى، دەپ حابارلايدى «قازاۆتوجول» ۇ ك.

- تەمىرتاۋ قالاسى باعىتىندا كەتىپ بارا جاتقان ۆاز ماركالى اۆتوكولىگى كيىكتەرمەن سوقتىعىسىپ، ونىڭ سالدارىنان جولاۋشى زارداپ شەگىپ، جەدەل كومەك كورسەتۋ ءۇشىن اۋداندىق اۋرۋحاناعا جەتكىزىلدى، - دەلىنگەن حابارلامادا.

كومپانيانىڭ باسپا ءسوز قىزمەتى ءمالىم ەتكەندەي، اپات بولعان ۋچاسكەدە جول ۋچاسكەسى قۇرعاق، تازا جانە تەگىس. قوزعالىسقا شەكتەۋ قويىلماعان جانە جول بەلگىلەرى نورماتيۆتىك تالاپتارعا ساي قويىلعان. اۆتوجولدىڭ بويىندا جانۋارلاردىڭ شىعىپ كەتپەۋى ءۇشىن تورلار ورناتىلعان.

- الدىن الا مالىمەتتەر بويىنشا كيىكتەردىڭ جاپپاي قوزعالۋىنا بايلانىستى تورلاردىڭ ءبىر بولىگى بۇزىلىپ، جابايى اڭداردىڭ جولعا شىعۋىنا سەبەپ بولدى. قازىر قالىپقا كەلتىرۋ جۇمىستارى جۇرگىزىلىپ، جولدىڭ باسقا دا ۋچاسكەلەرى تەكسەرىلدى. قاۋىپسىز قوزعالىستى قامتاماسىز ەتۋ ءۇشىن قابىلدانىپ جاتقان شارالارعا قاراماستان، جۇرگىزۋشىلەرگە قاراڭعى كەزدە مۇقيات بولىپ، جىلدامدىق رەجيمىن ساقتاۋ قاجەت. سونداي-اق، جولدىڭ ءجۇرىس بولىگىنە جاباي اڭداردىڭ جانە ءۇي جانۋارلارىنىڭ شىعىپ كەتۋ مۇمكىندىگىن ەسكەرۋ كەرەك، - دەپ ەسكەرتتى ۆەدومستۆو.

اۆتور

اينۇر تۋماكبايەۆا