قاراعاندى وبلىسىنىڭ 9 ەلدى مەكەنىندە برۋتسەللەز انىقتالدى
قاراعاندى. KAZINFORM - قاراعاندى وبلىسىندا بەس اۋداننىڭ 9 ەلدى مەكەنىندە برۋتسەللەز وشاقتارى تابىلدى. بۇل اۋىلداردا كارانتين ەنگىزىلدى، دەپ حابارلايدى kazinform اگەنتتىگىنىڭ ءتىلشىسى.
اۋدانداردىڭ باس مەملەكەتتىك ۆەتەريناريالىق- سانيتاريالىق ينسپەكتورلارىنىڭ ۇسىنىسى نەگىزىندە وشاقتار اۋماعىندا 23-مامىردان باستاپ برۋتسەللەز بويىنشا شەكتەۋ ءىس- شارالارى بەلگىلەندى.
«قاراعاندى وبلىسىنداعى 5 اۋداننىڭ 9 ەلدى مەكەنىندە: اباي اۋدانى، قۇرما ا/و؛ قارقارالى اۋدانى، م. مامىرايەۆ ا/و، تەمىرشى ا/و؛ نۇرا اۋدانى، تاسسۋات ا/و؛ كوكتىنكول ا/و؛ شەت اۋدانى، نۇراتالدى، شەت، بوساعاا ا/و؛ وساكاروۆ اۋدانى، باتپاق ا/و اۋرۋ جانۋارلار انىقتالدى. بارلىعى 18 باس ءىرى قارا. برۋتسەللەز بويىنشا شەكتەۋ ءىس- شارالارى بارلىق ءىرى قارا مال باسىنا قاتارىنان ەكى تەرىس پ ت ر ناتيجە العانعا دەيىن جانە جانۋارلاردىڭ باسقا تۇرلەرىندە تەرىس پتر ناتيجەلەر الىنعانعا دەيىن، سونداي- اق قورىتىندى دەزينفەكتسيا ساپاسىنىڭ ناتيجەلەرىنە سايكەس جۇرگىزىلەدى. دەرتكە شالدىققان مالدىڭ ەتى تۇتىنۋشىلارعا جەتپەيدى. بارلىعى باقىلاۋدا»، - دەدى ق ر ا ش م ۆەتەريناريالىق باقىلاۋ جانە قاداعالاۋ كوميتەتىنىڭ قاراعاندى وبلىستىق اۋماقتىق ينسپەكتسياسىنىڭ باسشىسى ەرجان بەكەتبايەۆ.
سونداي- اق، وبلىستىڭ باس ۆەتەرينارىنىڭ ايتۋىنشا، شەكتەۋلەر قويىلعان اۋماقتاردا ق ر ا ش م ۆ ب ق ك «رەسپۋبليكالىق ەپيزووتياعا قارسى جاساق» ر م م ماماندارى ساۋىقتىرۋ ءىس-شارالارىن جۇرگىزۋدە.
ۆەتەرينارلاردىڭ حابارلاۋىنشا، برۋتسەللەزدى جۇقتىرۋدىڭ سەبەبى اۋرۋدىڭ سوزىلمالى اعىمى، اۋرۋ مالداردى ۋاقتىلى وقشاۋلاماۋ، اۋرۋ مالدىڭ ءتولىن سانيتارلىق سويۋعا بەرمەۋ، جانۋارلاردى ۆەتەريناريالىق قىزمەتكە اكەلۋ نەمەسە ساتۋ كەزىندە جانۋارلاردىڭ يەلەرى دەرت جايلى ۋاقتىلى حاباردار ەتپەۋى، كوكتەمدە جانە كۇزدە جانۋارلاردى جايۋ جانە جايىلىم كەزىندە قورالاردا دەزينفەكتسيالىق جۇمىستاردى جۇرگىزبەۋ بولىپ تابىلادى. ادەتتە، جانۋارلارعا پروفيلاكتيكالىق ۆاكتسيناتسيا سالىنبايدى. سوندىقتان مالدى دەرتتەن ساقتاۋدىڭ جالعىز جولى - ەرەجەلەردى ساقتاۋ بولىپ تابىلادى.
