قاراعاندى وبلىسىنىڭ 40 قا جۋىق مەديتسينا قىزمەتكەرى الاياقتىق جاساعان
استانا. KAZINFORM - قاراعاندى وبلىسى بويىنشا مەديتسينالىق جانە فارماتسيەۆتيكالىق باقىلاۋ دەپارتامەنتى بىلىكتىلىك تەستىلەۋ ناتيجەلەرىن قولدان جاساۋدىڭ ءبىرقاتار فاكتىلەرىن انىقتادى. جالاقىعا ۇستەمەاقى الۋ ءۇشىن 30 دان استام مەدبيكە مەن 7 دارىگەر الاياقتىققا بارعان.

ىشكى تالداۋ بارىسىندا قاراعاندى وبلىسىنىڭ مەديتسينالىق جانە فارماتسيەۆتيكالىق باقىلاۋ دەپارتامەنتىنىڭ قىزمەتكەرلەرى دەرەكتەردىڭ بۇرمالانعانىن انىقتادى.
ۆەدومستۆونىڭ مالىمەتىنشە، تەست تاپسىرعانىن راستايتىن قۇجاتتى الۋ ءۇشىن دارىگەرلەر مەن مەدبيكەلەر 200 مىڭنان 300 مىڭ تەڭگەگە دەيىنگى سوما تولەگەن. «كومەكشىلەر» تەست تاپسىرعانداردىڭ جەكە كۋالىكتەرىنىڭ نومىرلەرىن دەرەكتەر بازاسىنا ەنگىزگەن. سودان كەيىن ولاردىڭ اتى- ءجونىن جانە باسقا دا مالىمەتتەرىن وزگەرتكەن.
الايدا ارنايى باعدارلاما ناتيجەلەردىڭ جالعان ەكەنىن كورسەتكەن. 39 قۇقىق بۇزۋشىنىڭ ەكەۋى ۇلىتاۋ وبلىسىنىڭ دەنساۋلىق ساقتاۋ جۇيەسىندە جۇمىس ىستەيدى. مەديتسينا قىزمەتكەرلەرىنە قاتىستى اكىمشىلىك ماتەريالدار تىركەلىپ، دارىگەرلەرگە ايىپپۇل سالىندى.
- بۇل ارەكەت جۇيەنى الداۋ بولىپ سانالادى. ءبىز بۇل سەرتيفيكاتتاردى رەسمي تۇردە توقتاتتىق. وسى ادامدارعا قاتىستى اكىمشىلىك قۇقىق بۇزۋشىلىق تۋرالى كودەكستىڭ 432-بابىنىڭ 1-بولىگى بويىنشا اكىمشىلىك شارالار قابىلداندى. بۇل تۇلعالار كىناسىن مويىنداپ، ايىپپۇل تولەدى.
قازىرگى ۋاقىتتا دەپارتامەنت قۇقىق قورعاۋ ورگاندارىنا الاياقتىق فاكتىسى بويىنشا ءىس قوزعاۋ ءۇشىن قۇجاتتار جيناقاتاپ جاتىر، - دەپ حابارلادى قاراعاندى وبلىسى بويىنشا مەديتسينالىق جانە فارماتسيەۆتيكالىق باقىلاۋ دەپارتامەنتىنىڭ باسشىسى ولگا سميرنوۆا.
ەسكە سالساق، دەنساۋلىق ساقتاۋ ءمينيسترى اقمارال ءالنازاروۆا وتكەن جىلدىڭ سوڭىندا مەديتسينالىق ۇيىمداردىڭ كرەديتورلىق بەرەشەگى % 44 عا، ال مەرزىمى وتكەن بەرەشەك %19 عا تومەندەگەنى جايلى ايتقان بولاتىن.