قاراعاندى وبلىسىنداعى تاسجولدا ءبىر مەزەتتە 19 كولىك سوقتىعىستى
استانا. KAZINFORM - قاراعاندى وبلىسىندا جاپپاي جول اپاتى بولدى. تاسجولدا ءبىر مەزەتتە 19 كولىك سوقتىعىستى، - دەپ حابارلايدى «قازاۆتوجول»- دىڭ باسپا ءسوز قىزمەتى.

23-قاڭتاردا ساعات 10:30 دان باستاپ ەكاتەرينبۋرگ - الماتى اۆتوجولىنىڭ قايتا قۇرۋ ۋچاسكەسىندە (قاراعاندى - بالقاش، 1492-1855-شاقىرىم) بالقاشتان قاراعاندى باعىتىندا كولىك قوزعالىسى اشىلدى.
مۇنداي شەشىم اۋا رايىنىڭ جاقسارۋىنا جانە كولىكتەردىڭ كەپتەلىسىنە بايلانىستى قابىلدانعان.
قوزعالىستى قاراعاندى وبلىسىنىڭ اكىمشىلىك پوليتسيا باسقارماسى مەن «قازاۆتوجول» قىزمەتكەرلەرى ۇيىمداستىردى.
«ساعات 12:30 دا وسى ۋچاسكەنىڭ 1630-شاقىرىمىندا 19 كولىك سوقتىعىسىپ، جاپپاي جول اپاتى بولدى. وقيعا ورنىندا توتەنشە جاعدايلار مينيسترلىگىنىڭ قىزمەتكەرلەرى جانە جەدەل جاردەم جۇمىس ىستەپ جاتىر»، - دەپ حابارلادى «قازاۆتوجول».
كومپانيانىڭ مالىمەتىنشە، جول اپاتى جىلدامدىق پەن قاۋىپسىز قاشىقتىقتى ساقتاماعاننان بولعان.
ەسكە سالايىق، 3-قاڭتاردا استانا - شۋچينسك تاسجولىندا 95 كولىك سوقتىعىسقان ەدى.