قاراعاندى وبلىسىندا ەكى قاباتتى ءۇي وپىرىلىپ، ادامدار ءۇيىندى استىندا قالىپ قويدى

قاراعاندى. KAZINFORM - قاراعاندى وبلىسى بۇقار جىراۋ اۋدانىندا جارىلىس بولىپ، وعان شىداماعان تۇرعىن ءۇي وپىرىلىپ قالدى. ءۇيىندى استىندا ءالى دە ادامدار بار.

30- قاڭتار تۇنگى 00.07 شاماسىندا بۇقار جىراۋ اۋدانى بوتاقارا كەنتى اۋەزوۆ كوشەسىندەگى قوسقاباتتى 12 پاتەرلى ۇيدە جارىلىس بولعانى حابارلانعان.

وبلىستىق توتەنشە جاعدايلار دەپارتامەنتىنىڭ باستىعى مۇرات قاتپانوۆ الدىن الا بولجام بويىنشا تۇرمىستىق گاز باللونى جارىلعان دەيدى.

كەيىننەن ەكىنشى قابات جارتىلاي وپىرىلعان.

ءورت شىقپاعان.

«وپىرىلعان اۋماق انىقتالىپ جاتىر. ءبىزدىڭ بولجام بويىنشا، ءۇيىندى استىندا ادامدار بار. جەرگىلىكتى جەردە شتاب ۇيىمداستىرىلعان. وقيعا ورنىندا 45 ادام جانە 13 تەحنيكا جۇمىس ىستەپ جاتىر»، - دەيدى مۇرات قاتپانوۆ.

قازىرگى ۋاقىتتا ءۇيىندى استىنان 6 ادام شىعارىلىپ، بوتاقارا كەنتىنىڭ ورتالىق اۋرۋحاناسىنا جەتكىزىلدى.

باسقا ادامداردى ىزدەۋ جۇمىسى جالعاسىپ جاتىر.