قاراعاندى وبلىسىندا جىلقىلار نەگە قىرىلىپ جاتىر
قاراعاندى. KAZINFORM - قاراعاندى وبلىسى بۇقار جىراۋ اۋدانىنىڭ ءۇش اۋىلىندا ەپيزووتيالىق ليمفانگيت تىركەلگەن. ەكى جىل ىشىندە 300 دەن استام جىلقى قىرىلعان.

قاراعاندى وبلىسى اۋماقتىق ينسپەكتسياسىنىڭ ماماندارى بۇقار جىراۋ اۋدانىنىڭ ءۇش اۋىلىندا ەپيدەميا تىركەلگەنىن رەسمي راستادى. جىلقىلار اراسىنداعى دەرتتى ەكى جىل بۇرىن ۇمىتكەر اۋىلدىق وكرۋگىنىڭ ماماندارى انىقتاعان. جۇقپالى مال اۋرۋى اۋداننىڭ تاعى ەكى اۋىلىندا تىركەلگەن.
«كارانتيندىك ايماقتا ۆەتەريناريالىق باقىلاۋ جانە قاداعالاۋ كوميتەتى ەپيزووتيكالىق اۋرۋلارعا قارسى رەسپۋبليكالىق جاساعىنىڭ ماماندارى جۇمىس ىستەۋدە. ولاردىڭ مىندەتى — بەس كۇندە ءبىر رەت ءىرى جىلقى ۇيىرلەرىن اينالىپ ءوتىپ، كلينيكالىق راستالعان اۋرۋى بار جانۋارلاردى وقشاۋلاۋ. ءار ون بەس كۇن سايىن ات قورالاردا دەزينفەكتسيا جاساۋ. ءبىز بۇل جۇمىستاردىڭ بارىسىن باقىلاپ وتىرمىز»، — دەپ ءتۇسىندىردى ق ر ا ش م ۆەتەرينارلىق باقىلاۋ جانە قاداعالاۋ كوميتەتىنىڭ اۋماقتىق ينسپەكتسياسى باسقارماسىنىڭ باسشىسى دارحان يمانبايەۆ.
جىلقى يەلەرى ايتارلىقتاي شىعىنعا ۇشىرادىق دەپ شاعىمدانۋدا. تورتكول اۋىلىنىڭ تۇرعىنى مادەنيەت جۇمادىلدانىڭ 20 باس مالى قىرىلىپ قالعان. سونىمەن قاتار، فەرمەر جىلقىلارىن ەمدەۋگە دە قىرۋار قاراجات جۇمساعانىن ايتادى.
«وتكەن جىلى 10 باس قىرىلدى. بيىل تاعى ون جىلقىمنان ايىرىلدىم. ءالى دە كەيبىر جىلقىلارىم اۋىرىپ جاتىر. ولاردى ەمدەۋ جانە ۇنەمى كۇتىم جاساۋ كەرەك. بۇل قانشاما شىعىن. ءبىراق باسقا امال جوق. ايتپەسە، بارلىق ۇيىرىمىزدەن ايىرىلىپ قالامىز»، — دەيدى مادەنيەت جۇمادىلدا.
افريكالىق جۇقپالى دەرت نەگىزىنەن تۇياقتى جانۋارلار اراسىندا تارايدى.
ساراپشىلاردىڭ پىكىرىنشە، اۋرۋدى جۇقتىرعان جىلقىلاردا جارا پايدا بولادى، سودان كەيىن ولار ىرىڭدەپ كەتەدى ەكەن.
تورتكول اۋىلىنىڭ تۇرعىندارى، ەگەر جاۋاپتى ورگاندار قىرىلعان مالدىڭ شىعىنىن وتەۋ پروتسەسىن جەدەلدەتپەسە، قۇزىرەتتى ورگاندارعا جۇگىنبەكشى.
ەسكە سالساق، جەلتوقسان ايىنىڭ سوڭىندا قاراعاندى وبلىسىندا جوعالىپ كەتكەن 47 باس جىلقى سۋدىڭ استىنان تابىلعان بولاتىن.