قارابالىق ءىنجۋى: قازاقستاندىق عالىمدار جوڭىشقانىڭ جاڭا ءتۇرىن ۇسىندى

قارابالىق اۋىلشارۋاشىلىق تاجىريبە ستانسياسىنىڭ سەلەكسيونەرلەرى «قارابالىق ءىنجۋى» اتتى جوڭىشقانىڭ جاڭا ءتۇرىن ۇسىندى.

كوپجىلدىق زەرتتەۋلەردىڭ ناتيجەسىندە شىعارىلعان گيبريدتى جاڭا سورتتىڭ ساپاسىن ماماندار جوعارى باعالادى.

الداعى ۋاقىتتا شارۋا قوجالىق يەلەرى جوڭىشقانىڭ جاڭا ءتۇرىن قولدانۋ ارقىلى اۋا رايىنىڭ قولايسىزدىعىنا قاراماي مول ءونىم الۋىنا مۇمكىندىك پايدا بولدى.

عالىمدار جوڭىشقانىڭ بۇل ءتۇرىن «سلاۆيان» جانە «قارابالىق 18» سورتتارىن بۋدانداستىرۋ ارقىلى شىعاردى. وسىمدىك ورتاشا ماۋسىمدىق ساناتقا جاتادى.

«گۇلدەنۋ باستالعانعا دەيىنگى ۆەگەتاتسيالىق كەزەڭ نەبارى 64 كۇندى قۇرايدى، ال تۇقىمنىڭ تولىق جەتىلۋىنە شامامەن 107 كۇن قاجەت. 1 گەكتار جەردەن 191 سەنتنەرگە دەيىن جاسىل ماسسا، 69 سەنتنەر ءشوپ جانە 2,3 سەنتنەر تۇقىم الۋعا بولادى. قارابالىق ءىنجۋى ايازعا جانە قۇرعاقشىلىققا بەيىمدەلگەن»، - دەيدى عالىمدار.

سونداي-اق، ءتۇرلى اۋرۋلارمەن زيانكەستكەرگە دە ءتوزىمدى. عىلىمي زەرتتەۋلەر كورسەتكەندەي جوڭىشقانىڭ بۇل ءتۇرى كوكتەم مەزگىلىندە ەرتە وسە باستايدى. وسىنىڭ ارقاسىندا شارۋا قوجالىقتار قازىردىڭ وزىندە ۇلكەن قىزىعۋشىلىق ءبىلدىرىپ وتىر.

اۆتور
اسحات رايقۇل