«قارا جاشىكتى» وقۋعا نەشە كۇن كەتەدى - اۆياتسيا ينجەنەرىنىڭ جاۋابى

استانا. KAZINFORM — قازاقستاننىڭ قۇرمەتتى اۆياتورى، اۆياتسيا ينجەنەرى ەرعازى جولداسوۆ اقتاۋدان 3 شاقىرىم جەردە قۇلاعان Embraer ۇشاعىنىڭ «قارا جاشىگىن» برازيليانىڭ CENIPA ورتالىعىنا تاپسىرۋ تۋرالى شەشىمىنە قاتىستى پىكىر ءبىلدىردى.

— «قارا جاشىكتى» وقۋ وتە ماڭىزدى. ويتكەنى، اپاتقا بايلانىستى كوپتى تولعاندىرعان بارلىق سۇراققا ناقتى جاۋاپتى سول جەردەن عانا تابۋعا بولادى. قارا جاشىكتىڭ ماڭىزى دا، ۇشاقتاعى قىزمەتى دە سول. ونى ناقتى پىسىقتاپ، كوميسسيا مۇشەلەرى بىرىگىپ اشىپ، تىڭداۋى كەرەك. «قارا جاشىكتى» اشقان كەزدە وسى اپاتقا قاتىسى بار ەلدەردىڭ ءبارىنىڭ وكىلدەرى، ICAO وكىلدەرى قاتىسقانى ءجون. «قارا جاشىك بۇزىلماسا، سىنباسا نەمەسە جارىلماسا اقپاراتىن وقۋ كوپكە سوزىلماۋى كەرەك، ءبىر ايدا شەشىلۋى مۇمكىن. ءبىراق قارا جاشىكتەن مالىمەت العان سوڭ ءبىر انگارعا ۇشاقتىڭ بولشەكتەرىن جيناستىرىپ، مودەلىن قايتا قۇراستىرادى. وسى جۇمىس ءبىراز ۋاقىت الۋى مۇمكىن. وسىدان كەيىن عانا قورىتىندى شىعارادى، — دەيدى اۆياتسيا ينجەنەرى.

سونداي-اق، ول جازبالاردى وقيتىن تاراپ رەتىندە برازيليانىڭ تاڭدالۋى اپاتقا قاتىسى بار ەلدەردىڭ ورتاق شەشىمى دەپ توپشىلايدى.

- بۇل سۇراققا مەن ەشقانداي ساياسي استاردى قاراستىرماي، اۆياتسيا ينجەنەرى رەتىندە عانا جاۋاپ بەرە الامىن. «قارا جاشىكتى» برازيليا ورتالىعىندا قاراستىرۋى كوميسسيا مۇشەلەرىنىڭ ورتاق شەشىمگە كەلگەنى بولۋى كەرەك. بۇل - قازاقستان تاراپىنان دۇرىس شەشىم دەپ ويلايمىن. ويتكەنى، ۇشاققا سىرتتان بولعان قاقتىعىس نۇسقاسىن قاراستىراتىن بولسا، برازيليا - ۇشاقتى قۇراستىرۋشى مەملەكەت. ءوزىم برازيلياداعى ورتالىقتىڭ تاجىريبەلى ەكەنىن بىلگەندىكتەن، ادىلەتتى زەرتتەۋ جۇرگىزەدى دەپ سەنەمىن. ولار ۇشاقتىڭ تولىعىمەن قالاي جۇمىس ىستەگەنىنە وبەكتيۆتى باعا بەرە الادى دەپ ويلايمىن. بۇرمالاپ باسقاشا شەشىم شىعارۋ وزدەرىنە كەرى اسەرىن تيگىزەدى. ويتكەنى، «قارا جاشىكتى» وقيتىن ينستيتۋت رەسەيدە دە بار، - دەيدى ەرعازى جولداسوۆ.

ەسكە سالا كەتەيىك، 25-جەلتوقساندا اقتاۋ ماڭىندا Azerbaijan Airlines ۇشاعى اپاتقا ۇشىرادى. ۇشاق بورتىندا 67 ادام، ونىڭ ىشىندە بەس ەكيپاج مۇشەسى بولعان. وقيعا سالدارىنان 38 جولاۋشى قازا تاپتى. وكىنىشكە قاراي، مەرت بولعان جانداردىڭ اراسىندا 6 قازاقستان ازاماتى بولعان.

ي ك ا و ۇسىنىمدارىن ەسكەرە جانە ازەربايجان مەن رەسەيدىڭ اۆياتسيالىق بيلىك وكىلدەرىمەن كەڭەسە وتىرىپ، ق ر كولىك ءمينيسترى مارات قارابايەۆ باسقاراتىن اۆياتسيالىق وقيعانى تەرگەۋ جونىندەگى كوميسسيا بورتتىق وزدىگىنەن جازعىشتاردى (قارا جاشىكتەردى) Embraer اۋە كەمەسىن شىعارۋشى برازيليانىڭ اۆياتسيالىق وقيعالاردى تەرگەۋ جانە الدىن الۋ ورتالىعىنا (CENIPA) جىبەرۋ تۋرالى شەشىم قابىلدادى.

بۇعان دەيىن حابارلاعانىمىزداي، بەلگىلى اسكەري ساراپشى امانگەلدى قۇرمەت ۇلى اقتاۋدان 3 شاقىرىم جەردە قۇلاعان Embraer ۇشاعىنىڭ «قارا جاشىگىن» برازيليانىڭ CENIPA ورتالىعىنا تاپسىرۋ تۋرالى شەشىمىنە قاتىستى پىكىر ءبىلدىردى.