قاقتىعىس ايماقتارىندا ايەلدەردىڭ ءرولى نەگە كۇشەيىپ كەلەدى؟
استانا. قازاقپارات - 17-21-تامىز ارالىعىندا قازاقستان قورعانىس مينيسترلىگىنىڭ بىتىمگەرلىك وپەراتسيالار ورتالىعىندا «ب ۇ ۇ بىتىمگەرلىك وپەراتسيالارىنداعى گەندەرلىك اسپەكتىلەر» اتتى حالىقارالىق كۋرس ءوتىپ جاتىر.
وعان قىتاي، پاكىستان، ارمەنيا، جاپونيا جانە فرانسيادان كەلگەن اسكەري قىزمەتكەرلەر مەن ماماندار قاتىسۋدا، دەپ حابارلايدى BAQ. KZ ءتىلشىسى.
بىتىمگەرشىلىك وپەراتسيالىق ورتالىعىنىڭ قىزمەتكەرى، كاپيتان ايتولقىن ابدىبەكتىڭ ايتۋىنشا، ءتۇرلى ەلدەردىڭ وكىلدەرى قاتىساتىن مۇنداي وقۋ باعدارلاماسى تاجىريبە الماسۋعا جانە قاقتىعىستاردى شەشۋدىڭ ءتيىمدى جولدارىن بىرلەسىپ تالقىلاۋعا مۇمكىندىك بەرەدى.
كۋرس اياسىندا گەندەرلىك ءتاسىلدىڭ بىتىمگەرلىك ميسسيالارداعى ماڭىزىنا ەرەكشە نازار اۋدارىلعان. ساراپشىلاردىڭ پىكىرىنشە، ەرلەردىڭ، ايەلدەردىڭ جانە بالالاردىڭ قاۋىپسىزدىككە قاتىستى قاجەتتىلىكتەرى ءارتۇرلى بولعاندىقتان، بۇل فاكتوردى ەسكەرمەۋ ميسسيانىڭ تيىمدىلىگىنە اسەر ەتۋى مۇمكىن.
- كەي جاعدايدا جەرگىلىكتى تۇرعىندارعا ايەل بىتىمگەرلەرمەن بايلانىس ورناتىپ، ماڭىزدى اقپاراتپەن ءبولىسۋ الدەقايدا جەڭىل بولادى. سوندىقتان ايەلدەردىڭ بىتىمگەرلىك ميسسيالارعا قاتىسۋى تەك تەڭدىك ماسەلەسى ەمەس، ميسسيانىڭ ناتيجەلىلىگىن ارتتىراتىن ماڭىزدى قۇرال، - دەدى كاپيتان ايتولقىن ابدىك.
ونىڭ سوزىنشە، كۋرس تەوريادان گورى پراكتيكالىق جۇمىسقا كوبىرەك باعىتتالعان. قاتىسۋشىلار ناقتى جاعدايلاردى تالداپ، حالىقارالىق تاجىريبەدە كەزدەسەتىن كەيستەر نەگىزىندە شەشىم قابىلداۋ داعدىلارىن جەتىلدىرەدى.
سونداي-اق كاپيتان مۇنداي باعدارلامالار بىتىمگەرلەردىڭ كاسىبي بىلىكتىلىگىن ارتتىرىپ قانا قويماي، قازاقستاننىڭ حالىقارالىق سەرىكتەستەرمەن ىنتىماقتاستىعىن نىعايتۋعا دا ىقپال ەتەتىنىن اتاپ ءوتتى.
