قاقاعان اياز: قۇتقارۋشىلار كۇرە جولداردا قالاي جۇمىس ىستەپ جاتىر

ەلىمىزدە جەلتوقساننىڭ باسىنان بەرى سارشۇناق اياز كۇشىنە ءمىنىپ تۇر. قۇتقارۋشىلار، كوممۋنالدىق قىزمەت ماماندارى تىنىمسىز جۇمىس ىستەپ جاتىر. وسى ورايدا Kazinform اگەنتتىگى سوڭعى جاعدايلارعا شولۋ جاساعان ەدى.

كەشە تۇندە كولىك مينيسترلىگى حابارلاعانداي ۆەدومستۆو جانىنداعى احۋال ورتالىعىندا جەدەل شتاب قۇرىلدى.

جول سالاسى ماماندارى تازالاۋ جۇمىستارىمەن اينالىسىپ جاتىر، الايدا جولدىڭ كورىنبەۋىنە بايلانىستى بۇل جۇمىس قيىنعا سوعۋدا.

جامبىل وبلىسىنان شىمكەنت قالاسىنا دەيىن كولىك قوزعالىسىنا شەكتەۋ قويىلدى. سونىڭ سالدارىنان كولىكتەر جينالىپ جاتىر.

جەرگىلىكتى ورگاندار توتەنشە جاعدايلار، جول پوليتسياسى جانە جول قىزمەتتەرىمەن بىرلەسىپ، جۇرگىزۋشىلەر مەن جولاۋشىلارعا ىستىق تاماق ۇيىمداستىردى.

تۇركىستان وبلىسىندا قار قۇرساۋىندا قالعان 1000 عا جۋىق جولاۋشى قۇتقارىلدى.

بوران مەن قاتتى ايازدان تۇركىستان وبلىسىنداعى 9 وبلىستىق، 1 رەسپۋبليكالىق ماڭىزى بار اۆتوموبيل جولى جابىلدى.

قۇتقارۋشىلار جولدا قالعان 1000 عا جۋىق ادامدى ەۆاكۋاتسيالاعان. جولاۋشىلار جىلۋ بەكەتتەرىنە ورنالاستىرىلىپ، ىستىق تاماقپەن قامتاماسىز ەتىلدى.

«رەسپۋبليكالىق ماڭىزى بار اۆتوجولدا 3 جىلىتۋ پۋنكتى دايىندالدى. قازىرگى تاڭدا دەپارتامەنتتە شتاب قۇرىلىپ جەدەل جەلى جۇمىس ىستەپ جاتىر»، - دەلىنگەن تۇركىستان وبلىسى ت ج د باسپا ءسوز قىزمەتى تاراتقان اقپاراتتا.

توتەنشە جاعداي ماماندارى ايازدى كۇندەردە قانداي قاۋىپسىزدىك ەرەجەسىن ساقتاۋعا شاقىرادى.

ايتا كەتسەك، ەلىمىزدىڭ بارلىق ايماعىندا اۋا رايى جاعدايى كۇردەلەنە ءتۇستى. مامانداردىڭ ايتۋىنشا، قاتتى ايازدا اسىرەسە جاس بالالار مەن قارت ادامدار ءۇشىن مۇقتاجدىق بولماسا كوشەدە ءجۇرۋدىڭ، الىس جولعا شىعۋدىڭ قاجەتى جوق.

ەل وڭىرلەرىندە ايازعا بايلانىستى 46 جول جابىلدى.

«كوكتايعاق پەن اۋا تەمپەراتۋراسىنىڭ تومەندەۋىنە بايلانىستى جەتى ايماقتا ديزەلمەن جۇرەتىن جەڭىل كولىكتەر مەن اۆتوبۋستاردىڭ قوزعالىسىنا شەكتەۋ قويىلدى»، - دەپ حابارلاعان ەدى «قازاۆتوجول» ۇلتتىق كومپانياسى.

قازاقستاننىڭ بىرنەشە وبلىسىندا داۋىلدى ەسكەرتۋ جاريالاندى.

جامبىل وبلىسىندا قار قۇرساۋىندا قالعان باقتاشىلار امان-ەسەن تابىلدى.

12-جەلتوقسان كۇنى ساعات 00:24 شاماسىندا پوليتسيا بولىمىنە شۋ اۋدانى كوكقاينار اۋىلىنان 15 شاقىرىم جەردە شارۋا قوجالىقتاردىڭ بىرىنەن 2 مالشىسى اداسىپ، جوعالىپ كەتكەن.

حابارلاما بويىنشا تەز ارادا پوليتسيا قىزمەتكەرلەرى، اۋدان اكىمدىگى، ت ج د قىزمەتكەرلەرى, جەرگىلىكتى تۇرعىندار، ارنايى جول تەحنيكاسى جۇمىلدىرىلىپ، جەدەل ىزدەستىرۋ جۇمىستارىن جۇرگىزدى.

قالىڭ قار باسقان جولدار «گرەيدەر» تەحنيكاسىمەن ارشىلدى.

شىعىس قازاقستاندا ايازعا بايلانىستى بىرنەشە جولدا كولىك قوزعالىسى شەكتەلدى.

12-جەلتوقسان ساعات 18.00-دەن باستاپ رەسپۋبليكالىق ماڭىزى بار تاسجولدىڭ 3 ۋچاسكەسىندە قوعامدىق كولىكتىڭ جانە ديزەلمەن جۇرەتىن اۆتوكولىكتەردىڭ قوزعالىسىنا تىيىم سالىندى.

توتەنشە جاعداي ماماندارى اقمولا وبلىسىندا جولدا قالعان 28 شەتەل ازاماتىن ەۆاكۋاتسيالادى.

اۋماقتىق ت ج د باسپا ءسوز قىزمەتىنىڭ مالىمەتىنشە، ەۆاكۋاتسيالانعان شەتەلدىكتەر كوكشەتاۋ قالاسىنىڭ جىلىتۋ ورنىنا جەتكىزىلگەن.

توتەنشە جاعدايلار مينيسترلىگى تۇرعىندارى مەن قوناقتارىنا توتەنشە جاعدايعا تاپ بولعان جاعدايدا 112 نومىرىنە حابارلاسۋدى سۇرايدى.

سونىمەن قاتار توتەنشە جاعدايلار مينيسترلىگى قاتتى اياز تەحنوگەندىك ءورتتىڭ كوبەيۋىنە ىقپال ەتۋى مۇمكىن ەكەنىن حابارلادى.

قاتتى اياز تەحنوگەندىك ورتتەردىڭ كوبەيۋىنە ىقپال ەتۋى مۇمكىن. وسىعان بايلانىستى قۇتقارۋشىلار جوعارى قۋاتتى ەلەكتر قۇرىلعىلارىن ءبىر ۋاقىتتا قوسۋ ارقىلى پەشتى قىزدىرماۋعا نەمەسە ەلەكتر جەلىلەرىن شامادان تىس جۇكتەمەۋگە كەڭەس بەرەدى.

اۆتوكولىك يەلەرىنە اشىق وتتىڭ كومەگىمەن اۆتوموبيلدەردى جىلىتۋ قاۋپى تۋرالى ەسكە سالدى.

13-جەلتوقساندا تۇركىستان وبلىسىنداعى رەسپۋبليكالىق ماڭىزى بار جولدا 300 دەن استام جۇك كولىگى قار قۇرساۋىندا قالدى.

وڭىردەگى رەسپۋبليكالىق ماڭىزى بار جولدا قار قۇرساۋىندا قالعان 61 جولاۋشى قاۋىپسىز جەرگە جەتكىزىلدى.

«بوران ءالى باسىلعان جوق. وڭىردەگى 9 وبلىستىق، 1 رەسپۋبليكالىق ماڭىزى بار اۆتوموبيل جولى جابىق. پوليتسيا جانە توتەنشە جاعداي دەپارتامەنتىنىڭ جانە جول قىزمەتتەرىنىڭ كۇش- قۇرالدارىمەن بىرگە جۇمىس ىستەپ جاتىرمىز. جولدا قالعان جولاۋشىلار قاۋىپسىز جەرگە جەتكىزىلۋدە. وبلىس تۇرعىندارىنا ۇزاق جولعا شىقپاۋ كەرەكتىگىن ەسكەرتەمىز»، - دەدى تۇركىستان وبلىسى ت ج د توتەنشە جاعدايلاردى جويۋ باسقارماسىنىڭ باستىعى تالعات دوساليەۆ.

 

اۆتور

داۋلەت ىزتىلەۋ