قۋانىشبەك ەسەكەيەۆ پرەزيدەنتكە اتقارعان جۇمىستارىنىڭ ناتيجەسى تۋرالى ەسەپ بەردى
استانا. KAZINFORM - مەملەكەت باسشىسى «قازاق تەلەكوم» اكسيونەرلىك قوعامىنىڭ باسقارما ءتوراعاسى قۋانىشبەك ەسەكەيەۆتى قابىلدادى - دەپ حابارلايدى اقوردانىڭ باسپا ءسوز قىزمەتى.
«قۋانىشبەك ەسەكەيەۆ «قازاق تەلەكوم» كومپانيالار توبىنىڭ بىلتىرعى اتقارعان جۇمىستارىنىڭ ناتيجەسى تۋرالى ەسەپ بەرىپ، الداعى كەزەڭگە ارنالعان جوسپارىن تانىستىردى. 2025-جىلدىڭ سوڭىنا قاراي 5G جەلىسىن جەدەل ەنگىزۋ جونىندەگى تاپسىرماسىنىڭ ورىندالۋ بارىسى تۋرالى ايتتى. قىزمەت ساپاسىن جاقسارتۋ جۇمىستارى جونىندە مالىمەت بەردى» - دەپ جازىلعان حابارلامادا.
ونىڭ ايتۋىنشا، بيىل كومپانيانىڭ 63 مىڭ ابونەنتىنىڭ ەسكىرگەن مىس جەلىسىن زاماناۋي وپتيكالىق جەلىگە اۋىستىرۋ جوسپارلانعان. سونداي-اق 50 مىڭ تۇتىنۋشى مودەمىنىڭ تەحنولوگيالىق جابدىقتارى جاڭارتىلادى.
«قازاق تەلەكوم» اكسيونەرلىك قوعامىنىڭ باسقارما ءتوراعاسى قۋانىشبەك ەسەكەيەۆ قازاقستان مەن ازەربايجان اراسىندا كاسپيي تەڭىزىنىڭ تابانى ارقىلى ترانس كاسپي تالشىقتى-وپتيكالىق بايلانىس جەلىسىن سالۋ جوباسىنىڭ ىسكە اسىرىلۋ بارىسىن تانىستىرىپ، بۇل جوبا قازاقستاننىڭ اسا ماڭىزدى وڭىرلىك تەلەكوممۋنيكاتسيالىق حابقا اينالۋىنا، ەل اۋماعىنان وتەتىن حالىقارالىق ترافيك ترانزيتىن ۇلعايتۋعا مۇمكىندىك بەرەتىنىن ايتتى.
قاسىم-جومارت توقايەۆ ەكونوميكالىق جانە الەۋمەتتىك سالالاردى سيفرلاندىرۋ وتە ماڭىزدى ەكەنىن اتاپ ءوتتى. سەبەبى قازىر جاڭا تەلەكوممۋنيكاتسيالىق تەحنولوگيالاردىڭ مۇمكىندىكتەرى ەلدىڭ حالىقارالىق ارەناداعى باسەكەگە قابىلەتتىلىك دەڭگەيىن ايقىندايدى.
مەملەكەت باسشىسى قازاقستان ازاماتتارىن زاماناۋي تەلەكوممۋنيكاتسيا قىزمەتتەرىمەن قامتاماسىز ەتۋ قاجەتتىگىنە دە نازار اۋدارىپ، كومپانيانىڭ بارلىق ينۆەستيتسيالىق جوباسىن ۋاقىتىلى ىسكە اسىرۋدى تاپسىردى.
