قانىش پايدالانعان ەر-توقىم
پاۆلودار. KAZINFORM - اكادەميك قانىش ساتبايەۆتىڭ باياناۋىلداعى مەموريالدىق مۋزەيىندە تاۋ تۇلعانىڭ ەر-توقىمى ساقتالىپ تۇر. بالا قانىش باياناۋىلدا شورمانوۆتار سالدىرعان مەكتەپكە تايىمەن بارىپ-كەلىپ جۇرگەندە وسى ەردى پايدالانعان ەكەن.
باياناۋىلداعى مۋزەيدە قاناعاڭنىڭ جەكە زاتتارى مەن ءومىر قاتپارلارىنان سىر شەرتەتىن فوتوجادىگەرلەر عالىمنىڭ قيلى تاعدىرىنان ءبىراز جايدى ۇقتىرعانداي. سونىڭ ىشىندە عۇلامانىڭ بالا شاعىندا پايدالانعان ەر-توقىمىنا كوزىمىز ءتۇستى. بۇل كونە جادىگەردى وسىدان 12 جىل بۇرىن مۇسا شورمان اۋىلىنىڭ (ساتبايەۆ تۋعان اۋىل) تۇرعىنى تاستەمىر شاشەنوۆ ەسىمدى ازامات تاپسىرىپتى. تايعا ەرتتەلەتىن، شاقتالعان ەر- توقىم اعاشتان شابىلعان، بىرنەشە بولىكتەن تۇرادى. الدىڭعى بولىگىندە تازا كۇمىستەن زەرلەنگەن جاپسىرماسى بار.
مۋزەيدىڭ بۇقارالىق جۇمىس جونىندەگى مامانى سانسىزباي ساپارعاليەۆتىڭ ايتۋىنشا، قانىش يمانتاي ۇلى قازىرگى مۇسا شورمان اۋلىنان 7-8 شاقىرىم جەردەگى ايرىق دەگەن جايلاۋدا دۇنيەگە كەلگەن. بۇل اۋىلدىڭ جانىندا، اشىسۋ وزەنىنىڭ ارعى بەتىندە كەزىندە شورمان اۋلەتىنىڭ قىستاۋى بولعان
«ەل اۋزىندا «ساكەن اعاي» اتانىپ كەتكەن ءسادۋاقاس شورمانوۆ اقكەلىن بولىسىندا مەكتەپ سالدىرعانى ءمالىم. مەكتەپ كەزىندە شورمانوۆتاردىڭ اعاش ۇيلەرى ورنالاسقان اۋماقتا، قازىرگى مۇسا شورمانوۆتىڭ كەسەنەسىنە جاقىن جەردە بولعان. سوندا بالا قانىش كۇن سايىن تايىنا ءمىنىپ، مەكتەپكە كەلەدى ەكەن. مەكتەپتىڭ ءوزى قاراعايدان قيىپ سالىنعان. الگى جەردە ودان بولەك، شورمان اۋلەتىنە تيەسىلى شامامەن 6 قىستاۋ- ءۇي بولعان. وكىنىشكە قاراي، 1928 -جىلى باياناۋىلدا كامپەسكە قىزىپ تۇرعان ۋاقىتتا بولشيەۆيكتەر قىستاۋ مەن ءبىلىم ۇياسىن تىپ- تيپىل ەتىپ بۇزىپ تاستايدى. ال بورەنەلەردىڭ بارلىعىن قاراعاندى وبلىسىنداعى سەمىزبۇعىعا تاسىپ جەتكىزىپ، جاتاقحانا تۇرعىزىپتى» ، - دەپ اڭگىمەلەدى س. ساپارعاليەۆ.
بۇگىندە شورمانوۆتاردىڭ قىستاۋى مەن مەكتەپ ورنى ماڭايى قورشالىپ، اسپان استى مۋزەيىنە اينالعان.
ەسكە سالا كەتەيىك، قانىش ساتبايەۆ پەن كەمەل اقىشيەۆتىڭ بىرگە تۇسكەن فوتوسۋرەتتەرى تابىلدى.
اۆتور
مۇرات اياعان
