قانتتى 3,6 ەسە، تۇزدى 5 ەسە ازايتادى: مەكتەپتە تاماقتانۋدىڭ جاڭا ستاندارتى ازىرلەندى

استانا. KAZINFORM - بيىل 1-قىركۇيەكتەن باستاپ مەكتەپتەردە دۇرىس تاماقتانۋ بويىنشا حالىقارالىق ۇسىنىمدارعا سايكەس ازىرلەنگەن تاماقتانۋدىڭ جاڭا ستاندارتى جانە پەرسپەكتيۆالىق ءمازىر قولدانىسقا ەنگىزىلەدى. تولىعىراق دەنساۋلىق ساقتاۋ ءمينيسترى اقمارال ءالنازاروۆا ايتىپ بەردى.

- ماڭعىستاۋ وبلىسىنداعى تاماقتان ۋلانۋ وقيعالارى ەرەكشە الاڭداۋشىلىق تۋدىردى. بۇل تاسىلدەردى رەفورمالاۋ قاجەتتىلىگىن كورسەتىپ وتىر. بالالار بولاتىن وبەكتىلەردەگى قاۋىپسىزدىك دەڭگەيىن ارتتىرۋ ماقساتىندا ءبىزدىڭ مينيسترلىك مەملەكەتتىك بيۋدجەتتەن قارجىلاناتىن بالالار وبەكتىلەرىن مەملەكەتتىك باقىلاۋدى كۇشەيتۋ جونىندەگى جاڭا تاسىلدەردى ازىرلەدى، - دەدى اقمارال ءالنازاروۆا ۇكىمەت وتىرىسىندا.

ەنگىزىلەتىن نەگىزگى تۇزەتۋلەر:

بالالار بولاتىن وبەكتىلەر ءۇشىن ەرەكشە مارتەبە بەرۋ؛
وبەكتىدەگى اعىمداعى جاعدايدى دۇرىس باعالاۋ ءۇشىن الداعى تەكسەرۋلەر تۋرالى الدىن الا حابارلامانى الىپ تاستاۋ؛
وبەكتىلەردى سانيتاريالىق- ەپيدەميولوگيالىق تالاپتارعا سايكەس كەلتىرۋ ماقساتىندا مونيتورينگتىك ساپارلار جۇيەسىن ەنگىزۋ.
- بيىل 1-قىركۇيەكتەن باستاپ ءبىلىم بەرۋ ۇيىمدارىندا دۇرىس تاماقتانۋ بويىنشا حالىقارالىق ۇسىنىمدارعا سايكەس ازىرلەنگەن تاماقتانۋدىڭ جاڭا ستاندارتى جانە كوپ نۇسقالى ۇلگىلىك پەرسپەكتيۆالىق ءمازىر قولدانىسقا ەنگىزىلەدى. تاماق تانۋدىڭ جاڭا ستاندارتى دۇرىس تاماقتانۋعا باعىتتالعان، اتاپ ايتقاندا سەمىزدىك، قانت ديابەتى، جۇرەك-قان تامىرلارى جانە باسقا اۋرۋلاردىڭ دامۋ قاۋپىن ازايتۋ ماقساتىندا قانتتى 3,6 ەسە تۇزدى 5 ەسە دەيىن ازايتۋدى كوزدەيدى. بۇل نورما ينفەكتسيالىق ەمەس اۋرۋلاردى، اتاپ ايتقاندا، بالالارداعى سەمىزدىكتى %15 عا دەيىن، قانت ديابەتىن %20 عا دەيىن، ارتەريالىق گيپەرتەنزيانى %18 عا دەيىن جانە باسقا دا سوزىلمالى اۋرۋلاردى %15 عا دەيىن ازايتۋعا ىقپال ەتەدى، - دەيدى ۆەدومستۆو باسشىسى.

ءمينيستردىڭ ايتۋىنشا، تاماقتانۋ ستاندارتىندا اس بلوكتارى جوق شاعىن جيناقتالعان مەكتەپتەر ءۇشىن ءمازىر كوزدەلگەن، العاش رەت مەكتەپ تاعامدارىنا قاناعاتتانۋ دەڭگەيىن باعالاۋعا مۇمكىندىك بەرەتىن جەۋگە جارامسىزدىق يندەكسى (تارەلكەدەگى تاماق قالدىقتارى) ۇعىمى ەنگىزىلدى.

- تاماق تانۋدىڭ جاڭا ستاندارتى ءبىلىم بەرۋ وبەكتىلەرى مەن مەكتەپكە دەيىنگى بالالار وبەكتىلەرىنە قولدانىلادى. تاماق تانۋ ستاندارتىن ەنگىزۋ ماقساتىندا قازىرگى ۋاقىتتا ءبىلىم جانە دەنساۋلىق ساقتاۋ باسقارمالارىنىڭ، مەكتەپ اكىمشىلىكتەرى مەن تاماق ءونىم بەرۋشىلەرىنىڭ قاتىسۋىمەن وقىتۋ سەمينارلارى وتكىزىلىپ جاتىر، - دەپ تولىقتىردى ا. ءالنازاروۆا.

بۇعان دەيىن مينيستر مەكتەپ اسحانالارىندا ءجيى بۇزىلاتىن زاڭ بۇزۋشىلىقتاردى اتادى.

اۆتور

داۋلەت ىزتىلەۋ