قانشا قانداس «اتا جولى» كارتاسىن الدى

استانا. قازاقپارات - Migration.enbek.kz پورتالى اياسىندا جوعارى بىلىكتى سۇرانىسقا يە شەتەلدىك مامانداردى تارتۋ ءۇشىن مودۋل جاسالىپ جاتىر. بۇل تۋرالى سەنات دەپۋتاتتارىنىڭ ساۋالىنا پرەمەر-ءمينيستردىڭ ورىنباسارى تامارا دۇيسەنوۆانىڭ جاۋابىندا ايتىلعان.

«مەملەكەت باسشىسىنىڭ تاپسىرماسى بويىنشا وتكەن جىلدان باستاپ ەتنيكالىق قازاقتار ءۇشىن «اتا جولى» كارتاسىن بەرۋ بويىنشا وتاندىق پلاتفورما ىسكە قوسىلدى. قازىرگى ۋاقىتتا بۇل جۇمىس قازاقستان رەسپۋبليكاسىنىڭ 44 شەتەلدىك مەكەمەسىمەن «قانداس» ا ا ج موبيلدى قوسىمشاسى ارقىلى اۆتوماتتاندىرىلعان رەجيمدە جۇرگىزىلەدى. 2024 -جىلدىڭ 20-ناۋرىزىندا 44 ەتنيكالىق قازاق (بارلىعى وتباسى مۇشەلەرىمەن 110 ادام) «اتا جولى» كارتاسىن الدى: 23 ادام (وتباسى مۇشەلەرىمەن 48) - سۇرانىسقا يە ماماندىقتار بويىنشا، 21 ادام (وتباسى مۇشەلەرىمەن 62) - بيزنەس-يمميگرانت رەتىندە»، - دەپ اتات وتەدى ۆيتسە-پرەمەر جاۋابىندا.

ونىڭ اتاپ وتۋىنشە، «سۇرانىسقا يە ماماندىقتار» بويىنشا كارتانى العانداردىڭ ساپالىق تالداۋىنا سايكەس، كارتانىڭ 23 يەگەرى اراسىندا ينجەنەر-فيزيك، ينجەنەر-ماتەماتيك، گاز-مۇناي قۇبىرلارىن جوبالاۋ جانە پايدالانۋ، كومپيۋتەرلىك باعدارلامالىق قامتاماسىز ەتۋ جانە ەسەپتەۋ تەحنيكاسى، حيميالىق تەحنولوگيالار، سۋ استى ينجينيرينگى، قولدانبالى ماتەماتيكا، ۇشاق قۇرىلىسى، كورپوراتيۆتىك قۇقىقتانۋ ماماندارى، سونداي-اق جاق-بەت حيرۋرگياسى دارىگەرلەرى، پەدياترلار جانە باسقا دا ماماندار بار. ال كارتانى بيزنەس-يمميگرانت رەتىندە العان 21 ادامنىڭ ىشىندە مەليوراتسيا، رەكۋلتيۆاتسيا جانە جەردى قورعاۋ، فيزيكا جانە ينفورماتيكا، اۋىل شارۋاشىلىعىن مەحانيكالاندىرۋ ماماندارى، دارىگەرلەر جانە شەتەلدە جۇمىس ىستەيتىن بيزنەسى بار كاسىپكەرلەر كەزدەسەدى.

«سونىمەن قاتار شەتەل ازاماتتارى ءۇشىن كوشى-قون سالاسىنداعى مەملەكەتتىك قىزمەتتەر تۋرالى تولىق جانە ەگجەي-تەگجەيلى اقپاراتتى قامتاماسىز ەتۋ ءۇشىن «migration.enbek.kz» پورتالى ازىرلەندى. پورتال اياسىندا جوعارى بىلىكتى سۇرانىسقا يە شەتەلدىك مامانداردى تارتۋ ءۇشىن مودۋل جاسالىپ جاتىر»، - دەدى تامارا دۇيسەنوۆا.

اۆتور
مارلان جيەمباي