قۋاندىق بيشىمبايەۆتىڭ ءىسى بويىنشا الدىن الا تىڭداۋ باستالدى

استانا. KAZINFORM - استانادا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ جانە وقيعا بولعان گاسترو-ورتالىقتىڭ ديرەكتورىنا قاتىستى ءىس بويىنشا الدىن الا تىڭداۋ باستالدى.

ءىس ەلوردانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قارالىپ جاتىر. سۋديا - ايجان قۇلبايەۆا.

ايتا كەتسەك، الدىن الا تىڭداۋعا 80 گە جۋىق ب ا ق وكىلى قاتىسىپ وتىر.

سوتتىڭ اقپاراتىندا ايتىلعانداي، كۇدىكتى قۋاندىق بيشىمبايەۆقا ق ر قىلمىستىق كودەكسىنىڭ 99-بابى 2-بولىگى 5-تارماعى بويىنشا ادام ءولتىرۋ، قاساقانا، اسا قاتىگەزدىكپەن ادام ءولتىرۋ، قىلمىستىق كودەكستىڭ 110-بابى 2-بولىگى 1-تارماعى بويىنشا ماتەريالدىق جاعىنان تاۋەلدى ادامدى جۇيەلى تۇردە ۇرىپ-سوعۋ نەمەسە وزگە دە زورلىق-زومبىلىق ارەكەتتەرى ارقىلى فيزيكالىق جانە پسيحيكالىق قيناۋ فاكتىسى بويىنشا ايىپ تاعىلىپ وتىر.

ال ەكىنشى كۇدىكتى باقىتجان بايجانوۆقا (وقيعا بولعان گاسترو- ورتالىقتىڭ ديرەكتورى - رەد.) قىلمىستىق كودەكستىڭ 432-بابى بويىنشا اسا اۋىر قىلمىستى جاسىرۋ جانە قىلمىستىق كودەكستىڭ 434-بابى بويىنشا اسا اۋىر قىلمىس جاساعانى تۋرالى حابارلاماۋ فاكتىسى بويىنشا ايىپ تاعىلعان.

ەسكە سالا كەتەيىك، 2023 -جىلى 9-قاراشادا استاناداعى «Bau» مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم جەتكەنشە كوز جۇمدى.

مۇنان سوڭ ىشكى ىستەر مينيسترلىگى قۋاندىق بيشىمبايەۆتىڭ ۇستالعانىن راستادى.

وتكەن جىلى 15-قاراشادا وتكەن كەڭەستە مەملەكەت باسشىسى قاسىم-جومارت توقايەۆ ىشكى ىستەر مينيسترىنە ق. بيشىمبايەۆتىڭ ءىسىن ەرەكشە باقىلاۋعا الۋدى تاپسىردى.

ايتا كەتسەك، بيىل 11-قاڭتاردا ەلوردا سوتى قۋاندىق بيشىمبايەۆتى كۇزەتپەن ۇستاۋ مەرزىمىن 2 ايعا ۇزارتقان ەدى.

بيىل 26-اقپاندا قۋاندىق بيشىمبايەۆتىڭ ءىسى سوتقا ءتۇستى.

داۋلەت ىزتىلەۋ