قۋاندىق بيشىمبايەۆتى اقتاۋعا تىرىسىپ جاتقاندارعا سوتتا باعا بەرىلەدى - اسەت شىنداليەۆ

استانا. KAZINFORM - باس پروكۋروردىڭ ورىنباسارى اسەت شىنداليەۆ ءىسى سوتقا تۇسكەن قۋاندىق بيشىمبايەۆتى اقتاۋعا تىرىسىپ جاتقاندارعا قاتىستى پىكىر ءبىلدىردى.

بۇگىن پارلامەنت ماجىلىسىندە تىلشىلەر باس پروكۋراتۋرا وكىلىنەن ءىستى بولعان ق. بيشىمبايەۆتى قورعاپ جاتقان بلوگەرلەردىڭ ارەكەتى قانشالىقتى زاڭدى ەكەنىن سۇرادى.

«بۇل ارەكەت تەرگەۋگە، ىسكە كەدەرگى سانالماي ما؟»، - دەپ سۇرادى تىلشىلەر.

ءوز كەزەگىندە ءا. شىنداليەۆ سوت وتىرىسىندا بۇل دەرەكتەرگە باعا بەرىلەتىنىن ايتتى.

باس پروكۋراتۋردىڭ ورىنباسارى بۇل قىلمىستىق ءىستىڭ قانشا تومنان تۇراتىنىن بىلمەيتىنىن مالىمدەدى.

«قانشا توم ەكەنىن بىلمەيمىن، بۇل ءىستى تىكەلەي قاداعالايتىن پروكۋرور بار»، - دەدى ول.

بۇدان بۇرىن حابارلانعانداي، ەكس-شەنەۋنىك قۋاندىق بيشىمبايەۆقا قاتىستى ءىس سوتتىڭ قاراۋىنا جىبەرىلدى.

سوتتىڭ اقپاراتىندا ايتىلعانداي، كۇدىكتى قۋاندىق بيشىمبايەۆقا ق ر قىلمىستىق كودەكستىڭ 99-بابى 2-بولىگىنىڭ 5) تارماعى بويىنشا ادام ءولتىرۋ، قاساقانا، اسا قاتىگەزدىكپەن ادام ءولتىرۋ، قىلمىستىق كودەكستىڭ 110-بابى 2-بولىگىنىڭ 1) تارماعى بويىنشا ماتەريالدىق جاعىنان تاۋەلدى ادامدى جۇيەلى تۇردە ۇرىپ-سوعۋ نەمەسە وزگە دە زورلىق-زومبىلىق ارەكەتتەرى ارقىلى فيزيكالىق جانە پسيحيكالىق قيناۋ فاكتىسى بويىنشا ايىپ تاعىلعان.

ەسكە سالا كەتەيىك، 2023-جىلى 9- قاراشادا استاناداعى باۋ مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى دەگەن كۇدىككە ءىلىندى. ايەل جەدەل جاردەم كەلگەنشە كوز جۇمدى.