قۋاندىق بيشىمبايەۆ ولگەن ايەلىمەن نەكەسىن تىركەمەگەن - پروكۋرور

استانا. KAZINFORM - بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ قايتىس بولعان سالتانات نۇكەنوۆامەن نەكەسىن رەسمي تىركەمەگەن. بۇل تۋرالى پروكۋرور ايجان ايماعانوۆا ءمالىم ەتتى.

«2022 -جىلعى 16-جەلتوقساندا قۋاندىق بيشىمبايەۆ پەن سالتانات نۇكەنوۆانىڭ تويى ءوتتى. ءبىراق، ولار نەكەسىن رەسمي تىركەمەگەن. ولار ازاماتتىق نەكەدە بولعان»، - دەدى ايجان ايماعانوۆا كۇدىكتىگە قاتىستى ايىپتاۋلاردى وقي وتىرىپ.

ودان بولەك، كۇدىكتى ازاماتتىق نەكەدەگى ايەلىنىڭ ۇيالى تەلەفونىن باقىلاپ، قوڭىراۋلار مەن حابارلامالاردى تەكسەرىپ وتىرعان. سونداي-اق، ايىپتاۋشىنىڭ ايتۋىنشا، كۇدىكتى س. نۇكەنوۆانى 2023 -جىلعى ناۋرىزدان باستاپ جۇيەلى تۇردە ۇرىپ سوققان. كۇدىكتى ق. بيشىمبايەۆ پەن س. نۇكەنوۆا اراسىنداعى ۇرىس-كەرىس مەيرامحاناعا بارماي تۇرىپ باستالعان.

بۇعان دەيىن حابارلاعانىمىزداي، بۇگىن استانادا قۋاندىق بيشىمبايەۆتىڭ ءىسى بويىنشا الدىن الا تىڭداۋ ءوتىپ جاتىر. وعان ق ر قىلمىستىق كودەكسىنىڭ 99-بابى 2-بولىگى 5-تارماعى بويىنشا ادام ءولتىرۋ، قاساقانا، اسا قاتىگەزدىكپەن ادام ءولتىرۋ، قىلمىستىق كودەكستىڭ 110-بابى 2-بولىگى 1-تارماعى بويىنشا ماتەريالدىق جاعىنان تاۋەلدى ادامدى جۇيەلى تۇردە ۇرىپ- سوعۋ نەمەسە وزگە دە زورلىق-زومبىلىق ارەكەتتەرى ارقىلى فيزيكالىق جانە پسيحيكالىق قيناۋ فاكتىسى بويىنشا ايىپ تاعىلىپ وتىر.

ءىس ەلوردانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قارالىپ جاتىر. سۋديا - ايجان قۇلبايەۆا.

ايتا كەتسەك، الدىن الا تىڭداۋعا 80 گە جۋىق ب ا ق وكىلى ونلاين قاتىسىپ وتىر.

ەسكە سالساق، 2023 -جىلى 9 - قاراشادا استاناداعى «Bau» مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم جەتكەنشە كوز جۇمدى.

مۇنان سوڭ ىشكى ىستەر مينيسترلىگى قۋاندىق بيشىمبايەۆتىڭ ۇستالعانىن راستادى.

وتكەن جىلى 15-قاراشادا وتكەن كەڭەستە مەملەكەت باسشىسى قاسىم-جومارت توقايەۆ ىشكى ىستەر مينيسترىنە ق. بيشىمبايەۆتىڭ ءىسىن ەرەكشە باقىلاۋعا الۋدى تاپسىردى.

ايتا كەتسەك، بيىل 11-قاڭتاردا ەلوردا سوتى قۋاندىق بيشىمبايەۆتى كۇزەتپەن ۇستاۋ مەرزىمىن 2 ايعا ۇزارتقان ەدى.

اۆتور

داۋلەت ىزتىلەۋ