قانداي ماماندارعا سۇرانىس ارتتى، ولاردىڭ جالاقىسى قانشا؟
استانا. قازاقپارات - 2024 -جىلعى شىلدەدە ەلەكتروندىق ەڭبەك بيرجاسىندا 104,4 مىڭ بوس جۇمىس ورنى جانە 132,4 مىڭ تۇيىندەمە ورنالاستىرىلدى، دەپ حابارلايدى BAQ. KZ.
وتكەن ايمەن سالىستىرعاندا بوس ورىندار سانى 11 پايىزعا (10 مىڭ بىرلىككە)، ال وزەكتى تۇيىندەمەلەر سانى 49 پايىزعا (43,6 مىڭ بىرلىككە) ءوستى. بۇل رەتتە ورتا بىلىكتى قىزمەتكەرلەرگە سۇرانىس ارتتى.
ءبىلىم بەرۋ، دەنساۋلىق ساقتاۋ جانە باسقا دا قىزمەت تۇرلەرى سالاسىنداعى كاسىپورىندار باسىم بەلسەندىلىك كورسەتتى، ولار بارلىق بوس جۇمىس ورىندارىنىڭ جارتىسىنان كوبىن، ياعني - 51,9 مىڭ بوس جۇمىس ورنىن ورنالاستىرعان
سۇرانىس پەن ۇسىنىس قۇرىلىمىندا ءارتۇرلى بىلىكتىلىكتەگى قىزمەتكەرلەر اراسىندا تەپە- تەڭدىك بايقالعانىنا قاراماستان، وتكەن ايمەن سالىستىرعاندا ورتاشا بىلىكتى جۇمىسكەرلەرگە سۇرانىس 14 پايىزعا (6,1 مىڭ بوس ورىنعا) ءوستى. سونىمەن بىرگە ۇسىنىستىڭ ەڭ ۇلكەن ءوسىمىن بىلىكتىلىگى جوعارى ىزدەنۋشىلەر كورسەتتى، ولاردىڭ تۇيىندەمەلەرىنىڭ سانى 41 پايىزعا (18,8 مىڭ تۇيىندەمەگە) ءوستى.
وڭىرلەر بولىنىسىندە جۇمىس بەرۋشىلەردىڭ بەلسەندىلىك ديناميكاسىندا ارتۇرلىلىك بايقالادى. ءتورت وڭىردە سۇرانىستىڭ تومەندەۋى تىركەلدى: جامبىل وبلىسىندا - 43 پايىزعا (2,9 مىڭ بوس ورىن)، الماتى وبلىسىندا - 27 پايىزعا (1,6 مىڭ بوس ورىن)، ماڭعىستاۋ وبلىسىندا - 1 پايىزعا (20 بوس ورىن)، سونداي-اق شىمكەنت قالاسىندا - 9 پايىزعا (331 بوس ورىن). بۇل رەتتە سۇرانىستىڭ ءوسۋى بويىنشا قاراعاندى وبلىسى (19 پايىز نەمەسە 1,9 مىڭ بوس جۇمىس ورنى)، الماتى قالاسى (15 پايىز نەمەسە 1,5 مىڭ) جانە پاۆلودار وبلىسى (14 پايىز نەمەسە 1,4 مىڭ بوس جۇمىس ورنى) كوش باستادى، - دەلىنگەن حابارلامادا.
سۇرانىسقا قاراعاندا بارلىق اۋماقتا ءوتىنىش بەرۋشىلەردىڭ ۇسىنىسى ارتتى. ەڭ ۇلكەن بەلسەندىلىك شىمكەنت قالاسىندا (+167 پايىز نەمەسە 9,4 مىڭ تۇيىندەمە)، قىزىلوردا وبلىسىندا (+87 پايىز نەمەسە 4,3 مىڭ تۇيىندەمە) جانە باتىس قازاقستان وبلىسىندا (+66 پايىز نەمەسە 2,5 مىڭ تۇيىندەمە) بايقالادى.
وقۋ كەزەڭىنىڭ باستالۋىنا بايلانىستى ءبىلىم بەرۋ جانە تاربيە سالاسى بويىنشا جۇمىس ىزدەۋشىلەر بەلسەندىلىگىنىڭ ايتارلىقتاي ءوسۋى بايقالادى - ۇسىنىس وتكەن ايمەن سالىستىرعاندا ەكى ەسە (+10,9 مىڭ تۇيىندەمە) كوبەيگەن. ەڭ كوپ تۇيىندەمە استانا (2,5 مىڭ تۇيىندەمە)، الماتى (2,4 مىڭ تۇيىندەمە) قالالارىندا، سونداي-اق تۇركىستان وبلىسىندا (1,8 مىڭ تۇيىندەمە) ورنالاستىرىلدى.
شىلدە ايىندا جۇمىس بەرۋشىلەر اراسىندا اۆتوكولىك جۇرگىزۋشىلەرى (2,3 مىڭ تۇيىندەمەمەن 2 مىڭ بوس جۇمىس ورنى)، تاربيەشىلەر (2,1 مىڭ تۇيىندەمەمەن 1,9 مىڭ بوس جۇمىس ورنى) جانە مەدبيكەلەر (2 مىڭ تۇيىندەمەمەن 1,6 مىڭ بوس جۇمىس ورنى) ەڭ كوپ سۇرانىسقا يە بولدى. بۇل رەتتە كەلەسى ماماندىقتارعا سۇرانىس ەداۋىر ءوستى: تىگىنشىلەر (+0,6 مىڭ بوس جۇمىس ورنى)، ماتەماتيكا مۇعالىمدەرى (+320 بوس جۇمىس ورنى) جانە تاربيەشىنىڭ كومەكشىلەرى (+300 بوس جۇمىس ورنى).
شىلدە ايىندا جۇمىس بەرۋشىلەر ەڭ جوعارى جالاقىنى باس قۇرىلىسشىلارعا ورتاشا ەسەپپەن ايىنا 731 مىڭ تەڭگەدەن باستاپ جانە باس اگرونومدار (~576 مىڭ تەڭگە) مەن اكتۋاريلەرگە (532 مىڭ تەڭگەدەن باستاپ) ۇسىندى. بۇل رەتتە ءوز تۇيىندەمەلەرىندە جۇمىس ىزدەۋشىلەردىڭ جوعارى جالاقىنى كۇتۋى كەمە كاپيتانى (ورتا ەسەپپەن 1,7 ميلليون تەڭگەدەن باستاپ)، م ر ت دارىگەرى (~1 ميلليون تەڭگە) جانە كوممەرتسيالىق كاسىپورىنداردىڭ IT- بولىمشەلەرىنىڭ باسشىلارى (~992 مىڭ تەڭگە) سىندى ماماندىقتاردا كورىنىس تاپتى.
وسىلايشا، 2024 -جىلدىڭ شىلدەسىندە ەلەكتروندىق ەڭبەك بيرجاسىندا جۇمىس بەرۋشىلەردىڭ دە، جۇمىس ىزدەۋشىلەردىڭ دە بەلسەندىلىگى ايتارلىقتاي ءوسۋى بايقالدى، اسىرەسە ول ءبىلىم بەرۋ جانە دەنساۋلىق ساقتاۋ سالالارىندا ايقىن كورىندى. ورتا بىلىكتى قىزمەتكەرلەرگە سۇرانىستىڭ ارتۋى جانە جوعارى بىلىكتى ماماندار تاراپىنان ۇسىنىستاردىڭ ءوسۋى ەڭبەك نارىعىنداعى وزگەرمەلى قاجەتتىلىكتەردى كورسەتەدى.
