قانداي پاتەر ساتىپ الۋ قاۋىپتى

استانا. KAZINFORM - پاتەر قاراعاندا نەگە ءمان بەرۋ كەرەك جانە قانداي پاتەردەن مۇلدە باس تارتقان ءجون؟ Krisha.kz پاتەر الاتىن كەزدە كۇمان تۋدىراتىن 7 بەلگىگە كوڭىل اۋدارۋعا كەڭەس بەرەدى، دەپ حابارلايدى El.kz اقپارات اگەنتتىگى.

1. قۇجاتتاعى مالىمەتتىڭ سايكەس بولماۋى

تۇرعىن ءۇي نارىعىندا قاتە جازىلعان قۇجاتتار كەزدەسەدى. ونى زاڭگەر كومەگىنسىز انىقتاي الاسىز.

جىلجىمايتىن مۇلىكتىڭ بۇكىل قۇجاتى مەن يەسىنىڭ جەكە كۋالىگىن مۇقيات وقىپ شىعىڭىز، ءۇي يەسىنەن تەك ءتۇپنۇسقاسىن سۇراڭىز، ودان بولەك مۇلىككە قاتىستى تىركەلگەن قۇقىقتار (اۋىرتپالىق) تۋرالى انىقتاما تالاپ ەتىڭىز. بارلىق دەرەكتى اسىقپاي سالىستىرۋ كەرەك.

قۇجاتتا قاتە بولسا، نوتاريۋستىڭ مامىلە جاساۋعا قۇقىعى جوق.

ەش جەرىندە تۇزەتۋ ءىزى بولماۋى دا اسا ماڭىزدى.

2. سالىنىپ جاتقان كەشەندەگى پاتەرلەر

مۇنداعى باستى قاۋىپ - قىزمەتىن ادال اتقارمايتىن كومپانياعا تاپ بولۋ. نارىقتا رۇقساتسىز عيمارات سالىپ، پاتەر ساتاتىندار كوپ. ىرگەتاسى زاڭسىز قالانعان ءۇي ءسۇرىلۋى نە مۇلدە قۇرىلىسى توقتاپ قالۋى مۇمكىن. ال ۇلەسكەر دالادا قالادى.

ەگەر قۇرىلىس سالۋشى ۇلەستىك قاتىسۋ كەلىسىمشارتىنىڭ ورنىنا باسقا (برونداۋ شارتى، الدىن الا كەلىسىم) قۇجات راسىمدەۋدى ۇسىنسا، ءبىر شيكىلىك شىعۋى عاجاپ ەمەس. كومپانيانىڭ قۇجاتى دۇرىس بولماي، زاڭسىز نىسان ساۋدالاۋى مۇمكىن.

جالعىز دۇرىس نۇسقا - ۇلەستىك قاتىسۋ كەلىسىمشارتى ارقىلى پاتەر الۋ.

اقشا سالار الدىندا:

- كومپانيانىڭ ۇلەسكەر تارتۋعا قۇجاتى بار ما، سونى انىقتاپ الىڭىز. قاجەت مالىمەتتى تۇرعىن ءۇي پورتالىنان تاباسىز؛

- ساۋلەت ورگاندارىنا حابارلاسىپ، كەشەن زاڭدى سالىنىپ جاتقانىنا كوز جەتكىزىڭىز؛

- قۇرىلىس سالۋشىنىڭ بارلىق قۇجاتىن تەكسەرىڭىز.

3. سەنىمحات بويىنشا ساتۋ

پاتەردى يەسى ەمەس، ونىڭ وكىلى ساتقان جاعدايدا بىرنەشە تاۋەكەلگە بەل بۋاسىز. سەنىمحات جالعان، مەرزىمى وتكەن نە كۇشى جويىلعان (ءۇي يەسى ونىڭ كۇشىن كەز كەلگەن ۋاقىتتا جويا الادى) بولۋى مۇمكىن. وندا پاتەردەن ايىرىلىپ قالۋ قاۋپى جوعارى.

مامىلە جاساعاندا ءۇي يەسى ءوزى كەلۋىن تالاپ ەتىڭىز. ول مۇمكىن بولماسا، ءۇي يەسىنە حابارلاسىپ، سەنىمحاتتىڭ راسىمەن زاڭدى كۇشى بار ەكەنىن جانە مامىلە جاساۋعا كەلىسەتىنىن راستايتىن ۆيدەو جازىپ الىڭىز. تاجىريبەلى زاڭگەر كومەگىنە جۇگىنىپ، قۇجاتتارىن تەكسەرتىپ العان دا ارتىق ەتپەيدى.

4. جوسپارى وزگەرگەن پاتەر

پاتەردى قاراعان كەزدە تەحپاسپورتتاعى جوسپارىنا ەرەكشە ءمان بەرىڭىز. قانداي دا ءبىر ايىرماشىلىق (ەسىگى باسقا جەردە، بالكونى بىرىككەن، اراقابىرعانى الىپ تاستاعان) بايقاساڭىز، ءۇي يەسى ونى زاڭسىز جاساعانى انىق.

دەمەك، پاتەردى يپوتەكاعا الا المايسىز جانە كەيىن ساتا المايسىز. زاڭسىز جوسپارى اۋىسقان پاتەر ءۇشىن جاڭا يەسى جاۋاپ بەرەتىنىن ەسكەرسەك، ايىپپۇلدى دا ءسىزدىڭ موينىڭىزعا ءىلىپ قويادى.

5. تەحنيكالىق قاباتتاعى پاتەر

مانساردا نە جەرتولەدە ورنالاسقان پاتەر مۇلدە پاتەر ەمەس، تەحنيكالىق ورىنجاي (قويما، قىزمەتتىك بولمە) بولىپ شىقسا تاڭعالماڭىز. ونى حابارلاندىرۋ قاراپ وتىرعاندا سۋرەتىنەن-اق تانۋعا مۇمكىندىك بار. ويتكەنى تەرەزەسى باسقاشا نە مۇلدە جوق بولادى، توبەسىندە ءبىرتۇرلى جاشىك نە قۇبىرلار تۇرادى.

قۇجاتتا تەحنيكالىق ورىنجاي دەپ جازىلسا، مامىلە جاساۋدان باس تارتىڭىز. زاڭ بويىنشا ول ورتاق مەنشىك سانالادى جانە ءۇي تۇرعىندارى كەز كەلگەن ۋاقىتتا سوت ارقىلى تارتىپ الۋعا قۇقىلى.

6. مۇراعا قالعان پاتەر

ساتۋشى پاتەردى مۇرا رەتىندە السا دا ساقتىق تانىتقان ابزال. ءسىز ساتىپ العان سوڭ ەسەپكە ىلىنبەي قالعان مۇراگەرلەرى پايدا بولۋى مۇمكىن. سودان مۇلىككە تىيىم سالىپ، سوت پروتسەسى باستالادى.

نە ىستەۋ كەرەك؟ بىرىنشىدەن، نوتاريۋسقا بارىڭىز، ول e-notary ءبىرىڭعاي بازاسى ارقىلى مۇراگەرلىككە قاتىستى مالىمەتتى تەكسەرەدى.

ەكىنشىدەن، سوت كابينەتىنە كىرىپ، ساتۋشىنىڭ اتى-ءجونىن تەرىڭىز. كابينەتتەن سوتپەن بايلانىستى داۋ بولدى ما، ول نەمەن اياقتالدى، ءبارىن كورۋگە بولادى.

ۇشىنشىدەن، مۇلىك قاشان مۇراگەردىڭ قولىنا وتكەنىن ءبىلىڭىز. مەرزىمى نەعۇرلىم ۇزاق بولسا، باسقا مۇراگەر كەلەدى دەگەن قاۋىپ تە ازايا تۇسەدى.

7. ءبىرتۇرلى ساتۋشى

پاتەر يەسى قارت كىسى بولسا، مامىلە ونىڭ ەركىنەن تىس جاسالايىن دەپ جاتۋى مۇمكىن.

سول سەبەپتى پسيحيكالىق ساۋلىق ورتالىعىنان انىقتاما الۋىن سۇراعان دۇرىس.

جالپى ءۇي يەسىنىڭ وعاش قىلىعىن (مىسالى، ماس بولسا) بايقاساڭىز، انىقتاما پايداڭىزعا جارايدى.

تاعى قانداي جاعدايدا كۇماندانعان دۇرىس؟

ساتۋشى قۇجاتتىڭ ءتۇپنۇسقاسىن بەرۋدەن باس تارتىپ، تەك كوشىرمەسىن ۇسىنسا؛

اۋىرتپالىقتار تۋرالى ونلاين-انىقتاما العىسى كەلمەسە؛

نوتاريۋسسىز مامىلە جاساۋدى تالاپ ەتسە؛

كەلىسىمشارتقا پاتەر باعاسىن ءوزى ايتقاننان تومەن ەتىپ جازۋدى سۇراسا.