قانداسىمىز دۋبايدا وتكەن حالىقارالىق فەستيۆالدەن جۇلدەلى ورالدى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
توقايەۆ سۋ تاسقىنى جايلى مالىمدەمە جاسادى - TRT
قازاقستان پرەزيدەنتى قاسىم-جومارت توقايەۆ بيلىككە سۋ تاسقىنىنان كەيىن جاڭا تۇرعىن ءۇي سالۋعا، وتەماقى تولەۋگە جانە ينفراقۇرىلىمدى جوندەۋگە بەس اي ۋاقىت بار ەكەنىن ايتتى.
بۇل تۋرالى اپتا سوڭىندا تۇركيا راديو تەلەۆيزيا پورتالى دا حابارلادى.
«توقايەۆ قازاقستان حالقى اسسامبلەياسىنا سويلەگەن سوزىندە ء«بىزدىڭ اپاتتى ورتاق جەڭۋىمىز كوپكە سوزىلمايدى. سۋدىڭ كوپ بولىگى تارتىلعان سوڭ، بۇزىلعان اۋماقتاردى قالپىنا كەلتىرۋ جۇمىستارى باستالادى. ەڭ الدىمەن، ازاماتتارىمىزدىڭ شىعىنى وتەلەدى، تۇرعىن ءۇي قۇرىلىسى باستالادى، پاتەرلەر بولىنەدى، قيراعان ينفراقۇرىلىمدار جوندەلەدى. ءبىز وسى جان-جاقتى زەرتتەۋلەرگە قىسقا ۋاقىت بولدىك. بىرگە قول جەتكىزە الاتىنىمىزعا سەنىمدىمىن» دەدى»، - دەپ جازدى تۇركيالىق باسىلىم.
«TRT» باسىلىمى توقايەۆتىڭ مالىمەتىنە سۇيەنە وتىرىپ، باستالاتىن كەشەندى قۇرىلىس جۇمىستارى ازاماتتار ءۇشىن جاڭا مۇمكىندىكتەر تۋدىراتىنىن، سونىمەن قاتار ازاماتتار ەكونوميكالىق الەۋەتى جوعارى جانە ەكولوگيالىق جاعدايى جاقسى ەلدى مەكەندەرگە كوشە الاتىنىن دا تىلگە تيەك ەتكەن.
قانداسىمىز دۋبايدا وتكەن حالىقارالىق فەستيۆالدەن جۇلدەلى ورالدى - «Janadauir»
جاقىندا بايان-ولگي ايماعىنداعى قۇرمانحان ءمۇقامادي ۇلى اتىنداعى مۋزىكالى دراما تەاترىنىڭ ءبيشىسى لاۋرا نابيكارىم قىزى «DUBAI GRANT FESTIVAL» حالىقارالىق سايىسىنا قاتىسىپ، كيىم جانە ميميكا تۇرىنەن جۇلدەگەر اتاندى. وسىنداي ەرەكشە نوميناتسيانى جەڭىپ الۋ ءۇشىن لاۋرا ەكى جىلداي دايىندىق جاساعان، دەپ حابارلايدى «جاڭا ءداۋىر» باسىلىمى.
موڭعوليالىق ب ا ق- تىڭ دەرەگىنشە، تەاتر ءبيشىسى لاۋرا قازاقستان رەسپۋبليكاسى، اباي اتىنداعى پەداگوگيكالىق ۋنيۆەسيتەتىنىڭ «مۋزىكالىق ءبىلىم جانە حورەوگرافيا» كافەدراسىنان بيشىلىك ماماندىعى بويىنشا وقىپ بىتىرگەن ەكەن. لاۋرا نابيكارىم قىزى ەتيكا مەن ەستەتيكاسى ۇيلەسكەن قازاق ءبيىن ساحنالاۋ ارقىلى دۋباي قالاسىندا كورەرمەندەردىڭ ىستىق ىقىلاسى مەن قازىلار القاسىنىڭ جوعارى باعاسىن العان. بۇل سايىسقا قاتىسۋ ءۇشىن الدىمەن دۋبايعا ءوتىنىش جولداپ، ونىمەن قوسا ءبيدىڭ ۆيدەوسىن جۇكتەگەن. كونكۋرستى ۇيىمداستىرۋ كوميسسياسىنىڭ وڭ باعاسىن العان بيشىلەر دۋبايعا شاقىرتۋ الىپ، سايىسقا قاتىسقان.
موڭعوليالىق ب ا ق- تىڭ مالىمەتىنشە، اتالعان حالىقارالىق سايىسقا 18 ەلدىڭ كىل مىقتى بيشىلەرى قاتىسقان. ءار ەلدىڭ ءبيى ءارقالاي. ءبىر-بىرىنەن الاتىن دۇنيەلەرى دە كوپ. بۇل جولعى ءبي نەگىزىنەن ءار حالىقتىڭ ۇلتتىق ەرەكشەلىگىن كورسەتەدى. قازاق حالقىنىڭ ءبيى وتە نازىك. فەستيۆالدە لاۋرانىڭ كوستيۋمى بيلەگەن كەزدە كيگەن كويلەگى ەرەكشە باعا العان.
سونداي-اق ول اتالمىش سايىسقا قاتىسىپ عانا قويماي ءوزىنىڭ كىشكەنتاي شاكىرتتەرىن قازاق ەلىنىڭ الماتى قالاسىندا وتكەن «ZHULDIZ ART KAZAKHSTAN» بايقاۋىنا قاتىستىرىپ، توپ بيمەن ءبىرىنشى ورىن، جەكە بيمەن گران پري جەڭىپ الىپ، ىستىق كول، تاشكەنت، ستامبۋل قالالارىنا جولداما العان.
قازىرگى ۋاقىتتا لاۋرا جەتەكشىلىك ەتەتىن «Kids Balet» ۇيىرمەسى كلاسسيكالىق ءبي، بالەت تۇرلەرى بويىنشا بۇلدىرشىندەرگە بيدەن ماعلۇمات بەرىپ باۋلۋدا.
«ءبي دەگەنىمىز - اسا جوعارى قۇندىلىعى بار ونەر. ونىڭ ادام دەنساۋلىعى مەن سۇلۋلىعىنا، ادامنىڭ كوڭىل كۇيىنە اسەر وتە جاقسى. قازىرگى تاڭدا اتا- انالاردىڭ كوپشىلىگى ءبيدىڭ ماڭىزدىلىعىنا، بالالارىنىڭ ساۋ بولىپ وسۋىنە قاتتى كوڭىل ءبولىپ، بي ۇيىرمەلەرىنە كوپتەپ بەرىپ جاتىر. لاۋرا ءبيشىمىز شاكىرت قابىلداپ، ءبي ۇيرەتۋگە ءارقاشان ءازىرمىن دەيدى. قازىردىڭ وزىندە لاۋرانىڭ ءبي ۇيىرمەسىنە تىزىمدەلىپ جاتقان بۇلدىرشىندەر كوپ»، - دەپ تۇيىندەيدى «جاڭا ءداۋىر» باسىلىمى.
«قورعاس» حالىقارالىق شەكارا ىنتىماقتاستىعى ورتالىعىنا ميلليوننان استام ادام كەلگەن - «حالىق گازەتى»
ءساۋىر ايىنان باستاپ، اۋا رايىنىڭ قولايلىلىعىنا وراي، شىڭجاڭداعى ىلە قازاق اۆتونوميالىق وبلىسى قورعاس قالاسىنداعى قىتاي-قازاقستان «قورعاس» حالىقارالىق شەكارا ىنتىماقتاستىعى ورتالىعىندا شەكارا تۋريستەرىنىڭ، ترانسشەكارالىق جانە ساۋدا تۋريستەرىنىڭ ەڭ جوعارى اعىنى باستالدى، دەپ حابارلايدى قىتايدىڭ «حالىق گازەتى».
«قورعاس» حالىقارالىق شەكارا ىنتىماقتاستىعى ورتالىعىنا ميلليوننان استام ادام كەلگەن - «حالىق گازەتى»
اتالعان باسىلىمنىڭ دەرەگىنشە، قورعاستىڭ كىرىپ-شىعۋ شەكارا بەكەتىنىڭ ستاتيستيكاسىنا سايكەس، ءساۋىر ايىنان باستاپ قىتاي-قازاقستان «قورعاس» حالىقارالىق شەكارا ىنتىماقتاستىعى ورتالىعى كۇن سايىن 12000 نان استام ادامدى قابىلدايدى. ەڭ جوعارى كورسەتكىش ءبىر كۇندە 19000 نان اسقان. 19-ساۋىردەگى جاعداي بويىنشا 2024-جىلى ورتالىققا 1,34 ميلليوننان استام ادام كىرىپ-شىققان.
قازاقستان ۇ ۋ وقىتۋشىلارى مەن ستۋدەنتتەرى ۇلتتىق كىتاپحانادا وتكەن شاراعا قاتىستى - Parstoday
23-ساۋىردە قازاقستان رەسپۋبليكاسىنىڭ ۇلتتىق كىتاپحاناسىندا الەمنىڭ جۇزدەن استام ەلىندە ميلليونداعان ادام اتاپ وتەتىن دۇنيەجۇزىلىك كىتاپ جانە اۆتورلىق قۇقىق كۇنىنە ارنالعان جىل سايىنعى «كىتاپشوۋ-2024» كىتاپ فەستيۆالى ءوتتى.
فەستيۆالدىڭ ماقساتى - وقۋ بەلسەندىلىگىن ارتتىرۋ، كىتاپ وقۋدى قولداۋ، كوركەم ادەبيەتكە دەگەن قىزىعۋشىلىقتى وياتۋ، جەكە تۇلعانىڭ اقپاراتتىق ساۋاتتىلىعىن جانە وقۋ مادەنيەتىن قالىپتاستىرۋ.
بۇل تۋرالى وسى اپتادا يراننىڭ «Parstoday» اقپارات اگەنتتىگى دە حابارلادى.
اتالعان باسىلىمنىڭ كەلتىرگەن مالىمەتىنە سۇيەنسەك، كىتاپحانانىڭ ونەر زالىندا الماتىداعى يران يسلام رەسپۋبليكاسىنىڭ باس كونسۋلدىعى جانە يران مادەني ورتالىعىمەن بىرلەسىپ وتكىزگەن «قازاقستان - يران: «ناۋرىزناما - مادەنيەتتەر ۇندەستىگى» اتتى ادەبي-تاقىرىپتىق كەش وتكەن. تاياۋ شىعىس جانە وڭتۇستىك ازيا كافەدراسى مەڭگەرۋشىسى د. م. كوكەيەۆا جانە يرانتانۋ ءبولىمىنىڭ وقىتۋشىلارى مەن ستۋدەنتتەرى وسى اتالعان شاراعا قاتىسقان.
«Parstoday» - ءدىڭ دەرەگىنشە، بۇل شارا يران يسلام رەسپۋبليكاسىنىڭ الماتىداعى باس كونسۋلى موحسەن فاعاني مىرزا قۇتتىقتاۋ سوزىمەن اشىلعان. شارادا الماتىداعى يراننىڭ باس كونسۋلدىعى جانىنداعى يران مادەني ورتالىعىنىڭ ديرەكتورى حوسەين اعازادە، م. اۋەزوۆ اتىنداعى ادەبيەت جانە ونەر ينستيتۋتى ديرەكتورىنىڭ ورىنباسارى ت. ە. قىدىر، يرانتانۋ ءبولىمىنىڭ مەڭگەرۋشىسى ا. بورانبايەۆا، يرانتانۋ ءبولىمىنىڭ اعا وقىتۋشىسى، ف. ع. ك. ع. قامباربەكوۆا ءسوز سويلەدى.
قازاقستان ەلشىلىگى وزبەكستان ۇكىمەتىنە العىسىن ءبىلدىردى - « ءو ز ا»
23-ءساۋىر كۇنى وزبەكستان مەن قازاقستان پرەزيدەنتى تەلەفون ارقىلى سويلەسىپ، وندا وزبەكستان باسشىسى شاۆكات ميرزيەيەۆ قازاقستان باسشىسى قاسىم-جومارت توقايەۆقا ەلدەگى بولىپ جاتقان قيىن جاعدايعا وراي كوڭىل ايتىپ، ەكى ەل اراسىنداعى تاتۋ كورشىلىك، ستراتەگيالىق سەرىكتەستىك جانە وداقتاستىق قارىم-قاتىناستاردى ودان ءارى كەڭەيتۋدىڭ وزەكتى ماسەلەلەرىن تالقىلاعان ەدى.
قازاقستان ەلشىلىگى وزبەكستان ۇكىمەتىنە العىسىن ءبىلدىردى - «ءو ز ا»
بۇل تۋرالى وسى اپتادا وزبەكستاندىق ء«وزا» اقپاراتتىق اگەنتتىگى حابارلادى. اتالعان ب ا ق- تىڭ دەرەگىنشە، ءوز كەزەگىندە قازاقستاننىڭ تاشكەنتتەگى ەلشىلىگى وزبەكستان حالقى مەن باسشىلىعىنا العىس بىلدىرگەن مالىمدەمە جاسادى.
«ەلشىلىك قازاقستان پرەزيدەنتى قاسىم-جومارت توقايەۆتىڭ العىس سوزدەرىنە قوسىلا تۇرىپ، وزبەكستان پرەزيدەنتىنىڭ اكىمشىلىگى مەن ۇكىمەتىنە وداقتاس رەتىندە كورسەتكەن قولداۋى ءۇشىن جانە وزبەك حالقىنىڭ جان دۇنيەسىنىڭ كەڭدىگى ءۇشىن العىسىن بىلدىرەدى»، - دەلىنگەن حابارلامادا.
ەسكە سالا كەتەيىك، وزبەكستان پرەزيدەنتىنىڭ تاپسىرماسىنا سايكەس ەل ۇكىمەتى قازاقستانداعى سۋ تاسقىنىنان زارداپ شەككەن حالىققا گۋمانيتارلىق كومەك جونەلتكەن ەدى. سونداي- اق وسى اپتادا «ءو ز ا» - دا «وزبەكستاننىڭ تۇراقتى تۇرعىندارىنىڭ سانى 37 ميلليونعا جەتتى» دەگەن تاقىرىپتاعى اقپارات جاريالاندى.
وزبەكستاندىق باسىلىمنىڭ كەلتىرگەن دەرەگىنە سۇيەنسەك، 2024-جىل 22-ءساۋىر ساعات 03:24 جاعداي بويىنشا رەسپۋبليكانىڭ تۇراقتى تۇرعىندارىنىڭ سانى 37 ميلليون ادامدى قۇراعان. ستاتيستيكا اگەنتتىگىنىڭ مالىمەتىنشە، ەرلەر سانى - 18,5 ميلليون، ايەلدەر سانى - 18,3 ميلليون.
«2024-جىل 1-ساۋىردەگى جاعداي بويىنشا رەسپۋبليكانىڭ تۇراقتى تۇرعىندارىنىڭ سانى 36963262 ادامدى قۇراعان ەدى. ايتا كەتەر تاعى ءبىر جايت، 1-قاڭتارداعى جاعداي بويىنشا وزبەكستاندا 1 شارشى شاقىرىم جەرگە تۇراقتى تۇرعىنداردىڭ ورتاشا سانى 82 كىسىگە سايكەس كەلەدى»، - دەپ جازادى «ء وز ا».
اۆتوربەيسەن سۇلتان
