«قانداستارعا ۆيزانى ساتىپ جاتىر»: جەلىنى شۋلاتقان اقپاراتقا قىتايداعى كونسۋلدىق جاۋابى

قىتايداعى قانداستاردىڭ كوشىنە ۇرىمجىدەگى ديپلوماتتار كەدەرگى كەلتىرىپ وتىرعانى جانە ۆيزالار ساتىلىپ جاتقانى تۋرالى اقپاراتقا قازاقستاننىڭ ق ح ر- داعى ەلشىلىگىنىڭ كونسۋلدىعى تۇسىنىك بەردى، دەپ حابارلايدى قازاقپارات.

«ءتۇرلى تاريحي سەبەپتەرگە بايلانىستى اتاجۇرتتان جىراققا اۋىپ كەتكەن قانداستاردىڭ جاي-كۇيى قاي كەزەڭدە بولسا دا قازاق حالقىن بەي جاي قالدىرعان ەمەس. سوڭعى ۋاقىتتا قىتايدىڭ سولتۇستىگىندەگى شىڭجاڭ جەرىن قونىس ەتكەن قانداستاردىڭ ەلگە كەلۋى، قازاقستان ۆيزاسىن الۋى قىپ-قىزىل اقشاعا اينالعانى تۋرالى جالعان مالىمەتتەر قوعامدا جەلدەي ەسىپ ءجۇر»، - دەلىنگەن كونسۋلدىق حابارلاماسىندا.

مالىمەتكە سۇيەنسەك، قازىر قازاقستان ازاماتتارى دا، قىتاي ازاماتى بولىپ تابىلاتىن قانداستارىمىز دا ماسەلەنىڭ بايىبىنا بارماستان ق ر سىرتقى ىستەر مينيسترلىگىنىڭ پاسپورتتىق-ۆيزالىق قىزمەتىنىڭ قىزمەتكەرلەرىن پاراقور نەمەسە قانداسىنا جانى اشىمايتىن تاسجۇرەك رەتىندە كورسەتىپ وتىر.

«ماسەلەنىڭ باستاۋى تىم تەرەڭدە جانە كۇردەلى ەكەندىگىن الەۋمەتتىك جەلى ارقىلى اقپارات تاراتۋمەن عانا ماشىقتانعان كوپ ازامات پەن بەلسەندى بىلە بەرمەيدى. الدىمەن، ۇرىمجىدەگى سىرتقى ىستەر مينيسترلىگىنىڭ پاسپورتتىق-ۆيزالىق قىزمەتى رەسمي ديپلوماتيالىق مەكەمە بولىپ تابىلمايدى جانە قىزمەتكەرلەرى وزگە ديپلوماتتار سەكىلدى حالىقارالىق قۇقىق نورمالارىمەن قورعالماعان. سەبەبى ەكى ەل اراسىندا قول جەتكىزىلگەن ۋاعدالاستىققا سايكەس ۆيزالىق قىزمەت «قازاقستان تەمىر جولى» اكسيونەرلىك قوعامىنا قاراستى پاسپورتتىق پۋنكت بولىپ تابىلادى. قازىرگى ۋاقىتتا سول جارتىلاي رەسمي مەكەمەدە ق ر سىرتقى ىستەر مينيسترلىگى ۇزاق مەرزىمدى ساپارعا جىبەرگەن 3 قىزمەتكەر وتباسىن ەلگە تاستاپ قانداستاردىڭ سۇرانىسىن قامتاماسىز ەتۋ ءۇشىن توقتاۋسىز ەڭبەك ەتۋدە. سەبەبى، شىڭجاڭدا تۇراتىن 1,5 ميلليون قانداستىڭ كەم دەگەندە 30 پايىزى قازاقستان ۆيزاسىن الۋعا نيەت بىلدىرگەن. ول دەگەنىڭىز ورتا ەسەپپەن - 300 مىڭ ادام. بۇل - تىم كوپ ءوتىنىش»، - دەلىنگەن مەكەمە اقپاراتىندا.

ۆيزا بەرۋ تالابىنا سايكەس قانداستاردان قۇجاتتار سول پاسپورتتىق پۋنكتتە قابىلدانادى. الايدا، ونىڭ جۇمىس كەستەسىنە اسەر ەتەتىن جاعدايلار بار.

«قىتايدا اقپاراتتىق تەحنولوگياعا قويىلاتىن قاتاڭ تالاپتارعا بايلانىستى ۆيزالىق قولداۋ جاسايتىن جانە ۆيزانى باسىپ شىعاراتىن باعدارلاما ايىنا كەم دەگەندە 2-3 كۇن جۇمىس ىستەمەيدى جانە قىزمەت كورسەتۋ ساپاسىن قامتاماسىز ەتۋ ماقساتىندا ءار اپتانىڭ سارسەنبىسىندە قازاقستاننىڭ بۇكىل الەمدەگى كونسۋلدىق مەكەمەلەرى ۆيزاعا قۇجات قابىلداۋدى جۇزەگە اسىرمايدى. زاڭ تالابى سولاي.

اتالعان سەبەپتەرگە بايلانىستى پاسپورتتىق قىزمەت ءار كۇن سايىن كەزەك تارتىبىمەن 150 پاسپورت قابىلدايدى. ونىڭ سىرتىندا كوشى-قون شاقىرۋى بار جانە قىتايدان كوشۋگە رەسمي رۇقسات العان قانداستار كەزەك تارتىبىنەن تىس ۆيزاعا قۇجات تاپسىرا الادى.

وسى تۇستا قانداستاردىڭ كوشىنە سول ۇرىمجىدەگى ديپلوماتتار كەدەرگى كەلتىرىپ وتىر دەگەن اقپارات شىندىققا مۇلدە ساي كەلمەيدى. سەبەبى جىل باسىنان 500 قانداسقا كەزەكسىز كوشۋگە جاعداي جاسالدى. بۇلاردان وزگە قازاقستانداعى جاقىن تۋىسى قايتىس بولعان نەمەسە اۋىر حالدە جاتقاندىعىن راستايتىن انىقتاما ۇسىنعان قانداستاردان ۆيزاعا قۇجاتتار ونىڭ كەزەكتە بار-جوعىنا قاراماستان قابىلدانادى. اتالعانداردى قورىتىندالايتىن بولساق، اپتاسىنا كەم دەگەندە 750-800 پاسپورت قابىلدانىپ جاتىر. ءبىر جىلدا 200 كۇن ۆيزاعا قۇجات قابىلداعان جاعدايدا 160000 پاسپورت قانا بەرۋ مۇمكىن بولادى. ەندەشە، قازىرگى ۋاقىتتا قانداستاردىڭ سۇرانىسىن تولىق كولەمدە قاناعاتتاندىرىپ، ولارعا ۆيزانى بەرۋ مۇمكىن ەمەس»، - دەپ تولىقتىرادى كونسۋلدىقتان.

انىقتالعانداي، ماسەلەنىڭ ۋشىعۋىنا WeChat الەۋمەتتىك جەلىسى ارقىلى جاسالعان مالىمدەمە. وندا ۆيزاعا كەزەككە تۇرۋ باعدارلاماسىندا ورىندار ساتىلىپ جاتقانى تۋرالى ايتىلعان. دەگەنمەن، بۇل باعدارلامانىڭ رەسمي ورگاندارعا قاتىسى جوق بولىپ شىقتى.

«قىتايدا تانىمال بولىپ ەسەپتەلەتىن WeChat الەۋمەتتىك جەلىسى ارقىلى تارالعان «كەزەك كىشى باعدارلاماسىنداعى ورىندار ساتىلادى» دەگەن اقپاراتقا كەلەتىن بولساق. اتالعان باعدارلامانى سول ۇرىمجىدەگى بەلسەندى قانداستار ازىرلەگەن جانە ول ۆيزالىق قىزمەتكە مۇلدەم قاتىستى ەمەس. ول كەزەكسىز قابىلداۋ ءتارتىپتىڭ مۇلدەم بولماۋىنا جانە ۆيزالىق قىزمەت جۇمىسىنىڭ توقتاپ قالۋىنا الىپ كەلۋى ىقتيمال. سەبەبى ۆيزا الۋعا نيەتتى 10000 قانداس كەلەتىن بولسا ول جەردە قاۋىپسىزدىكتى قامتاماسىز ەتۋ مۇمكىن بولمايدى.

وسىعان وراي، كۇدىكتى تولىق سەيىلتۋ ماقساتىندا جاقىن ارادا ەلەكتروندى كەزەك جۇيەسى سىرتقى ىستەر مينيسترلىگى ارقىلى باقىلانىپ وتىراتىن بولادى.

وسى سەبەپتى دە ۇرىمجىدەگى ديپلوماتتارعا جازىقسىز جالا جابۋ، اتاجۇرتىن ساعىنعان قانداس رەتىمەن ەلگە كەلەدى دەگەن ويدامىز»، - دەلىنگەن رەسمي مالىمدەمەدە.

كونسۋلدىق ەسكە سالىپ وتكەندەي، قانداستار قازىرگى ۋاقىتتا قازاقستانعا 14 كۇنگە ۆيزاسىز كەلە الادى جانە ەكى ەل اراسىنداعى كەلىسىم كۇشىنە ەنگەننەن كەيىن بۇل مەرزىم 30 كۇنگە دەيىن ۇزارادى.