قانداستار مەن قونىس اۋدارۋشىلاردى قابىلداۋدىڭ 2024 -جىلعا ارنالعان وڭىرلىك كۆوتاسى بەكىتىلدى

ەڭبەك جانە حالىقتى الەۋمەتتىك قورعاۋ ءمينيسترىنىڭ بۇيرىعىمەن قانداستار مەن قونىس اۋدارۋشىلاردى قابىلداۋدىڭ 2024 -جىلعا ارنالعان وڭىرلىك كۆوتاسى بەكىتىلدى، دەپ حابارلايدى El.kz اقپارات اگەنتتىگى.

بۇيرىقتىڭ ماقساتى - قازاقستان رەسپۋبليكاسى ۇكىمەتى ايقىندايتىن وڭىرلەردە قانداستار مەن قونىس اۋدارۋشىلاردى وڭتايلى قونىستاندىرۋ.

ۆەدومستۆونىڭ دەرەگىنشە، قانداستار مەن قونىس اۋدارۋشىلاردى قابىلداۋدىڭ 2024 -جىلعى وڭىرلىك كۆوتاسى 9483 ادام دەپ بەلگىلەندى. بۇل 2023 -جىلمەن سالىستىرعاندا 554 ادامعا ارتىق. وبلىستار بويىنشا تومەندەگىدەي ءبولىندى:

- قانداستار ءۇشىن: پاۆلودار وبلىسى – 902، قوستاناي وبلىسى – 550، اقمولا وبلىسى – 285، شىعىس قازاقستان وبلىسى – 269، سولتۇستىك قازاقستان وبلىسى - 207 ادام، اباي وبلىسى - 220 ادام؛

- قونىس اۋدارۋشىلار ءۇشىن: سولتۇستىك قازاقستان وبلىسى – 2702، پاۆلودار وبلىسى – 2603، قوستاناي وبلىسى – 950، شىعىس قازاقستان وبلىسى – 372، اباي وبلىسى – 255، ۇلىتاۋ وبلىسى – 132، قاراعاندى وبلىسى - 36 ادام.

قانداستار مەن قونىس اۋدارۋشىلاردى قابىلداۋدىڭ وڭىرلىك كۆوتاسىنا ەنگىزىلگەن ادامدارعا مەملەكەتتىك قولداۋ شاراسى كورسەتىلەتىن بولادى. اتاپ ايتقاندا:

- كوشۋگە سۋبسيديالار - وتباسىنىڭ ءاربىر مۇشەسىنە 70 ا ە ك بويىنشا ءبىرجولعى تولەم؛

- 12 اي ىشىندە ءبىر وتباسىنا 15 تەن 30 ا ە ك-كە دەيىن تولەنەتىن تۇرعىن ءۇيدى جالداۋ (جالعا الۋ) جانە كوممۋنالدىق قىزمەتتەرگە اقى تولەۋ بويىنشا شىعىستاردى جابۋ ءۇشىن سۋبسيديالار؛

- 400 ا ە ك مولشەرىندە قونىس اۋدارۋعا جاردەم كورسەتەتىن جۇمىس بەرۋشىلەر ءۇشىن سۋبسيديالار؛

- قىسقا مەرزىمدى كاسىپتىك وقىتۋعا جولداما؛

- جۇمىسقا ورنالاسۋعا نەمەسە كاسىپكەرلىك باستامانى دامىتۋعا جاردەمدەسۋ؛

- تۇرعىن ءۇي ساتىپ الۋعا ەكونوميكالىق موبيلدىلىك سەرتيفيكاتتارىن بەرۋ.

ەسكە سالساق، 1991 -جىلدان باستاپ 2024 -جىلعى 1-قاڭتار ارالىعىندا 1 ميلليون 128,37 مىڭ ەتنيكالىق قازاق تاريحي وتانىنا ورالدى. ال 2023 -جىلى 21,3 مىڭ ەتنيكالىق قازاق تاريحي وتانىمەن تابىسىپ، قانداس مارتەبەسىن الدى.