قانداستار ۇلتتىق سپورت ويىندارىن تاماشالادى
استانادا وتەتىن «وتانداستار» فورۋمىنا كەلگەن قانداستار ۇلتتىق سپورت ويىندارىن تاماشالادى، دەپ حابارلايدى Kazinform.
ەرتەڭ باستالاتىن فورۋمعا شەتەلدەگى 200 گە جۋىق قازاق ۇيىمدارىنىڭ باسشىسى، بەلسەندى جانە تانىمال تۇلعالار، وتاندىق عىلىم، ءبىلىم، مادەنيەت، سپورت، بيزنەس، مەديا، ساياسات، قوعامدىق ۇيىمدار جانە باسقا دا سالالاردىڭ كورنەكتى وكىلدەرى مەن بەلگىلى قايراتكەرلەرى كەلگەن بولاتىن.
وسىعان وراي، بۇگىن فورۋمنىڭ باس سەرىكتەسى «Altyn Qyran Foundation» قوعامدىق قورى جانە ۇلتتىق سپورت قاۋىمداستىعى ۇيىمداستىرىپ جاتقان مادەني باعدارلاما اياسىندا شەتەلدەن كەلگەن قانداستار ۇلتتىق قۇندىلىقتارىمىزبەن تانىستى. اتاپ ايتقاندا، ۇلتتىق سپورت قاۋىمداستىعى مەن سالالىق سپورت فەدەراتسيالارىنىڭ ماماندارى قۇسبەگىلىك، قولونەر شەبەرلىگى، ۇلتتىق ويىندارىمىزدان توعىزقۇمالاق، اسىق اتۋ، ساداق اتۋ، قىز قۋۋ، اۋدارىسپاق جانە كوكپار تارتۋدان قويىلىم كورسەتتى.
«ءار قازاق مەنىڭ جالعىزىم» دەگەن ۇرانمەن شەتتەگى قازاقتىڭ ءبارىن شاقىرعىمىز كەلەدى. سىزدەر سول شەتەلدەگى قازاق ءۇشىن ەڭبەك ەتىپ جۇرگەن تۇلعالارسىزدار. ءارقايسىلارىڭىز وزدەرىڭىزدىڭ سالالارىڭىز بويىنشا جەتىستىككە جەتىپ، قازاقتىڭ اتىن شىعارىپ جۇرسىزدەر. تۇرىپ جاتقان ەلدەرىڭىز بەن قازاقستان اراسىندا التىن كوپىر بولىپ وتىرسىزدار. سوندىقتان سىزدەردى ارنايى شاقىردىق. «وتانداستار» فورۋمى استانادا وسىمەن ەكىنشى رەت وتەكەلى تۇر. بۇدان بۇرىن 2019 -جىلى بولعان. بيىلعى فورۋمنىڭ الدىنعى فورۋمنان ەرەكشەلىگى - كەلگەن قانداستارىمىزدىڭ سانىندا. بۇعان دەيىنگى فورۋمعا 100 دەلەگات كەلسە، بيىلعىسىنا 40 ەلدەن 200 دەلەگات كەلدى، - دەدى «وتانداستار قورىنىڭ» پرەزيدەنتى ابزال ساپاربەك ۇلى.
فورۋمنىڭ ماقساتى - شەتەلدەگى قازاق ۇيىمدارىمەن ءوزارا ىنتىماقتاستىق ماسەلەلەرىن تالقىلاۋ؛ ەلىمىزدىڭ جاڭا كەزەڭدەگى مەملەكەتتىك ساياساتىمەن جانە ساياسي- ەكونوميكالىق رەفورمالارىمەن، ۇلتتىق رۋحانياتقا قاتىستى زاماناۋي ترەندتەرمەن تانىستىرۋ، شەتەلدەگى قازاقتاردى قولداۋدا ەلىمىزدىڭ جۇرگىزىپ وتىرعان ساياساتى، شەتەلدەگى قازاق جاستارىن قازاقستاندا ساپالى ءبىلىم الۋ جانە ءوز قابىلەتتەرىن ىسكە اسىرۋ، ەلگە كوشىپ كەلەتىن قانداستارعا مەملەكەت تاراپىنان قابىلدانىپ جاتقان قولداۋ شارالارى تۋرالى اقپاراتتاندىرۋ.
«بۇگىن دۇنيە جۇزىنەن كەلگەن قانداستارىمىزدى ۇلتتىق اسپاپتارىمىزبەن جانە سپورت تۇرلەرىمەن تانىستىرىپ جاتىرمىز. ۇلتتىق سپورتىمىزدى كورسىن، قازاقتىڭ سالت- داستۇرىمەن تانىسسىن دەگەن نيەت. بۇل ويىنداردا قازاقتىڭ تاريحى، نامىسى، رۋحى بار. اللا بۇيىرسا 2024 -جىلى قازاقستاندا دۇنيەجۇزىلىك كوشپەندىلەر ويىنى وتەدى. ول ءبىز ءۇشىن مارتەبە ءارى ۇلكەن جاۋاپكەرشىلىك. مەملەكەت باسشىسىنىڭ قولداۋىنىڭ ارقاسىندا ۇلتتىق سپورتىمىز جاقسى دامىپ كەلەدى. كەلەسى جىلى كوشپەندىلەر ويىنىنا 100 مەملەكەتتەن 3 مىڭنان استام سپورتشى، تۋريست كەلەدى دەپ كۇتىلۋدە. ءبىز وسى قانداستارىمىزدى دا شاقىرامىز. ولار ارقىلى باسقا دا تۋريستەردى تارتىپ، ءوزىمىزدىڭ ۇلتتىق سپورت تۇرلەرىن الەمگە تانىستىرعىمىز كەلەدى، - دەدى ۇلتتىق سپورت قاۋىمداستىعىنىڭ ۆيتسە- پرەزيدەنتى تاستانبەك ەسەنتايەۆ.
فورۋم اياسىندا «ەل دامۋىنداعى قانداستاردىڭ ءرولى»، «وتانداستاردىڭ ينتەللەكتۋالدىق الەۋەتى - ۇلتتىق قۇندىلىقتاردى ىلگەرىلەتۋ درايۆەرى»، «XXI عاسىرداعى قازاق ءتىلى جانە بۇگىنگى مۇمكىندىكتەرى»، «مەديا جانە زاماناۋي ترەندتەر» تاقىرىپتارى بويىنشا سەسسيالار جانە «وتانداستار قورى» ك ە ا ق جاڭا جوبالارىنىڭ تۇساۋكەسەرى مەن «تايقازان» فورۋمنىڭ قورىتىندى سەسسياسىندا وتەدى.
ايتا كەتەيىك، بۇعان دەيىن شەتەلدەگى 200 قازاق ۇيىمىنىڭ جەتەكشىسى ەلىمىزدە باس قوسقانىن جازعان بولاتىنبىز.
ريزابەك نۇسىپبەك ۇلى
