قانات بوزىمبايەۆ جاڭاوزەندەگى جۇمىسشىلار ماسەلەسىن شەشۋگە قاتىستى پىكىر ءبىلدىردى

استانا. KAZINFORM - پرەمەر-ءمينيستردىڭ ورىنباسارى قانات بوزىمبايەۆ «وزەنمۇنايگاز» كومپانياسىنا قاراستى بۇرعىلاۋ باسقارماسىنىڭ ەرەۋىلگە شىققان جۇمىسشىلارىنا قاتىستى جاعدايعا پىكىر ايتتى.

بۇگىن پارلامەنت ماجىلىسىندە تىلشىلەر جاڭاوزەندەگى مۇنايشىلاردىڭ نارازىلىعى جايىندا سۇراق قويدى.

«بۇل ماسەلە مەنىڭ قۇزىرەتىمە جاتپايدى، ءبىراق ول جايىندا حاباردارمىن. كونستيتۋتسياعا سايكەس ءار ادام ءوز قۇقىعىن قورعاۋى ءتيىس. سوندىقتان وسى جاعدايدا زاڭدى ءارى زاڭسىز ماسەلەلەردى قاراۋ كەرەك. ەكىنشىدەن، ناقتى قانداي تالاپتار قويىپ وتىرعانىن قاراستىرۋ قاجەت. بۇل تۇرعىدا وسى تالاپتاردىڭ قانشالىق ءادىل ەكەنىنە نازار اۋدارعان ءجون. وسى ماسەلەلەرگە «قازمۇنايگاز» كومپانياسى بەلسەندى تۇردە ارالاسۋى ءتيىس. ولاردا ءتيىستى الگوريتم بار ەكەنىن بىلەمىن. سودان كەيىن كەلەسى دەڭگەيدە ونى مينيسترلىك قاراۋى كەرەك (ەنەرگەتيكا مينيسترلىگى)»، - دەدى ق. بوزىمبايەۆ.

بۇدان بۇرىن حابارلانعانداي، جاقىندا «قازمۇنايگاز» «وزەنمۇنايگاز» كومپانياسىندا قالىپتاسقان جاعدايدى ءتۇسىندىردى.

22-قاراشا كۇنى «قازمۇنايگاز» كومپانياسىنىڭ باسقارما ءتوراعاسى اسحات حاسەنوۆ «وزەنمۇنايگاز» كومپانياسىنا قاراستى بۇرعىلاۋ باسقارماسىنىڭ ەرەۋىلگە شىققان جۇمىسشىلارى قاشان تولىق جۇمىسقا ورالاتىنىن ايتتى.