قانات بوزىمبايەۆ اتىراۋ وبلىسىندا ت ج جويۋ جونىندەگى جۇمىستى ۇيلەستىرەدى

اتىراۋ. KAZINFORM - مەملەكەت باسشىسىنىڭ تاپسىرماسى بويىنشا سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى كەزەڭىنىڭ سالدارىن جويۋ جونىندەگى رەسپۋبليكالىق شتاب جەتەكشىسىنىڭ ورىنباسارى قانات بوزىمبايەۆ قازىر - اتىراۋ وبلىسىندا. وڭىردەگى دايىندىق رەجيمى - جوعارى دەڭگەيدە، ت ج جويۋ جونىندەگى وبلىستىق جەدەل شتاب جۇمىس ىستەپ جاتىر.

ۆيتسە-پرەمەر اقتوبە وبلىسىمەن شەكارا اۋماعىن تىكۇشاقپەن اينالىپ ءوتتى. جەم وزەنىندەگى زاقىمدالعان بوگەتتىڭ جاعدايىنا باعا بەردى. كەشە ونىڭ بۇزىلۋى ناتيجەسىندە قۇلسارى قالاسىنىڭ ەكىنشى جانە ءۇشىنشى ۋچاسكەلەرى، سونداي-اق «جادىراسىن-2»، «بولاشاق»، «ۆاحتالىق كەنت» شاعىن اۋداندارى، «قاراعاي» ەلدى مەكەنى سۋ استىندا قالدى.

6-ساۋىردەگى جاعداي بويىنشا اتىراۋ وبلىسىنىڭ ءۇش اۋدانىندا كۇردەلى سۋ تاسقىنى جاعدايى ساقتالۋدا، 2 ەلدى مەكەنگە كولىكپەن قاتىناۋ مۇمكىن ەمەس.

قۇلسارى قالاسىندا 2,6 مىڭ جەكە تۇرعىن ءۇي مەن اكىمشىلىك عيمارات سۋ استىندا قالىپ، 5-ساۋىردەن باستاپ قاۋىپتى ايماقتان 15632 ادام شىعارىلدى. حالىقتى ەۆاكۋاتسيالاۋ جالعاسۋدا.

قازىرگى ۋاقىتتا جاعالاۋدى نىعايتۋ جۇمىستارى قارقىندى جالعاسۋدا، توپىراق تولتىرىلعان 45,9 مىڭ قاپشىق، 174,3 مىڭ توننا ينەرتتى ماتەريال توسەلدى. 5-ساۋىردە كاسپي تەڭىزىنە قاراي سۋ وتكىزۋ قابىلەتىن ارتتىرۋ ءۇشىن جەم وزەنىندە مۇز جارۋ جۇمىستارى جۇرگىزىلدى، تاعى ءبىر رەت مۇز جارۋ جوسپارلانعان.

اكىمدىك پەن كۇشتىك قۇرىلىمداردىڭ 600 گە جۋىق قىزمەتكەرى، 148 تەحنيكا، 2 ءجۇزۋ قۇرالى جانە 500 ەرىكتى جۇمىلدىرىلدى.

5 ەلدى مەكەندە - ميالى، جانگەلدين، كوزدىقارا اۋىلدىق وكرۋگتەرى، اققورا، جاسقايرات اۋىلدارىندا قاۋىپ-قاتەر سەيىلدى.