قانات بوزىمبايەۆ الداعى مەرەكەگە وراي توتەنشە جاعدايلار سالاسى مەن ىشكى ىستەر ورگاندارىنا تاپسىرما بەردى
استانا. KAZINFORM - قانات بوزىمبايەۆ ت ج م، ءى ءى م جانە اكىمدىكتەردىڭ الداعى مەرەكە كۇندەرى قاۋىپسىزدىكتى قامتاماسىز ەتۋگە دايىندىعىن تەكسەردى، دەپ حابارلايدى ۇكىمەتتىڭ باسپا ءسوز قىزمەتى.
ۆيتسە-پرەمەر قابىلدانىپ جاتقان شارالار تۋرالى جاۋاپتى مينيسترلىكتەر مەن ءوڭىر اكىمدىكتەرىنىڭ ەسەپتەرىن تىڭدادى.
جەلتوقساندا ءورت قاۋىپسىزدىگى ايلىعى باستالدى. توتەنشە جاعدايلار مينيسترلىگى العاشقى اپتانىڭ ىشىندە ەلدى مەكەندەردەگى 2,5 مىڭنان استام ءۇيدى قامتيتىن پروفيلاكتيكالىق رەيدتەر وتكىزدى. پەشتەر مەن ەلەكتر جۇيەلەرى تەكسەرىلەدى. سونداي-اق پيروتەحنيكالىق بۇيىمداردى پايدالانۋ ەرەجەلەرى تۇسىندىرىلەدى. ىشكى ىستەر مينيسترلىگىمەن بىرلەسىپ، «پيروتەحنيكا» جەدەل- پروفيلاكتيكالىق ءىس-شاراسى وتۋدە. 670 موبيلدى توپ قۇرىلىپ، پيروتەحنيكانى ساقتاۋ جانە تاراتۋ ورىندارى بويىنشا 78 رەيدتىك ءىس- شارا وتكىزىلدى. رۇقسات ەتىلمەگەن ساۋدا ءۇشىن 21 ادام اكىمشىلىك جاۋاپكەرشىلىككە تارتىلدى. ەلگە پيروتەحنيكالىق ونىمدەردى زاڭسىز اكەلۋ فاكتىلەرىنىڭ جولىن كەسۋ بويىنشا جۇمىستار جۇرگىزىلۋدە. مەرەكە قارساڭىندا ءى ءى م مەن ت ج م قىزمەت كورسەتۋدىڭ كۇشەيتىلگەن جۇمىس رەجيمىنە كوشۋدە.
«ويىن-ساۋىق جانە ادامدار كوپ جينالاتىن ورىنداردى الدىن الا تەكسەرۋ قاجەت. ءورت ءسوندىرۋ قۇرالدارىنسىز بۇقارالىق ءىس-شارالار وتكىزۋگە رۇقسات بەرمەۋ قاجەت. ادامداردى شۇعىل ەۆاكۋاتسيالاۋ بويىنشا قىزمەتكەرلەرمەن وقۋ-جاتتىعۋلارىن وتكىزۋ كەرەك. ساۋدا جانە ويىن-ساۋىق ورتالىقتارى، تەاترلار مەن سپورت كەشەندەرىنىڭ پاركينگتەرىنە گاز جابدىقتارى بار اۆتوكولىكتەردىڭ كىرۋىنە جول بەرمەۋگە ەرەكشە نازار اۋدارۋ قاجەت. ءبىز توتەنشە جاعدايلاردىڭ الدىن الۋ بويىنشا كەشەندى شارالار قابىلداۋىمىز كەرەك»، - دەپ تاپسىردى قانات بوزىمبايەۆ.
ۆيتسە-پرەمەر وقۋ-اعارتۋ مينيسترلىگىنە مەن ءوڭىر اكىمدىكتەرىنە قىسقى دەمالىس جانە جاڭا جىلدىق مەرەكەلەر كەزىندە بالالار مەن جاس وسپىرىمدەردىڭ بوس ۋاقىتىن لايىقتى ۇيىمداستىرۋ تاپسىرىلدى. سونداي-اق مادەنيەت جانە اقپارات مينيسترلىگى حالىقتى مەرەكە كۇندەرىندەگى قاۋىپسىزدىك شارالارى تۋرالى كەڭىنەن حاباردار ەتۋى كەرەك.
وسىعان دەيىن ازىق-تۇلىك ينفلياتسياسىن تەجەۋ ءۇشىن ايماقتاردا كوكونىس قورلارى پايدالانىلا باستاعانى تۋرالى جازدىق.
