قان تاپسىرعان ازاماتتاردى ماراپاتتايتىن «قۇرمەتتى دونور» اتاعى قايتارىلادى

دەنساۋلىق ساقتاۋ مينيسترلىگى «قۇرمەتتى دونور» توسبەلگىسىن قايتا بەكىتۋدى ۇسىندى، دەپ حابارلايدى قازاقپارات ءتىلشىسى.

ءتيىستى قاۋلى اشىق ن ق ا پورتالىندا جاريالاندى. وندا ۆەدومستۆو بۇل توسبەلگى دونورلاردى ىنتالاندىرۋ ءۇشىن ماڭىزدى ەكەنىن اتاپ وتكەن.

«قۇرمەتتى دونور» توسبەلگىسىمەن قازاقستان رەسپۋبليكاسىنىڭ ازاماتتارى، سونداي-اق ق ر اۋماعىندا جۇرگەن شەتەلدىكتەر مەن ازاماتتىعى جوق ادامدار، بەلسەندى جانە جەمىستى قايىرىمدىلىق قىزمەتى ءۇشىن، قان دوناتسياسىن نەمەسە ترومبوتسيتتەردى كەمىندە 40 رەت، پلازما دوناتسياسىن كەمىندە 70 رەت وتەۋسىز نەگىزدە جۇزەگە اسىرعانى ءۇشىن ماراپاتتالادى»، - دەلىنگەن ۇكىمەت قاۋلىسىنىڭ جوباسىندا.

دەنساۋلىق ساقتاۋ مينيسترلىگىنىڭ مالىمەتىنشە، بۇگىندە «قۇرمەتتى دونور» اتاعىن الۋعا لايىقتى 210 مىڭ قازاقستاندىق بار.

«ءبىزدىڭ ەلىمىزدە قاۋىپسىز قان دونورلىعىنىڭ نەگىزىن قۇرۋ ءۇشىن حالىقتىڭ حاباردارلىعىن ارتتىرۋدى عانا ەمەس، سونىمەن قاتار وسكەلەڭ ۇرپاق ءۇشىن ۇلگى كورسەتۋ ماڭىزدى. سول سەبەپتى بىرنەشە رەت قان تاپسىراتىن دونورلاردىڭ قولداۋدىڭ ۇزاقمەرزىمدى ءتاسىلى قاجەت. قازىرگى ۋاقىتتا بەلگىلەنگەن ولشەمدەرگە جەتكەن بەلسەندى دونورلاردىڭ جالپى سانى - 210 ادام، ال توسبەلگىنى العانداردىڭ سانى %30 دان اسپايدى. جوعارىدا باياندالعاندارعا بايلانىستى «قۇرمەتتى دونور» اتاعىن قالپىنا كەلتىرۋ مۇمكىندىگىن قاراستىرۋدى سۇرايمىز»، - دەپ مينيسترلىك قاۋلىعا تۇسىندىرمە بەرگەن.

قۇجات 6- قازانعا دەيىن كوپشىلىك تالقىلاۋدا بولادى.