قاجىمۇقان ستاديونى حالىقارالىق تالاپتارعا ساي قايتا جابدىقتالدى
استانا. KAZINFORM - استانا قالاسىندا مەملەكەتكە قايتارىلعان قاراجات ەسەبىنەن قارجىلاندىرىلاتىن الەۋمەتتىك ماڭىزى بار جوبالاردى ىسكە اسىرۋ جۇمىستارى ءجۇرىپ جاتىر، دەپ حابارلايدى ق ر باس پروكۋراتۋراسىنىڭ باسپا ءسوز قىزمەتى.
باسپاءسوز قىزمەتىنىڭ مالىمەتتەرىنە قاراعاندا، قازاقستان رەسپۋبليكاسى پرەزيدەنتىنىڭ تاپسىرماسى بويىنشا استانا پروكۋراتۋراسى مەملەكەتكە قايتارىلعان قاراجات ەسەبىنەن جوبانى ىسكە اسىردى.
قاجىمۇقان مۇڭايتپاسوۆ اتىنداعى ستاديون - ونداعان جىلدار بويى ۇلتتىق سپورتتى دامىتۋ ورتالىعى رەتىندە قىزمەت ەتكەن ەلوردانىڭ ايتۋلى سپورت نىساندارىنىڭ ءبىرى.
كەڭ اۋقىمدى قايتا قۇرۋدان كەيىن ستاديون زاماناۋي جانە كوپ فۋنكسيالى بولدى.
قازىر ول حالىقارالىق تالاپتارعا ساي.
- سپورتتىق جارىستاردى، جاتتىعۋ پروتسەستەرىن جانە جاپپاي ءىس-شارالاردى وتكىزۋ ءۇشىن قولايلى جاعدايلار جاسالدى، - دەلىنگەن حابارلامادا. ايتا كەتەيىك، ەلوردادا جالپى قۇنى 57 ميلليارد تەڭگەدەن اساتىن 3 جوبا ىسكە اسىرىلىپ جاتىر. الەۋمەتتىك ماڭىزى بار وبەكتىلەردى سالۋ جانە ساتۋ بارىسى استانا پروكۋراتۋراسىنىڭ تۇراقتى باقىلاۋىندا.
وسىعان دەيىن ماڭعىستاۋدا پروكۋراتۋرانىڭ 1,3 ميلليارد تەڭگەلىك جوبانىڭ جالعاسۋىنا ىقپال ەتكەنى تۋرالى جازدىق.
