Qajet: قازاققا قاجەت تاكسي مە، الدە كەزەكتى شيكى جوبا ما؟

قازاقستاندىق تاكسي نارىعىندا Qajet اتتى جاڭا قوسىمشا پايدا بولىپ، الەۋمەتتىك جەلىدە قىزۋ تالقىلانىپ جاتىر. جۇرتتىڭ ءبىر بولىگى ونى كوپتەن كۇتكەن وتاندىق بالاما دەپ قۋانا قارسى الدى. ەندى ءبىرى شەتەلدىك الپاۋىتتارعا تاۋەلدىلىكتەن قۇتىلاتىن كۇن تۋدى دەپ ءسۇيىنشى سۇراۋدا. الايدا العاشقى پايدالانۋشىلاردىڭ پىكىرىنە قاراعاندا، ەلدىڭ ىقىلاسىنا بولەنگەن جاڭا سەرۆيستىڭ ءالى دە شەشىلمەگەن ماسەلەلەرى از ەمەس.

قازاقستاندىقتاردىڭ ءوز تاكسي سەرۆيسىنىڭ بولعانىن قالاۋى تۇسىنىكتى. نارىقتا تاڭداۋ كوبەيسە، باسەكە كۇشەيەدى، قىزمەت ساپاسىنا قويىلاتىن تالاپ ارتادى. ونىڭ ۇستىنە، جاقىندا ياندەكس سەرۆيستەرىنىڭ جۇمىسىنداعى ىركىلىس ءىرى پلاتفورمالارعا تاۋەلدىلىكتىڭ قولايسىزدىق تۋعىزاتىنىن كورسەتتى. سوندىقتان Qajet-تىڭ پايدا بولۋىن قۇپتايتىن نەگىز بار.

جاڭا قوسىمشانىڭ ۇسىنعان شارتتارى دا قىزىقتىرادى. جۇرگىزۋشىلەرگە باستاپقى كەزەڭدە ءنول پايىز كوميسسيا ۋادە ەتىلگەن. جولاۋشىلارعا ساپار قۇنىن الدىن الا ءبىلۋ، تولەم ءتاسىلىن تاڭداۋ مۇمكىندىگى قاراستىرىلعان. الەۋمەتتىك جەلىدە جاريالانعان كەيبىر سالىستىرۋلاردا Qajet باعاسى باسەكەلەستەرىنەن ەداۋىر ارزان بولىپ شىققان.

دەگەنمەن جۇرتتىڭ قۋانىشى مەن قوسىمشانىڭ ناقتى مۇمكىندىگى ەكى بولەك ماسەلە. ازىرگە Qajet-كە دەگەن ىقىلاس ونىڭ قىزمەت ساپاسىنان وزىپ كەتكەندەي اسەر قالدىرادى.

باعاسى ارزان، ءبىراق تاكسيدىڭ ءوزى قايدا؟

Threads جەلىسىندە Qajet ارقىلى كولىك شاقىرا الماعاندار تاجىريبەسىن بولىسە باستادى. ءبىرى جارتى ساعات بويى تاپسىرىسىن قابىلدايتىن جۇرگىزۋشى تاپپاعانىن جازسا، ەندى ءبىرى كۇندىز دە، كەشكە دە بوس كولىك بولماعانىن ايتادى.

ماسەلەن، ايگەرىم ەسىمدى قولدانۋشى «Qajet taxi وزدەرىنە تاكسيستتەر قاجەت-اۋ، بىزگە ەمەس. كۇندىز 11 دە دە، كەشكە دە تاكسي جوق»، - دەپ جازدى.

تاعى ءبىر پايدالانۋشىنىڭ مالىمەتىنە سۇيەنسەك، ءبىر باعىتتاعى جولاقى Qajet-تە 1330 تەڭگە، ال وزگە اگرەگاتوردا 1920 تەڭگە بولعان. الايدا ءۇش مينۋت ىزدەگەننەن كەيىن Qajet بوس كولىك تابىلماعانىن حابارلاعان. ءسويتىپ، جولاۋشى قىمباتىراق بولسا دا، باسقا سەرۆيستىڭ كومەگىنە جۇگىنگەن.

مۇندا تاكسي نارىعىنىڭ قاراپايىم زاڭدىلىعى جاتىر. جولاۋشىعا ارزان باعا كەرەك، ال جۇرگىزۋشىگە تابىس قاجەت. ەكەۋىنىڭ مۇددەسى ۇيلەسپەسە، ەكرانداعى تارتىمدى باعانىڭ پايداسى شامالى.

Qajet جۇرگىزۋشىلەردەن باستاپقىدا كوميسسيا المايتىنىن مالىمدەدى. بۇل، ارينە، ءتيىمدى ۇسىنىس. ءبىراق جۇرگىزۋشىنىڭ تابىسى تەك كوميسسياعا بايلانىستى ەمەس. ول ءبىر ساعاتتا قانشا تاپسىرىس ورىندايتىنىن، ءار ساپارعا قانشا ۋاقىت جۇمسايتىنىن، جانارماي مەن كولىكتىڭ كۇتىمىنە قانشا اقشا كەتەتىنىن ەسەپتەيدى. تاپسىرىس باعاسى تىم تومەن بولسا، كوميسسياسىز جۇمىس ىستەۋدىڭ ءوزى ءتيىمسىز بولۋى مۇمكىن.

بۇعان قوسا، ءىرى سەرۆيستەر جۇرگىزۋشىلەردى ىنتالاندىرۋ ءۇشىن ءتۇرلى بونۋستىق باعدارلاما قولدانادى. ال Qajet مۇنداي جۇيەنى قالاي قالىپتاستىراتىنى ازىرگە بەلگىسىز. نولدىك كوميسسيانىڭ دا ماڭگىلىك ەمەس ەكەنى تۇسىنىكتى: سەرۆەر، ماماندار، قولداۋ قىزمەتى مەن تەحنولوگيالىق ينفراقۇرىلىمنىڭ ءبارى قاراجات تالاپ ەتەدى. ونىڭ ۇستىنە، جۇرگىزۋشىلەرمەن جاسالاتىن شارتتا كوميسسيا مولشەرىنىڭ كەيىن وزگەرۋى مۇمكىن ەكەنى قاراستىرىلعان.

وسى شارتتىڭ ءوزى دە ءبىرقاتار سۇراق تۋعىزادى. 16-قازاندا جاريالانعان قۇجاتتا جۇرگىزۋشىنىڭ ەڭ تومەنگى جاسى [21]، كولىك جۇرگىزۋ ءوتىلى [3] جىل دەپ جاقشا ىشىندە بەرىلگەن. كوميسسيا وزگەرەتىنىن ەسكەرتۋ مەرزىمى مەن جۇرگىزۋشىنىڭ اقشاسىن شىعارۋ ۋاقىتى دا وسىلاي كورسەتىلگەن. ءتىپتى باعا بەلگىلەۋ، تولەم قابىلداۋ جانە سالىق تولەۋ تارتىبىنە قاتىستى زاڭگەرگە ارنالعان ەسكەرتپەلەر دە سول كۇيى قالعان. جۇرگىزۋشى قانداي تالاپپەن جۇمىس ىستەيتىنىن انىق بىلۋگە ءتيىس ەمەس پە؟ اسىرەسە ونىڭ تابىسى مەن مىندەتتەمەلەرىنە قاتىستى قۇجاتتا مۇنداي ولقىلىقتاردىڭ بولۋى جاڭا سەرۆيستىڭ ۇيىمداستىرۋشىلىق دايىندىعىنا كۇمان تۋدىرادى.

سوندىقتان جاڭا سەرۆيس ءۇشىن ەڭ كۇردەلى مىندەتتەردىڭ ءبىرى - جولاۋشىعا قولجەتىمدى باعا ۇسىنىپ، جۇرگىزۋشىنىڭ دە ەڭبەگىن اقتايتىن جۇيە قۇرۋ.

كارتاداعى ۋاقىت پەن ومىردەگى ۋاقىت

Qajet-كە قاتىستى تاعى ءبىر سىن ناۆيگاتسيا مەن جولعا كەتەتىن ۋاقىتتى ەسەپتەۋگە بايلانىستى. Threads قولدانۋشىسى @symbat.s.o قوسىمشانىڭ جۇرگىزۋشى التى مينۋتتا كەلەتىنىن كورسەتكەنىمەن، ءىس جۇزىندە جيىرما مينۋت كۇتكەنىن جازعان. ونىڭ ايتۋىنشا، باراتىن جەرگە جەتۋ ۋاقىتى دا دۇرىس كورسەتىلمەيدى.

وسىنداي كۇماندى جاعداي باسقا باعىتتاردا دا كەزدەسكەن. ماسەلەن، الماتىداعى ءبىر باعىت بويىنشا Qajet اۋەجايعا 27 مينۋتتا جەتۋگە بولاتىنىن كورسەتىپ، جولاقىنى 3500 تەڭگە دەپ ەسەپتەگەن. ال وزگە سەرۆيس ءدال سول باعىتقا 52 مينۋت پەن 5800 تەڭگە ۇسىنعان. بۇل - ەكى قوسىمشانىڭ بولجامىن سالىستىرۋ عانا، ناقتى ساپار ناتيجەسى ەمەس. دەگەنمەن 25 مينۋتتىق ايىرماشىلىقتىڭ ءوزى نازار اۋدارۋعا تۇرارلىق.

ويتكەنى ناۆيگاتسياداعى قاتەلىك جولاۋشىنى كەشىكتىرۋمەن شەكتەلمەۋى مۇمكىن. ەگەر ساپار قۇنى جولعا كەتەتىن ۋاقىتتىڭ قاتە بولجامىنا سۇيەنىپ ەسەپتەلسە، جۇرگىزۋشى دە زارداپ شەگەدى. ول ون مينۋتتا اياقتايمىن دەگەن تاپسىرىسقا جارتى ساعات جۇمساۋى ىقتيمال. ال مۇنداي ايىرماشىلىق جولاقىعا اسەر ەتپەسە، جۇرگىزۋشىنىڭ ءبىر ساعاتتا تاباتىن اقشاسى ازايادى.

ونىڭ ۇستىنە، Qajet-تىڭ جۇرگىزۋشىلەرگە ارنالعان شارتى بويىنشا، تاپسىرىستى قابىلداعان ادام ونى قوسىمشادا كورسەتىلگەن باعامەن ورىنداۋعا كەلىسەدى. ال ساپار ۇزاقتىعى باستاپقى بولجامنان اسىپ كەتكەن جاعدايدا جولاقىنىڭ قالاي قايتا ەسەپتەلەتىنى قۇجاتتا ناقتى تۇسىندىرىلمەگەن.

ارينە، Qajet باعاسىنىڭ ناقتى قانداي ولشەمدەرمەن ەسەپتەلەتىنىن بىلمەي، جۇرگىزۋشىلەر شىعىنعا باتىپ جاتىر دەپ كەسىپ ايتۋعا بولمايدى. ءبىراق جولعا كەتەتىن ۋاقىتتىڭ دالدىگى تاكسي سەرۆيسى ءۇشىن قوسالقى ماسەلە ەمەس. باعا دا، جۇرگىزۋشىنىڭ جۇمىس جوسپارى دا سوعان تاۋەلدى.

مۇندا تاعى ءبىر قىزىق جايت بار. وتاندىق قوسىمشانى قولداۋشىلاردىڭ اراسىندا Qajet-تى رەسەي تەحنولوگيالارىنا تاۋەلدىلىكتەن قۇتىلۋدىڭ جولى رەتىندە كورسەتەتىندەر كەزدەسەدى. ال سەرۆيستىڭ رەسمي سايتىندا 2گيس كارتالارى قولدانىلاتىنى جازىلعان. بۇل - رەسەيدە پايدا بولعان كارتوگرافيالىق سەرۆيس. ونىڭ باقىلاۋ پاكەتىن 2020 -جىلى سبەربانك ساتىپ العان.

ارينە، شەتەلدىك تەحنولوگيانى پايدالانۋ Qajet-تىڭ قازاقستاندىق ءونىم بولۋىنا كەدەرگى ەمەس. بۇگىندە بۇكىل باعدارلامانى باسىنان اياعىنا دەيىن جالعىز ءوزى جاسايتىن كومپانيا سيرەك. ءبىراق ماسەلە تەحنولوگيالىق تاۋەلسىزدىككە تىرەلسە، وتاندىق كومپانيا مەن تولىقتاي وتاندىق تەحنولوگيانىڭ ارا-جىگىن اجىراتا بىلگەن ءجون.

قاۋىپسىزدىك ۇرانمەن قامتاماسىز ەتىلمەيدى

باعانىڭ ارزاندىعى مەن تاپسىرىستىڭ كەشىگۋىنە كەلگەندە، جاڭا سەرۆيستىڭ تاجىريبەسىزدىگىن العا تارتۋعا بولار. ال جولاۋشى قاۋىپسىزدىگى مەن جەكە دەرەكتەردى قورعاۋعا كەلگەندە مۇنداي ءۋاج جۇرمەيدى.

تاكسي - ادامداردىڭ ءومىرى مەن دەنساۋلىعىنا تىكەلەي قاتىسى بار قىزمەت. سوندىقتان جۇرگىزۋشىنىڭ كىم ەكەنى، قۇجاتى قالاي تەكسەرىلەتىنى، جول ۇستىندەگى قاۋىپتى جاعدايلارعا سەرۆيس قالاي ارەكەت ەتەتىنى ءبىرىنشى كۇننەن باستاپ ماڭىزدى.

وسى ورايدا ءبىز Qajet-كە تىركەلۋ ءتارتىبىن بايقاپ كوردىك. جاساندى تۇردە دايىندالعان جەكە كۋالىك پەن جارامسىز جۇرگىزۋشى كۋالىگىن جۇيەگە جۇكتەۋ مۇمكىن بولدى. قوسىمشا قۇجاتتاردى باستاپقى كەزەڭدە قابىلدادى. الايدا كەيىن ولاردىڭ تەكسەرۋدەن وتكەن-وتپەگەنىن جانە مۇنداي اككاۋنتتىڭ تاپسىرىس قابىلداۋعا جىبەرىلەر- جىبەرىلمەسىن انىقتاعان جوقپىز. سوندىقتان بۇل تاجىريبە جالعان قۇجاتپەن جۇرگىزۋشى بولىپ جۇمىس ىستەۋگە بولاتىنىن دالەلدەمەيدى.

Qajet-تىڭ رەسمي شارتىندا جۇرگىزۋشى قۇجاتتارىن كومپانيا قىزمەتكەرى تەكسەرەتىنى جازىلعان. الايدا تەكسەرۋ كەزىندە قۇجاتتىڭ ءتۇپنۇسقالىعى قالاي انىقتالاتىنى، قانداي دەرەكقورلار پايدالانىلاتىنى جانە جالعان قۇجاتتى انىقتايتىن قانداي تەتىكتەر بار ەكەنى اشىق تۇسىندىرىلمەگەن. بۇل سۇراقتاردىڭ جاۋابى جولاۋشى ءۇشىن اسا ماڭىزدى.

بۇدان بولەك، سەرۆيستىڭ قۇقىقتىق قۇجاتتارىنا قاتىستى دا كۇمان تۋدىراتىن جايتتار بار. Qajet-تىڭ 16-قازاندا جاريالانعان قۇپيالىلىق ساياساتىندا كومپانيانىڭ اتاۋى مەن بيزنەس- سايكەستەندىرۋ ءنومىرى كورسەتىلگەنىمەن، دەربەس دەرەكتەردى وڭدەۋگە جاۋاپتى ادامنىڭ اتى-ءجونى، حوستينگ پەن تولەم قىزمەتىن ۇسىناتىن ۇيىمداردىڭ اتاۋى ءالى تولىق جازىلماعان. ءتىپتى ماتىندە 2 گيس سۇراۋلارىنىڭ قاي جەردە وڭدەلەتىنىن انىقتاۋعا ارنالعان زاڭگەردىڭ قىزمەتتىك ەسكەرتپەسى ساقتالىپ قالعان.

بۇل دەرەكتەردىڭ تارالىپ كەتكەنىن نەمەسە كومپانيانىڭ ولاردى زاڭسىز وڭدەپ جاتقانىن بىلدىرمەيدى. ءبىراق جەكە قۇجاتتارىن، تەلەفون ءنومىرىن، جۇرگەن باعىتى مەن تولەم مالىمەتتەرىن سەنىپ تاپسىراتىن ادام ءۇشىن مۇنداي ولقىلىقتاردىڭ ءوزى الاڭداتارلىق.

كومپانيانىڭ جاريا قۇجاتتارىندا جۇرگىزۋشى قۇجاتتارىن اۆتوماتتى تۇردە تانۋ ءۇشىن، بولەك كەلىسىم بەرىلگەن جاعدايدا، امەريكالىق Anthropic كومپانياسىنىڭ Claude تەحنولوگياسى قولدانىلۋى مۇمكىن ەكەنى دە كورسەتىلگەن. كەيىن دەرەكتەردى كومپانيا قىزمەتكەرى تەكسەرۋگە ءتيىس. دەمەك، ماسەلە جاساندى ينتەللەكتىنى پايدالانۋدا ەمەس، جەكە مالىمەتتەردىڭ قورعالۋىنا كىم جانە قالاي كەپىلدىك بەرەتىنىنە كەلىپ تىرەلەدى.

سەرۆيستىڭ قولداۋ قىزمەتىنە قاتىستى دا تۇسىنىكسىز جايت بار. Qajet-تىڭ رەسمي سايتىندا WhatsApp ارقىلى حابارلاسۋعا ارنالعان 77077109398+ ءنومىرى كورسەتىلگەن. ال قۇپيالىلىق ساياساتىندا جانە پايدالانۋشى كەلىسىمىندە مۇلدە باسقا ءنومىر - 77066196091+ جازىلعان. ارينە، كومپانيانىڭ بىرنەشە بايلانىس ءنومىرى بولۋى مۇمكىن. ءبىراق ولاردىڭ قايسىسىنا قانداي جاعدايدا حابارلاسۋ كەرەكتىگى تۇسىندىرىلمەگەن. جولاۋشى جۇرگىزۋشىمەن كەلىسپەي قالسا، تولەمگە قاتىستى داۋ تۋسا نەمەسە جول ۇستىندە شۇعىل كومەك قاجەت بولسا، قاي نومىرگە جۇگىنگەنى دۇرىس؟ تاكسي قىزمەتىندە مۇنداي اقپارات ەكىۇشتى بولماۋعا ءتيىس.

تاعى ءبىر نازار اۋداراتىن ماسەلە - پايدالانۋشىلاردىڭ قوزعالىسى تۋرالى جينالاتىن مالىمەتتەر. Qajet-تىڭ قۇپيالىلىق ساياساتىندا جۇرگىزۋشى جۇمىسقا شىققان كەزدە ونىڭ ورنالاسقان جەرى، قوزعالىس باعىتى مەن جىلدامدىعى ءار 3-5 سەكۋند سايىن تىركەلەتىنى جازىلعان. ساپار كەزىندەگى قوزعالىس تاريحى ءبىر جىل، ال تاپسىرىسسىز جۇمىس ىستەگەن ۋاقىتتاعى قوزعالىس تاريحى ءۇش اي ساقتالادى. دەمەك، سەرۆيس كولىكتىڭ جىلدامدىعى مەن قوزعالىسىن باقىلاۋعا قاجەتتى دەرەكتەردى جيناۋدى قاراستىرعان. ءبىراق ولاردىڭ قاۋىپتى جۇرگىزۋ ارەكەتتەرىن انىقتاۋ ءۇشىن قالاي پايدالانىلاتىنى قۇجاتتا ناقتى تۇسىندىرىلمەگەن. جولاۋشى ءۇشىن ەڭ ماڭىزدىسى دا وسى: قوسىمشا جۇرگىزۋشىنىڭ قايدا جۇرگەنىن ءبىلىپ قانا قويماي، قاۋىپ تونگەن جاعدايدا دەر كەزىندە ارەكەت ەتە الا ما؟

بۇگىن بىرنەشە ءجۇز نە بىرنەشە مىڭ تاپسىرىس ورىندايتىن جۇيە ەرتەڭ الدەقايدا كوپ ادامعا قىزمەت كورسەتۋى مۇمكىن. سول كەزدە تەحنيكالىق قاتەلىكتىڭ دە، قاۋىپسىزدىككە سالعىرت قاراۋدىڭ دا سالدارى اۋىرلاي تۇسەدى. سوندىقتان مۇنداي ماسەلەلەردى پايدالانۋشىلار كوبەيگەن سوڭ ەمەس، قازىردەن شەشكەن ءجون.

الەۋمەتتىك جەلىدەگى پىكىرلەردىڭ ءبارى Qajet-تىڭ ناشار جۇمىس ىستەيتىنىن دالەلدەمەيدى. جاڭا ءونىمنىڭ كەمشىلىگى بولۋى زاڭدى، ال العاشقى قيىندىقتاردى ەڭسەرۋگە ۋاقىت پەن قارجى قاجەت. دەگەنمەن ونى قولداۋعا شاقىرعان جۇرت تا، قوسىمشانى ۇسىنعان كاسىپكەرلەر دە ءبىر نارسەنى ەستەن شىعارماۋى كەرەك.

وتاندىق ونىمگە دەگەن ىقىلاس - ۇلكەن مۇمكىندىك. اسىرەسە شەتەلدىك كومپانيالار ۇستەمدىك قۇرعان نارىقتا جەرگىلىكتى باستامانىڭ قولداۋ تابۋى قۋانتادى. ءبىراق بۇل قولداۋ ساپاعا قويىلاتىن تالاپتى تومەندەتۋگە سەبەپ بولماۋى ءتيىس.

Qajet اينالاسىنداعى قىزۋ تالقىلاۋدا «قازاقتى قولدايىق» دەگەن ۇران ءجيى ەستىلەدى. قولدايىق. ءبىراق سول قازاقتىڭ جۇرگىزۋشىسى ەڭبەگىنە لايىق تابىس تاۋىپ، جولاۋشىسى ۋاقىتىندا جەتەتىن جەرىنە جەتىپ، ەكەۋىنىڭ دە قاۋىپسىزدىگى قامتاماسىز ەتىلۋى كەرەك ەمەس پە؟

ۇلتقا قىزمەت ەتۋدىڭ ەڭ جاقسى جولى - ۇلتتىڭ اتىمەن جارناما جاساۋ ەمەس، سول ۇلتتىڭ قاجەتىنە جارايتىن ساپالى ءونىم شىعارۋ. Qajet-تىڭ شىن باعاسىن الەۋمەتتىك جەلىدەگى ماقتاۋ ەمەس، كۇندەلىكتى ساپارلار كورسەتەدى.