«قاشاعاندا» مۇناي توگىلگەنى راستالسا، جوسپاردان تىس تەكسەرۋ جۇرگىزىلەدى
اتىراۋ. KAZINFORM -كاسپي تەڭىزىنىڭ قازاقستاندىق سەكتورىنداعى «قاشاعان» كەن ورنىندا مۇناي توگىلگەنى تۋرالى دەرەك ءالى راستالعان جوق. وسى دەرەك راستالسا، جوسپاردان تىس تەكسەرۋ جۇرگىزۋ كوزدەلىپ وتىر.
اتىراۋ وبلىسى بويىنشا ەكولوگيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، بۇگىن ارنايى توپ كاسپي تەڭىزىنىڭ قازاقستاندىق سەكتورىنا اۋەدەن شولۋ جاساۋعا اتتانعان.
«كەشە، 1-ساۋىردە «گلوبۋس» ەكولوگيالىق-قۇقىقتىق باستامالار ورتالىعىنىڭ اتقارۋشى ديرەكتورى گالينا چەرنوۆا الەۋمەتتىك جەلىدە اقپارات جاريالادى. وسىعان بايلانىستى ارنايى توپ وقيعا ورنىنا شولۋ جۇرگىزۋ ءۇشىن تەڭىزگە اتتانىپ كەتتى. مۇنايدىڭ توگىلگەنى راستالسا، ەكولوگيا دەپارتامەنتى NCOC كومپانياسىنا جوسپاردان تىس تەكسەرۋ جۇرگىزەدى»، - دەپ حابارلادى دەپارتامەنتتىڭ باسپا ءسوز قىزمەتى.
كاسپي تەڭىزىنە شولۋ جۇرگىزۋگە اتتانعان توپ قۇرامىندا ەكولوگيا دەپارتامەنتىنىڭ باسشىسى الىبەك بەكمۇحامەتوۆ، اتىراۋ وبلىسىنىڭ مامانداندىرىلعان تابيعات قورعاۋ پروكۋرورى ەركەبۇلان ەرمەكوۆ، ت ج م ونەركاسىپتىك قاۋىپسىك كوميتەتى اتىراۋ وبلىستىق دەپارتامەنتىنىڭ ءبولىم باسشىسى نۇرلان اليەۆ پەن تەحنيك-لابورانت باۋبەك الدەشيەۆ بار.
ەسكە سالا كەتەلىك، كاسپي تەڭىزىندەگى قاشاعان كەن ورنى اۋدانىندا مۇنايدىڭ توگىلۋ فاكتىلەرى بويىنشا مۇناي ءوندىرۋ ورنىندا كوزبەن شولىپ قاراۋ جانە سىناما الۋ ءۇشىن تەڭىزگە شىعۋدى ۇيىمداستىرادى.
ەسكە سالا كەتەلىك، بۇعان دەيىن «قاشاعاننان» مۇناي وندىرەتىن NCOC كومپانياسى 12,4 ميلليارد تەڭگە ايىپپۇل تولەگەنىن جازعان ەدىك.
بۇگىن كاسپي تەڭىزىندەگى «قاشاعان» كەن ورنىندا مۇناي توگىلۋى مۇمكىن ەكەنىن حابارلاعان بولاتىنبىز.
