قانشا قازاقستاندىق الەۋمەتتىك تولەمدەردەن ءوز ەركىمەن باس تارتتى

استانا. قازاقپارات - 2026-جىلدىڭ قازان ايىنان بەرى 831 قازاقستاندىق الەۋمەتتىك تولەمدەردەن ەرىكتى تۇردە باس تارتۋ سەرۆيسىن پايدالانعان. بۇل قىزمەت ءال-اۋقاتى جوعارى جانە اۋقاتتى وتباسىلار ساناتىنا جاتاتىن ازاماتتارعا ارنالعان.

Еңбек министрлігі әлеуметтік төлемдерден ерікті түрде бас тарту сервисінің жұмыс тәртібін түсіндіреді
Фото: Еңбек және халықты әлеуметтік қорғау министрлігі

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، الەۋمەتتىك تولەمدەردەن باس تارتۋ - ازاماتتىڭ ءوز ەركىمەن قابىلدايتىن شەشىمى. مۇنداي تەتىك مەملەكەتتىك كومەكتى وعان شىن مۇقتاج ادامدارعا باعىتتاۋعا مۇمكىندىك بەرەدى.

سەرۆيس eGov Mobile موبيلدى قوسىمشاسى مەن eGov.kz پورتالىندا قولجەتىمدى. ءوتىنىشتى مەملەكەتتىك ورگاندارعا بارماي-اق، ونلاين تۇردە ءۇش قاداممەن بەرۋگە بولادى.

ولءۇشىن ازامات:

eGov Mobile قوسىمشاسىنا نەمەسە eGov.kz پورتالىنا اۆتوريزاتسيادان ءوتۋى كەرەك؛

الىناتىن جاردەماقىلار تىزىمىنەن باس تارتقىسى كەلەتىن تولەم ءتۇرىن تاڭداپ، ءوتىنىشتى قول قويۋ ارقىلى جىبەرۋى قاجەت؛

قابىلداعان شەشىمىن قايتا راستاۋى ءتيىس.

سوڭعى راستاۋعا دەيىن ءوتىنىشتى كەرى قايتارىپ الۋعا بولادى. سونداي-اق ازامات كەيىن الەۋمەتتىك تولەم الۋ ءۇشىن قايتا ءوتىنىش بەرۋگە قۇقىلى. مۇنداي ءوتىنىش زاڭنامادا بەلگىلەنگەن تارتىپپەن قارالادى.

ەسكە سالايىق، 2027-جىلعى 11-قاڭتاردان باستاپ الەۋمەتتىك جاردەماقىنىڭ 36 ءتۇرىنىڭ 12 ءسىن تاعايىنداۋ كەزىندە وتباسىنىڭ ءال-اۋقات دەڭگەيى پيلوتتىق رەجيمدە ەسكەرىلەدى.

وتباسىنىڭ ءال-اۋقات دەڭگەيىن الدىن الا eGov Mobile قوسىمشاسىنداعى «الەۋمەتتىك كومەك الۋشىنى انىقتاۋ كالكۋلياتورى» ارقىلى بىلۋگە بولادى. الايدا ەسەپتەۋ ناتيجەسى تەك انىقتامالىق سيپاتقا يە.

مينيسترلىك ازاماتتاردى سەرۆيستى تەك رەسمي eGov Mobile قوسىمشاسى مەن eGov.kz پورتالى ارقىلى پايدالانۋعا جانە كۇماندى سىلتەمەلەرگە وتپەۋگە شاقىردى.

ەسكە سالايىق، بۇعان دەيىن ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك تولەمدەردەن قالاي ەرىكتى تۇردە باس تارتۋعا بولاتىنىن تۇسىندىرگەن ەدى.