قادىر مىرزاليەۆتىڭ نەمەرەسى قىزىلوردادا باتىرلار مەن بيلەردىڭ سۋرەتىن سالدى
قىزىلوردا. KAZINFORM - قىزىلورداداعى تاۋەلسىزدىككە 25 جىل داڭعىلىنىڭ بويىندا قازاقتىڭ باتىرلارى مەن بي- شەشەندەرى بەينەلەنگەن كورنەكى كارتينالار تىزبەگى پايدا بولدى.
بيىل قالاداعى ۇلكەن داڭعىل قايتا جاڭعىرتىلىپ جاتىر. سۋرەت سالۋ جوبادا قارالماعان بولسا دا دەمەۋشى ەسەبىنەن كوز قۋانتارلىق ءىس جاسالدى.
وعان الماتىدان اعايىندى سۋرەتشىلەر مۇحيت مىرزاليەۆ، گلەب اقانايەۆ جانە سەرافيم يۆاشينين تارتىلدى.
- تاپسىرىس بەرۋشىنىڭ تىلەگىنە بايلانىستى ءجالاڭتوس ءباھادۇر، بايمۇرات، كەلمەنبەت، الپامىس، بۇقارباي، قوبىلاندى باتىرلاردىڭ سۋرەتىن سالدىق. ودان بولەك، گرافيتي ستيلىندە قازىبەك، ايتەكە جانە تولە بيلەر، قورقىت اتانىڭ قوبىز تارتىپ وتىرعان ءساتى بەينەلەنگەن. سۋرەتتى كوشەدەن كورگەن سوڭ بالالار مەن جاستاردا «بۇلار كىم؟» دەگەن سۇراق تۋىپ، ىزدەنۋى مۇمكىن. سولاردىڭ قىزىعىشۋلىعىن ارتتىرۋ ءۇشىن اشىق، جارقىن تۇستەردى پايدالاندىق، - دەدى مۇحيت مىرزاليەۆ.
سۋرەتشى جۇمىس بارىسى تۋرالى ەگجەي-تەگجەي ايتىپ بەردى.
- 200 شارشى مەتر اۋماق، اۋقىمدى جۇمىس. نەگىزى ەكى اپتاداي ۋاقىت جەتەتىن. ءبىراق بىرەسە قاتتى جەل سوعىپ، بىرەسە جاڭبىر جاۋىپ بوگەت بولدى. قوسىمشا قۇرىلىس تا قول بايلاپ، جۇمىستى قويا تۇرۋعا تۋرا كەلدى. سونىمەن جوبا ءۇش اپتاعا سوزىلدى. سۋرەت سالۋ كەزىندە امەريكالىق ستاندارتقا ساي كەلەتىن اەروزولدى بوياۋ پايدالاندىق. ەرەكشەلىگى، ول ىستىققا دا، سۋىققا دا توزىمدى. ادەتتە زاۋىت ءونىم ساپاسى ءۇشىن 5 جىلعا كەپىلدىك بەرەدى. ءبىراق ودان دا ۇزاققا شىدايتىنىنا جەكە تاجىريبەمدە كوز جەتكىزگەنمىن. مىسالى، الماتىداعى ءوزىم تۇراتىن ءۇيدىڭ قابىرعاسىنداعى سۋرەتتىڭ سول كۇيى تۇرعانىنا 12 جىلدان استى، - دەدى ول.
مۇحيت مىرزاليەۆتىڭ قوس اتاسى - قازاق ادەبيەتى مەن كوركەمسۋرەت ونەرىنىڭ كورنەكتى وكىلدەرى. ءوز اتاسى - اقىن، قازاقستاننىڭ حالىق جازۋشىسى قادىر مىرزاليەۆ بولسا، ناعاشى اتاسى - كەسكىندەمەشى، قازاقستاننىڭ ەڭبەك سىڭىرگەن قايراتكەرى اماندوس اقانايەۆ. سۋرەتشىلىك وعان ناعاشى جۇرتىنان دارىسا كەرەك. ءبىر سوزبەن ايتساق، سۋرەتشىلەر اۋلەتى. ءوزى - گرافيتي جانە مۋرال ونەرىنىڭ شەبەرى. تۋىندىلارىنىڭ كوبى الماتىنىڭ تورىندە تۇر.
جۋىردا س. ايتبايەۆ اتىنداعى قىزىلوردا كوركەمسۋرەت گالەرەياسىنىڭ قورىنداعى كارتينالاردىڭ بىرىنە جاساندى ينتەللەكت جان ءبىتىردى.
