قانداي ماماندار سۇرانىسقا يە؟

2025-جىلى Enbek.kz پورتالىندا سۇرانىسقا يە ماماندىقتار بويىنشا 9 مىڭنان استام بوس جۇمىس ورنى جاريالانعان.

سۇرانىسقا يە ماماندىقتار

Enbek.kz پورتالى بىرنەشە ماماندىق تۋرالى مالىمەت جاريالاعان. مىسالى، بەلگىلى ءبىر ماماندىقتا 500 گە جۋىق بوس جۇمىس ورنى بار دەسەك، سوعان نەبارى 100 تۇيىندەمە تۇسكەن.

اكۋشەر-گينەكولوگ ماماندىعى - 469 بوس ورىنعا 100 تۇيىندەمە؛

پەدياتر ماماندىعى - 448 ۆاكانسياعا 139 تۇيىندەمە؛

انەستەزيولوگ-رەانيماتولوگ - 300 بوس ورىنعا 75 تۇيىندەمە عانا تىركەلگەن.

ونكولوگ، نەوناتولوگ جانە ەندوكرينولوگ ماماندارىنا دا سۇرانىس جوعارى.

وعان قوسا، مينيسترلىك 2026-جىلدىڭ باسىنان بەرى ءبىرقاتار ماماندىقتار بويىنشا كادر تاپشى ەكەنىن العا تارتادى. اقپاراتتىق تەحنولوگيالار سالاسىنداعى ماماندارعا دا قاجەتتىلىك ارتىپ وتىر.

سونىڭ ىشىندە:

قولدانبالى باعدارلاماشىلار (509 ۆاكانسيا)

گرافيكالىق ديزاينەرلەر (355 بوس جۇمىس ورنى)

ەڭبەك شارتتارىن ەسەپكە الۋدىڭ ءبىرىڭعاي جۇيەسىنىڭ دەرەكتەرىنە سايكەس، سۇرانىسقا يە ماماندىقتار بويىنشا 45 مىڭنان استام ەڭبەك شارتى جاسالعان. ونىڭ ىشىندە باعدارلامالىق قامتاماسىز ەتۋ ازىرلەۋشىلەرى شامامەن 8 مىڭ، اكۋشەر-گينەكولوگتار - 4,6 مىڭ، پەدياترلار - 4,1 مىڭ جانە قولدانبالى باعدارلاماشىلار 3,5 مىڭ ەڭبەك شارتىنا قول قويعان.

كادر تاپشىلىعىن قالاي شەشەمىز؟

ەلدە بىلىكتى كادرلاردى تارتۋ ماقساتىندا شەتەلدىك مامانداردى جۇمىسقا ورنالاستىرۋدىڭ جەڭىلدەتىلگەن ءتارتىبى قولدانىلادى. اتالعان تىزىمگە سۇرانىسقا يە 50 دەن استام ماماندىق ەنگىزىلگەن. ولاردىڭ قاتارىندا اقپاراتتىق تەحنولوگيالار، دەنساۋلىق ساقتاۋ، ينجەنەريا جانە كرەاتيۆتى يندۋستريا سالالارىنداعى جوعارى بىلىكتى ماماندار بار.

تىزىمگە ەنگىزىلگەن ماماندىقتار بويىنشا شەتەلدىك جوعارى بىلىكتى كادرلارعا قازاقستاندا تۇراقتى تۇرۋعا رۇقسات الۋ مۇمكىندىگى بەرىلەدى. بۇل تەتىك باسىم باعىتتارعا قاجەتتى مامانداردى تارتۋدى كوزدەيدى.

شەتەلدىك جۇمىسكەرلەرمەن 55 ەڭبەك شارتى راسىمدەلگەن. ولاردىڭ باسىم بولىگى اۆتوماتتاندىرۋ ينجەنەرى ماماندىعىنا تيەسىلى، - دەلىنگەن مينيسترلىك حابارلاماسىندا.

سالىستىرمالى تۇردە العاندا، 2025-جىلى Enbek.kz پورتالىندا سۇرانىسقا يە ماماندىقتار بويىنشا 9 مىڭنان استام بوس جۇمىس ورنى جاريالانعان. مەديتسينا سالاسىنىڭ ماماندارى ءداستۇرلى تۇردە جوعارى سۇرانىسقا يە بولىپ وتىر.

جالپى، كەلتىرىلگەن دەرەكتەر ىشكى ەڭبەك نارىعى سۇرانىسقا يە ماماندىقتاردىڭ باسىم بولىگى بويىنشا قاجەتتىلىكتى قامتاماسىز ەتىپ وتىرعانىن كورسەتەدى. دەگەنمەن دەنساۋلىق ساقتاۋ سالاسىندا كادر تاپشىلىعى ءالى دە وزەكتى بولىپ قالىپ وتىر.