قانات يسلام: كاسىپقوي بوكستان اقشا تاۋىپ كورگەن ەمەسپىن، كەيدە جەكپە-جەك ءۇشىن ءوزىم اقشا تولەدىم

استانا. KAZINFORM - بەلگىلى بوكسشى، بۇگىندە ەلىمىزدىڭ جاسوسپىرىمدەر قۇراماسىندا ۇيلەستىرۋشى قىزمەتىن اتقاراتىن قانات يسلاممەن اقتاۋ قالاسىندا وتكەن جاسوسپىرىمدەر اراسىنداعى قازاقستان چەمپيوناتىنان كەيىن سۇحباتتاسقان ەدىك. اڭگىمە بارىسىندا ول جاس بوكسشىلاردى دايارلاۋ جۇيەسى، باپكەرلەردىڭ جاۋاپكەرشىلىگى، كاسىپقوي بوكستىڭ ماسەلەلەرى جانە قازاق سپورتىنىڭ بولاشاعى تۋرالى ويىمەن ءبولىستى.

Қанат Ислам
Фото: Kazinform

- قانات مىرزا، جاسوسپىرىمدەر بوكسىنىڭ دامۋىنا ۇلەس قوسىپ جۇرگەنىڭىزگە ءبىراز ۋاقىت بولدى. جاڭا قىزمەتىڭىز قالاي باستالدى؟

- قازىر فەدەراتسياعا جۇمىسقا كىرىسكەننەن كەيىن جاۋاپكەرشىلىگىمىز دە بىرتىندەپ ارتىپ كەلەدى. مەن اۋەسقوي بوكستا 20 -جىلداي ءجۇرىپ، كەيىنگى 15 جىلىمدى كاسىپقوي بوكسقا ارنادىم. وليمپياداعا قاتىسىپ، ۇلكەن جارىستاردا جەڭىسكە جەتسەم دە، ءالى دە ۇيرەنەتىن نارسە كوپ ەكەنىن ءتۇسىندىم. بوكس - تەرەڭىنە ۇڭىلگەن سايىن جاڭا قىرلارى اشىلا بەرەتىن ونەر.

كاسىپقوي بوكسقا بارعان كەزدە وسىنى انىق سەزىندىم. بۇرىن ءوزىمدى كوپ نارسەنى بىلەمىن دەپ ويلايتىنمىن. الايدا، قايتادان ۇيرەنۋ كەرەك بولدى. ىشىمىزدەگى «ءبارىن بىلەمىن» دەگەن ويدان ارىلىپ، بىلمەيتىن ادامداي ىزدەنۋگە كىرىستىك.

امەريكادا ۇزاق جىل ءجۇرىپ، تالاي قيىندىقتى باستان وتكەردىم. سول كەزدە ماعان باعىت-باعدار بەرىپ، دۇرىس كەڭەس ايتاتىن ادام بولعاندا، بۇدان دا كوپ جەتىستىككە جەتەر مە ەدىم دەپ ويلايمىن. سوندىقتان قازىر جاستارعا ءوز تاجىريبەممەن ءبولىسىپ، ولاردىڭ ارتىق قاتەلىككە ۇرىنباۋىنا كومەكتەسكىم كەلەدى.

- جاسوسپىرىمدەر بوكسىندا قانداي ماسەلەلەرگە ەرەكشە نازار اۋدارۋ كەرەك دەپ ويلايسىز؟

- ەڭ باستىسى - بالانى ەرتە شارشاتىپ، سپورتتان سۋىتىپ الماۋىمىز كەرەك. قازىر جاسوسپىرىمدەر مەن جاستاردى ءبىر ايلىق وقۋ-جاتتىعۋ جيىنىنا الىپ، دايىندىقتى بىردەن كۇشەيتىپ جىبەرەتىن جاعدايلار كەزدەسەدى. ال بالانىڭ بۇرىنعى جاتتىعۋ ءتارتىبى مەن فيزيكالىق مۇمكىندىگى ەسكەرىلە بەرمەيدى.

مىسالى، ۇيىندە كۇنىنە ءبىر رەت جاتتىعىپ جۇرگەن بالانى بىردەن كۇنىنە ەكى مارتە جاتتىقتىرساڭىز، ول شارشاي باستايدى. ول ءالى جاس ءوسپىرىم عوي. بۇگىن بايقالماعان شارشاۋ ەرتەڭ ەرەسەكتەر قاتارىنا وتكەندە كەرى اسەرىن تيگىزۋى مۇمكىن. جاراقات الىپ، سپورتتان ەرتە كەتىپ قالۋى دا ىقتيمال. سوندىقتان باپكەر ءار بالانىڭ مىنەزىن، مۇمكىندىگىن، فيزيكالىق جاعدايىن ءبىلۋى كەرەك. بىرەۋدىڭ جاتتىعۋ ءتاسىلىن نەمەسە ينتەرنەتتەن كورگەن ءادىستى سول كۇيىندە قايتالاي بەرۋگە بولمايدى. ءار بالانىڭ وزىنە قاجەتتى دايىندىق جۇيەسى بولۋى ءتيىس. بالا وبلىس چەمپيونى اتاندى ەكەن دەپ، ونى ودان ءارى ارتىق جاتتىقتىرىپ، مۇمكىندىگىنەن تىس كۇش ءتۇسىرۋ دۇرىس ەمەس. بىزگە كەرەگى - سپورتشىنى بۇگىنگى جارىستا جەڭىمپاز ەتۋ عانا ەمەس، ونى ەرتەڭ ەرەسەكتەر اراسىندا دا بيىك ناتيجەگە جەتكىزۋ.

- ءسىز باپكەرلەرمەن سەمينار وتكىزىپ، وسى ماسەلەلەردى دە كوتەرگەن ەكەنسىز. ءوز تاجىريبەڭىزدە كىمدەردەن ءتالىم الدىڭىز؟

- مەن كەزىندە قازاق بوكسىنىڭ مىقتى ماماندارىنان ءتالىم الدىم. عالىم كەنجەبايەۆ، دامير بۋدانبەكوۆ، نۇرعالي سافيۋللين، نۇرجان سمانوۆ، مىرزاعالي ايتجانوۆ سەكىلدى اعالارىمىزدىڭ تاربيەسىن كوردىم. دامير اعاي مەنىڭ العاشقى ۇستازدارىمنىڭ ءبىرى بولدى. وسىنداي بىلىكتى مامانداردان ۇيرەنگەننەن كەيىن ءوزىمدى كوپ نارسەنى بىلەمىن دەپ ويلاعان كەزدەرىم دە بولدى. ءبىراق كاسىپقوي بوكسقا بارعان سوڭ قايتادان ىزدەنۋگە تۋرا كەلدى. سول سەبەپتى قازىر باپكەرلەرگە دە ۇنەمى ۇيرەنۋ، ىزدەنۋ كەرەكتىگىن ايتامىن. ءبىر ءادىستى عانا دۇرىس دەپ قابىلداپ، سوعان بايلانىپ قالۋعا بولمايدى. بۇگىنگى سەميناردا دا وسىنى ايتتىم. باپكەر ءوز تاربيەلەنۋشىسىن جاقسى تانۋى كەرەك. بالانىڭ قانداي جاتتىعۋعا قابىلەتتى ەكەنىن، قاي كەزدە دەمالىس قاجەت ەكەنىن ءوزى سەزىنۋى ءتيىس.

- سپورتشىلاردى دايارلاۋدا مەديتسينالىق قولداۋ مەن سپورت عىلىمىنىڭ ماڭىزى قانداي؟

- بۇل - قازىر وتە وزەكتى ماسەلە. ءبىزدىڭ سپورت سالاسىنا بىلىكتى ماماندار اۋاداي قاجەت. اسىرەسە سپورت مەديتسيناسى، جاراقاتتان كەيىنگى قالپىنا كەلۋ، دارۋمەندەرمەن قامتاماسىز ەتۋ باعىتتارىندا ءبىلىمدى ماماندار جەتىسپەيدى. مەن سوڭعى 10-15 جىلدا امەريكادا ۇزاق ۋاقىت وتكىزدىم. وندا سپورتشىلاردىڭ قالپىنا كەلۋىنە، دۇرىس تاماقتانۋىنا، اعزانى قاجەتتى دارۋمەندەرمەن قامتاماسىز ەتۋگە ۇلكەن ءمان بەرەدى. ال بىزدە بۇل باعىتتاعى ءبىلىم جەتكىلىكسىز. كەيدە دارۋمەن قابىلداۋدىڭ ءوزى دوپينگ ماسەلەسىمەن شاتاستىرىلىپ جاتادى.

سوندىقتان ءار سپورتشى نە ىشۋگە، نە جەۋگە بولاتىنىن، قانداي پرەپاراتتاردىڭ رۇقسات ەتىلگەنىن ءبىلۋى كەرەك. قازىر ءتۇرلى سپورت تۇرلەرىندە دوپينگكە قاتىستى جاعدايلاردىڭ كەزدەسۋى دە بىلىمسىزدىكتەن تۋىندايدى دەپ ويلايمىن. وسى باعىتتا سپورتشىلارعا، باپكەرلەرگە جانە ۇلتتىق قۇراماعا شاقىرىلعان ءاربىر بالاعا ارنايى ءتۇسىندىرۋ جۇمىستارى جۇرگىزىلۋى قاجەت. سپورتتاعى مامانداردى دايارلاۋعا باسا نازار اۋدارۋىمىز كەرەك.

- اقتاۋداعى قازاقستان چەمپيوناتىندا ونەر كورسەتىپ جاتقان جاس بوكسشىلاردىڭ دەڭگەيىنە قانداي باعا بەرەسىز؟

- جارىس وتە جوعارى دەڭگەيدە ۇيىمداستىرىلعان. تورەشىلەردىڭ جۇمىسىنا دا، سپورتشىلاردىڭ دايىندىعىنا دا نازار اۋدارىپ وتىرمىن. جاقسى بوكسشىلار كوپ. ءار سالماقتا بولاشاعىنان ءۇمىت كۇتتىرەتىن جىگىتتەر بار. اسىرەسە جەتىسۋ وبلىسىنىڭ 81 كەلىدەن جوعارى سالماقتاعى ايبىن ەسىمدى بوكسشىسىنىڭ ونەرىنە نازار اۋداردىم. ودان ۇلكەن ءۇمىت كۇتەمىن. دەگەنمەن ەشكىمدى ءبولىپ-جارعىم كەلمەيدى، باسقا سالماقتاردا دا جاقسى سپورتشىلار جەتەرلىك.

ءبىزدىڭ ماقساتىمىز - جارىستا ادىلدىك بولۋى، مىقتىنىڭ جەڭىسكە جەتۋى. ەشكىم شەتتەتىلمەۋى كەرەك. سول سەبەپتى ءوزىم دە جارىستى سىرتتاي باقىلاپ، جاس سپورتشىلاردىڭ ونەرىنە نازار اۋدارىپ ءجۇرمىن. بولاشاعىنان ءۇمىت كۇتتىرەتىن بالالاردىڭ باپكەرلەرىمەن سويلەسىپ، ولارعا الداعى ۋاقىتتا قالاي دايىندالۋ كەرەكتىگى جونىندە كەڭەس بەرگىمىز كەلەدى. جاس كەزىندە بالانى شامادان تىس جۇكتەمەمەن قيناۋعا بولمايدى. قاجەتتى جارىسقا قاتىستىرىپ، قاجەت ەمەس كەزدە دەمالدىرا ءبىلۋ كەرەك.

- الداعى ۋاقىتتا ۇلتتىق قۇراما جۇمىسىنا ارالاسۋ جوسپارىڭىز بار ما؟

- ءيا، ۇلتتىق قۇرامادا دا جۇمىس ىستەۋ نيەتىم بار. قازىر ايبەك، نۇربەك، ورالباي سەكىلدى جىگىتتەرمەن دە سويلەسىپ ءجۇرمىن. ولارعا قازىرگى قالىپتاسقان ستاندارتتى جاتتىعۋلارمەن عانا وليمپياداعا دايىندالۋ قيىن ەكەنىن ايتامىن. ءار بوكسشى ءوزىنىڭ كەمشىلىگى مەن ارتىقشىلىعىن جاقسى ءبىلۋى كەرەك. سوعان قاراي جەكە دايىندىق جۇيەسىن قالىپتاستىرۋ قاجەت. جاتتامالى جاتتىعۋلارمەن شەكتەلمەي، وزىڭە نە كەرەگىن ءتۇسىنۋ ماڭىزدى. سوندا عانا ءوسۋ بولادى. ءبىزدىڭ مامان رەتىندەگى مىندەتىمىز - وسى جىگىتتەردىڭ الەۋەتىن اشۋعا كومەكتەسۋ. ەگەر ەلىمىزدەن جاڭا چەمپيوندار شىعىپ، قازاقتىڭ تۋىن بيىككە كوتەرسە، سول جولعا از دا بولسا ۇلەس قوسقانىمىزعا قۋانامىز.

- جاسوسپىرىمدەر قۇراماسىنىڭ الداعى جارىستارعا دايىندىعى قالاي جۇرگىزىلۋى مۇمكىن؟

- قازىر جاستار قۇراماسىندا جۇرگەن ءبىرقاتار سپورتشى ەرەسەكتەر قاتارىنا وتەدى. ولاردىڭ ورنىنا بۇگىنگى جاسوسپىرىمدەر بارادى. سوندىقتان الداعى وقۋ- جاتتىعۋ جيىندارى مەن حالىقارالىق جارىستاردىڭ جوسپارى جاسالعان.

بۇل جەردە ءبىز سەكىلدى مامانداردىڭ باس باپكەرلەرمەن بىرلەسە جۇمىس ىستەۋى ماڭىزدى. ويتكەنى بالا قازىر قانشا جاتتىقسا دا، شارشاعانىن بىردەن سەزبەۋى مۇمكىن. ءبىراق ۋاقىت وتە كەلە اعزاسىنا سالماق ءتۇسىپ، جاراقات الۋى ىقتيمال. سونىڭ سالدارىنان سپورتتان ەرتە كەتىپ قالۋى مۇمكىن. جاس ءوسپىرىمدى ەرەسەكتەر قاتارىنا جەتكىزۋ ۇلكەن ءبىلىم مەن جاۋاپكەرشىلىكتى تالاپ ەتەدى. سوندىقتان باپكەرلەرگە قويىلاتىن تالاپ تا جوعارى بولۋى كەرەك.

- قازىر افريكا قۇرلىعىنداعى داكار قالاسىندا جاسوسپىرىمدەر وليمپياداسى ءوتىپ جاتىر. قازاقستان قۇراماسىنىڭ دايىندىعىنا قاتىستى جۇمىستارىڭىز بولدى ما؟

- ءيا، مەن باقىت سارسەكبايەۆپەن بىرگە جاستار قۇراماسىندا قىزمەت اتقارامىن. بۇل جارىسقا كىم مىقتى، سول سپورتشىلار باردى. ءوزىم دە مامان، بوكسشى ءارى باپكەر رەتىندە باقىت سارسەكبايەۆتىڭ شەشىمىن قولدايمىن. بۇيىرسا، جىگىتتەرىمىز ول جاقتان جاقسى ناتيجەمەن ورالادى دەپ سەنەمىن.

- كاسىپقوي بوكستاعى مانسابىڭىزدى اياقتاعاننان كەيىن نەمەن اينالىستىڭىز؟

- قازىر التى بالانىڭ اكەسىمىن. بۇل دا ۇلكەن جاۋاپكەرشىلىك. كاسىپقوي بوكستاعى مانسابىمنان كەيىن Qazaq Promotion جوباسىن باستادىق. ءبىزدىڭ ماقساتىمىز - كاسىپقوي بوكستى تەك ءبىر وبلىستىڭ نەمەسە بەلگىلى ءبىر ورتانىڭ دەڭگەيىندە قالدىرماي، ۇلتتىق دەڭگەيگە كوتەرۋ ەدى. قازاق دەگەن اتپەن شىعىپ، ەلىمىزدىڭ تۋىن شەتەلدە كوتەرسەك دەگەن نيەت بولدى. سونىڭ ارقاسىندا قازاقتىڭ اتىنان ونەر كورسەتىپ جۇرگەن تالاي جىگىت شىقتى. قازاق ستيلىمەن، قازاقتىڭ رۋحىمەن رينگكە كوتەرىلگەن بوكسشىلار امەريكادا ەلىمىزدىڭ اتىن تانىتىپ ءجۇر. بۇل - ءبىز ءۇشىن ۇلكەن قۋانىش. اتا-بابالارىمىز اتقا قونعاندا دا قازاقتىڭ اتىنان شىققان. سوندىقتان سپورتتا دا وبلىسقا، وڭىرگە بولىنبەي، ۇلتتىق دەڭگەيدە بىرىگۋىمىز كەرەك دەپ ويلادىم. وسى نيەتپەن كوپتەگەن جىگىتتەرگە كاسىپقوي بوكستا جارىس ۇيىمداستىرىپ بەردىك.

- كاسىپقوي بوكستا جۇرگەن سپورتشىلارعا قولداۋ جەتكىلىكتى مە؟

- شىنىن ايتسام، كاسىپقوي بوكستا جۇرگەن كەزىمدە مەملەكەتتىك دەڭگەيدە جۇيەلى قولداۋ بولعان جوق. ءوزىم دە تالاي جەرگە بارىپ، كومەك سۇراپ ءجۇردىم. ءبىر جەرگە بارساڭ، ەكىنشى ادامعا سىلتەيدى. بيلىككە بارساڭ، كاسىپقوي سپورت ءبىزدىڭ مەملەكەتتە قاراستىرىلمايدى دەگەن جاۋاپ ەستيسىڭ. ال سپورتشى چەمپيون بولعان كەزدە ءبارى ونى كۇتىپ الىپ، قۇرمەت كورسەتەدى.

مەن 2024 -جىلى مينيسترمەن كەزدەسكەندە دە وسى ماسەلەنى كوتەردىم. شەتەلدە قازاقتىڭ تۋىن كوتەرىپ جۇرگەن ون شاقتى جىگىت بار. سولارعا ارنايى جاعداي جاساپ، قولداۋ كورسەتۋگە بولادى عوي. ءبىر قور اشۋعا نەمەسە اي سايىنعى جاتتىعۋ شىعىندارىن، امەريكاعا بارىپ-كەلۋ جولاقىسىن، جارىس ۇيىمداستىرۋعا قاجەتتى قاراجاتتى قاراستىرۋعا بولادى.

2014 -جىلى «سامۇرىق-قازىنا» قورىنا كومەك سۇراپ بارعانىم دا بار. كوماندالىق سپورت تۇرلەرىنە قوماقتى قارجى بولىنەتىنىن كوردىم. ال جەكە سپورت تۇرلەرىنەن ساناۋلى عانا سپورتشى قولداۋ الىپ ءجۇردى. سول كەزدە مەن دە: «مەن توقالدان تۋعان جوقپىن عوي، مەن دە قازاقتىڭ بالاسىمىن. نەگە ماعان دا قولداۋ كورسەتىلمەيدى؟» دەپ ايتتىم.

قازىر دە كاسىپقوي بوكسشىلار وسىنداي جۇيەسىزدىكتىڭ سالدارىنان اركىمنەن كومەك سۇراپ جۇرۋگە ءماجبۇر. بىرەۋى ءبىر ازاماتقا، ەكىنشىسى باسقا ءبىر دەمەۋشىگە جۇگىنەدى. مۇنداي ماسەلەنى جۇيەلى تۇردە شەشۋ كەرەك.

- ءوزىڭىز كاسىپقوي بوكستان قارجىلاي پايدا كوردىڭىز بە؟

- شىنىمدى ايتسام، كاسىپقوي بوكستان اقشا تاۋىپ كورگەن ەمەسپىن. امەريكاعا بارعان كەزدە كەيبىر قارسىلاستار مەنىمەن جۇدىرىقتاسۋدان قورقاتىن. سول سەبەپتى كەيدە قارسىلاستارىمدى ءوزىم ىزدەپ، جەكپە-جەك وتكىزۋ ءۇشىن قارجى تولەۋگە تۋرا كەلدى.

2016 -جىلى قازاقستاندا 18 مىڭ ادام جينالعان ۇلكەن بوكس كەشىن ۇيىمداستىردىم. سونشا كورەرمەن كەلگەنىمەن، وزىمە بەس ميلليون تەڭگە عانا بۇيىردى. امەريكاداعى بوكستىڭ تابىسى تۇرعىسىنان قاراعاندا، بۇل وتە از اقشا.

ەكسپو كەزىندە دە جەكپە-جەگىم ءۇشىن 200 مىڭ دوللار گونورار الۋعا كەلىسكەن ەدىم. ءبىراق ءتۇرلى جاعدايلارعا بايلانىستى گونورارسىز رينگكە شىعۋعا تۋرا كەلدى. ول جارىسقا مينيسترلەر دە، مەملەكەت باسشىسى قاسىم-جومارت توقايەۆ تا كەلدى. بۇل مەن ءۇشىن ۇلكەن ابىروي بولدى.

سول كەزدە دە جەكە پايدامنان گورى ەلدىڭ ابىرويىن، قازاقتىڭ اتىن ويلادىم. حالىقتىڭ مەنى جاقسى كورۋى، قۇرمەتتەۋى - قازاققا دەگەن تازا نيەتىم مەن ۇلتقا دەگەن قۇرمەتىمنىڭ ارقاسى دەپ بىلەمىن.

- ءسىزدىڭ باستاماڭىزبەن كاسىپقوي بوكسقا كەلگەن تالاي سپورتشى بار. سولاردىڭ اراسىندا بۇگىندە قولداۋعا مۇقتاج بوكسشىلار كەزدەسە مە؟

- ارينە، بار. جانىبەك باۋىرىمىزدىڭ كاسىپقوي بوكسقا كەلۋىنە دە ءوزىمنىڭ ۇلەسىم بولدى. باۋىرجان وسپانوۆ اعامىز قولداۋ كورسەتتى. ءسويتىپ، ول كاسىپقوي بوكستىڭ نە ەكەنىن ءتۇسىنىپ، ۇلكەن جولعا ءتۇستى.

ءالي احمەتوۆ، مەيىرىم نۇرسۇلتانوۆ جانە باسقا دا كوپتەگەن جىگىتتەر مەنىڭ ۇيىمداستىرعان جارىستارىمدا جۇدىرىقتاستى. ولاردىڭ امەريكاعا بارىپ، قازاقتىڭ كوك تۋىن كوتەرۋىنە جول اشقانىمدى ماقتانىشپەن ايتا الامىن.

بۇگىندە دە قولداۋعا مۇقتاج جىگىتتەر بار. اسىرەسە مەيىرىم نۇرسۇلتانوۆقا ۇلكەن كومەك كەرەك دەپ ويلايمىن. ونىڭ الەۋەتى زور. قازىر قولداۋ كورسەتىپ، دۇرىس باعىت بەرسە، ۇلكەن ناتيجەگە جەتە الاتىن سپورتشىلارىمىز جەتكىلىكتى.

ءبىز كەزىندە شەتەلدە جۇرگەندە ەشكىمگە باسىمىزدى يمەيىك، ءوز كۇشىمىزبەن جەتىستىككە جەتەيىك دەپ تىرىستىق. ءبىراق كاسىپقوي بوكستا ۇلكەن ناتيجەگە جەتۋ ءۇشىن قارجىلاي جانە ۇيىمداستىرۋشىلىق قولداۋ قاجەت.

- جالپى، قازاق بوكسىنىڭ دامۋىنا قاتىستى قانداي جاۋاپكەرشىلىكتى ءوز موينىڭىزعا الۋعا دايىنسىز؟

- مەن قازاق سپورتىنىڭ ىستىعى مەن سۋىعىنا ارالاسىپ، ءوز ۇلەسىمدى قوسقىم كەلەدى. قولىمنان كەلسە، كاسىپقوي بوكستى دا، اۋەسقوي بوكستى دا دامىتۋعا اتسالىسۋعا دايىنمىن.

كەيدە «ءبارىن ماعان بەرىڭدەر، بەس جىل ۋاقىت بەرىڭدەر. سول ۋاقىت ىشىندە ناتيجە كورسەتە الماسام، جاۋاپكەرشىلىكتى ءوز موينىما الامىن» دەگىم كەلەدى. ءبىراق مۇنداي ۇسىنىستى كىمگە بارىپ ايتۋعا بولادى؟ ەل ىشىندە سالماقتى ءسوز ايتىپ، سپورتتىڭ بولاشاعىنا جاناشىرلىقپەن قارايتىن، وسىنداي باستامانى قولدايتىن ازاماتتار كوبىرەك بولسا دەيمىن.

ءبىزدىڭ ماقساتىمىز - تەك چەمپيون شىعارۋ ەمەس، تۇلعا قالىپتاستىرۋ. قازىر بالالاردىڭ تەلەفوندى قويىپ، سپورتقا كەلگەنىنىڭ ءوزى قۋانتادى. سولاردىڭ اراسىنان ەلگە قىزمەت ەتەتىن، قازاقتىڭ اتىن شىعاراتىن باتىرلار مەن تۇلعالار تاربيەلەۋ - ءبىزدىڭ قولىمىزداعى ءىس. بۇل - اتا-بابامىزدان قالعان امانات. سوندىقتان قازاق سپورتىنىڭ دامۋىنا بار كۇشىمىزدى سالىپ، قىزمەت ەتە بەرۋىمىز كەرەك. ءوز تاراپىمىزدان از دا بولسا ۇلەس قوسىپ جاتىرمىز. بۇل جۇمىس جالعاسىن تابادى دەپ سەنەمىن.

- اڭگىمەڭىزگە راحمەت!