قانداس مارتەبەسىن الۋ ەرەجەسى وزگەردى: ەندى تەك قۇجات تاپسىرۋ جەتكىلىكسىز

ەندى ءوتىنىش بەرۋشىلەر قازاق ءتىلىن ءبىلۋ دەڭگەيىن تەكسەرۋدەن باستاپ، ارنايى ساۋالناما مەن اڭگىمەلەسۋگە دەيىنگى بىرنەشە كەزەڭنەن وتەدى.

24.kz مالىمەتىنشە، جىل باسىنان بەرى سولتۇستىك قازاقستان وبلىسىنا رەسەي، وزبەكستان، موڭعوليا، قىتاي، تاجىكستان جانە يراننان 48 ەتنيكالىق قازاق وتباسى قونىس اۋدارعان. جالپى سانى - 129 ادام.

قانداستاردى قولداۋ ءۇشىن مەملەكەت بىرنەشە الەۋمەتتىك كومەك ءتۇرىن ۇسىنادى. ولاردىڭ قاتارىندا قونىس اۋدارۋعا ارنالعان سۋبسيديا جانە تۇرعىن ءۇي ساتىپ الۋعا بەرىلەتىن 7 ميلليون تەڭگە كولەمىندەگى سەرتيفيكات بار.

ءبىرىنشى كەزەڭ - قازتەست. ءوتىنىش بەرۋشى قازاق تىلىنەن تەست تاپسىرىپ، سۇراقتاردىڭ كەمىندە 70 پايىزىنا دۇرىس جاۋاپ بەرۋى ءتيىس.

ەكىنشى كەزەڭدە ۇمىتكەر ارنايى پورتال ارقىلى ساۋالناما تولتىرادى. مۇندا ادامنىڭ جاسى، ءبىلىمى، دەنساۋلىق جاعدايى، ەڭبەك تاجىريبەسى جانە قازاقستاندا تۋىستارىنىڭ بار-جوعى سياقتى ءبىرقاتار كورسەتكىش ەسكەرىلەدى.

جۇيە وسى دەرەكتەر نەگىزىندە ءوتىنىش بەرۋشىنىڭ الەۋەتىن اۆتوماتتى تۇردە باعالايدى. ساۋالناما ناتيجەسىندە كەمىندە 600 بال جيناۋ قاجەت.

ءۇشىنشى كەزەڭدە مەملەكەتتىك ورگاندار قاجەتتى تەكسەرۋلەردى جۇرگىزەدى. بۇدان كەيىن ءوتىنىش بەرۋشى قورىتىندى اڭگىمەلەسۋدەن وتەدى.

وسىلايشا، جاڭا ءتارتىپ بويىنشا «قانداس» مارتەبەسىن الۋ تەك قۇجات تاپسىرۋمەن شەكتەلمەيدى. ۇمىتكەردىڭ ءتىل ءبىلۋ دەڭگەيى، ءبىلىمى، الەۋمەتتىك جاعدايى جانە قازاقستانعا بەيىمدەلۋ مۇمكىندىگىنە قاتىستى ءبىرقاتار كورسەتكىش ەسكەرىلەدى.

مامانداردىڭ ايتۋىنشا، جاڭا تالاپتار كوشى-قون ۇدەرىسىن جۇيەلەپ، ەلگە قونىس اۋداراتىن ەتنيكالىق قازاقتاردىڭ الەۋەتىن باعالاۋعا باعىتتالعان.