ق. توقايەۆ: ۇكىمەت ايرىقشا قۇزىرەتكە يە بولدى

استانا. KAZINFORM - جالاڭ سوزگە ۋاقىت كەتىرمەي، ناقتى ارەكەت جاساپ، ساياسي جاۋاپكەرشىلىك تانىتۋ قاجەت. پرەزيدەنت قاسىم-جومارت توقايەۆ قايتا جاساقتالعان ۇكىمەتتىڭ كەڭەيتىلگەن وتىرىسىن قورىتىندىلاي كەلىپ، وسىنداي پايىم ايتتى.

«قازىر بۇكىل الەم اسا كۇردەلى تاريحي كەزەڭدە ءومىر ءسۇرىپ جاتىر. وسىنداي كەزەڭدە مەملەكەتتەردىڭ كوپجىلدىق دامۋ باعدارى ايقىندالادى. سوندىقتان، ءبىز ۋاقىت تالابىنا ساي بولىپ، جىلدام ءارى باتىل قيمىلداۋىمىز كەرەك.
جالاڭ سوزگە ۋاقىت كەتىرمەي، ناقتى ارەكەت جاساپ، ساياسي جاۋاپكەرشىلىك تانىتۋ قاجەت. ءدال قازىرگى كەزەڭدە ءاربىر كۇننىڭ قادىرىن دۇرىس ءتۇسىنىپ، قولدا بار مۇمكىندىكتى دۇرىس پايدالانۋىمىز كەرەك. ايتپەسە، جاھاندىق باسەكەگە ىلەسۋ قيىن بولادى»، - دەدى مەملەكەت باسشىسى.

قاسىم-جومارت توقايەۆ تابىسقا جەتۋ ءۇشىن مەملەكەت پەن قوعام ورتاق مۇددە جولىندا ءاردايىم بىرگە بولۋى كەرەكتىگىن ەسكە سالدى.

«ءبىز وركەنيەتتى ۇلت رەتىندە تەك جارقىن بولاشاققا ۇمتىلىپ، تەك العا قاراي قادام باسۋىمىز قاجەت. قازىر ۇكىمەت ايرىقشا قۇزىرەتكە يە بولدى. وسى مۇمكىندىكتى دۇرىس پايدالانۋ كەرەك. شۇعىل تۇردە ءتيىستى شەشىمدەردى قابىلداۋ قاجەت. 
مەن بۇگىن ءبىرقاتار ماڭىزدى ماسەلەگە توقتالدىم. ارينە، باسقا دا وزەكتى ماسەلەلەر بار. ۇكىمەتتىڭ الدىندا تۇرعان مىندەتتەر - وتە ماڭىزدى. دەرەۋ جۇمىسقا كىرىسۋ كەرەك. تۇپتەپ كەلگەندە، ەكونوميكانىڭ ءار سالاسىندا تۇبەگەيلى رەفورمالار جاسالۋعا ءتيىس»، - دەدى پرەزيدەنت.

ايتا كەتەيىك، ۇكىمەت ۇيىندە قايتا جاساقتالعان ۇكىمەتتىڭ كەڭەيتىلگەن وتىرىسى ءوتىپ جاتىر.