ق ر پرەزيدەنتىنە سەنىم گراموتالارىن تابىستاۋ راسىمىنە دايىندىق قالاي جۇرگىزىلەدى
قازاقستان پرەزيدەنتىنە سەنىم گراموتالارىن تابىستاۋ ءراسىمىن ۇيىمداستىرۋمەن كوپتەگەن مەملەكەتتىك قىزمەتشىلەر، ونىڭ ىشىندە حاتتاما قىزمەتى دە اينالىسادى. مەملەكەتتىك حاتتاما باسشىسىنىڭ ورىنباسارى الماس ايۋبايەۆ ەلشىلەرمەن نۇسقاۋ مەن دايىندىق قالاي وتكەنى تۋرالى ايتىپ بەردى، دەپ حابارلايدى قازاقپاراتتىڭ مەنشىكتى ءتىلشىسى.

«بۇگىن ءبىز پرەزيدەنتكە سەنىم گراموتالارىن تابىستاۋ ءراسىمىن وتكىزەمىز. بۇل - ءار ەلشى مەن ديپلوماتتىڭ مانسابىنداعى ماڭىزدى ءىس-شارا. كەيىنگى 2-3 كۇن بويى حاتتاما قىزمەتى ەلشىلەرگە نۇسقاۋ بەرۋمەن اينالىستى. ءبىز ءىس-شاراعا دايىندالدىق. سەنىم گراموتالارىن تابىستاۋدىڭ ەرەكشەلىگى كوپ. ءار ەلدىڭ وزگەشەلىگى بولادى. قازاقستاندا دا ءدال سولاي»، - دەدى الماس ايۋبايەۆ.
ونىڭ سوزىنشە، بۇگىنگى ءراسىمنىڭ ەرەكشەلىگى - قاتىساتىن ەلشىلەر سانىندا. سالتاناتتى شاراعا الەمنىڭ 14 ەلىنىڭ، ونىڭ ىشىندە شۆەيتساريا، ليتۆا، چەحيا، ءۇندىستان، يوردانيا، نيدەرلاند، ۆاتيكان، سلوۆەنيا، ۋگاندا، گانا، ۋرۋگۆاي، ەفيوپيا، دانيا مەن نەپال ەلشىلىگىنىڭ وكىلدەرى كەلدى.

«سىرتقى ىستەر مينيسترلىگىنىڭ حاتتاما قىزمەتى، پرەزيدەنت اكىمشىلىگى ارىپتەستەرىمىزبەن بىرگە سىزباسىن، سەناريىن جاساپ، بارلىق ەلشىگە نۇسقاۋلىق جاسادى. بۇگىن - ەرەكشە كۇن، 14 ەلشى تابىستايدى. بۇل كوپ ۋاقىتتان بەرى ءبىرىنشى رەت بولىپ تۇر. جەتى ەلشىنىڭ رەزيدەنتسياسى استانادا، تاعى جەتەۋىنىكى باسقا ەلدەردە ورنالاسقان»، - دەپ تولىقتىردى الماس ايۋبايەۆ.

سەنىم گراموتالارىن تابىستاۋ كونتسەپتسياسى الەم بويىنشا بەكىتىلگەن. ونى وتكىزۋ كەزىندە ءار ەلدىڭ ەرەكشەلىگى مەن باسقا دا ماڭىزدى نارسەلەر ەسكەرىلەدى. مەملەكەتتىك حاتتاما قىزمەتىنىڭ وكىلى قازاقستانداعى حاتتاما ەرەكشەلىكتەرىنە توقتالدى.

«حاتتاما مەن جالپى ءراسىمنىڭ ەرەكشەلىگىنە كەلەر بولساق، كوپ جاعدايدا كونتسەپتسيا الەم بويىنشا بەكىتىلگەن ۇلگىمەن وتكىزىلەدى، ياعني بىردەي بولادى. ءبىراق ۇلتتىق ەرەكشەلىك، عيماراتتىڭ قۇرىلىسى، مەملەكەتتىك سيمۆول ەلەمەنتتەرىن پايدالانۋمەن وزگەشەلەنەدى. ەلشىلەر اقورداعا كەلە سالا مىندەتتى تۇردە تۋىمىزعا قۇرمەت كورسەتىپ، قازاقستاننىڭ ءانۇرانىن تىڭدايدى. سونداي- اق ءبىرىنشى قاباتتا ۇلتتىق ۇلان قاتىسۋىمەن بولەك ءراسىم وتەدى»، - دەپ ءمالىم ەتتى مەملەكەتتىك حاتتاما باسشىسىنىڭ ورىنباسارى.

حاتتاما قىزمەتىنىڭ وكىلى ەلشىلەردىڭ كەلۋ جانە ولاردى ساپقا تۇرعىزۋ ءتارتىبى تۋرالى ايتتى. شىعۋ، شاقىرۋ جانە سەنىم گراموتالارىن تابىستاۋ ەلشىلەردىڭ ەلگە كەلگەن ۋاقىتىنا قاراي ءار مينۋتىنا دەيىن بەكىتىلەدى.

ەلشى پرەزيدەنتكە سەنىم گراموتالارىن تابىستاعاننان كەيىن رەسمي تۇردە ءوز قىزمەتىن ورىنداۋعا كىرىسەدى. ءراسىمدى وتكىزۋ كەزىندە ەلشىنى جونەلتۋگە دە دايىندىق ءجۇرىپ جاتادى.
«وسى ۋاقىتتا ارىپتەستەرىمىز، ياعني مەملەكەتتىك حاتتاما قىزمەتى جونەلتۋ ءساتىن دايىندايدى، سوعان سايكەس، تۋدى شىعارامىز. سەنىم گراموتالارىن تابىستاعاننان كەيىن ەلشىلەر جول پوليتسياسىنىڭ ىلەسىپ جۇرۋمەن ءوز ەلىنىڭ تۋى بار رەزيدەنتسياعا بارادى»، - دەپ اتاپ ءوتتى الماس ايۋبايەۆ.