ق ر پرەزيدەنتى وزبەكستاننىڭ سىرتقى ىستەر ءمينيسترى باحتيەر سايدوۆتى قابىلدادى

  استانا. KAZINFORM - مەملەكەت باسشىسى وزبەكستاننىڭ سىرتقى ىستەر ءمينيسترى باحتيەر سايدوۆتى قابىلدادى.

بۇل تۋرالى اقوردانىڭ باسپا ءسوز قىزمەتىنەن ءمالىم بولدى.

پرەزيدەنت قاسىم- جومارت توقايەۆ وزبەكستاننىڭ سىرتقى ساياسات ۆەدومستۆوسىنىڭ باسشىسىنا ءىلتيپات بىلدىرە وتىرىپ، قازاق- وزبەك ىنتىماقتاستىعى بارلىق سالادا قارقىندى دامىپ كەلە جاتقانىن اتاپ ءوتتى.

ونىڭ ايتۋىنشا، قازاقستان باۋىرلاس وزبەكستانمەن ءوزارا قارىم- قاتىناستى ودان ءارى نىعايتۋعا باسا ءمان بەرەدى.

قاسىم- جومارت توقايەۆ شاۆكات ميرزيەيەۆتىڭ ەكىجاقتى بايلانىستاردى تەرەڭدەتۋ ىسىنە ەلەۋلى ۇلەس قوسىپ وتىرعانىنا توقتالىپ، قازاقستان ءوڭىر حالىقتارىنىڭ يگىلىگى مەن ءوسىپ- وركەندەۋىنە باعىتتالعان وزبەكستاننىڭ باستامالارىن الداعى ۋاقىتتا دا قولداۋعا دايىن ەكەنىن جەتكىزدى.

كەزدەسۋ بارىسىندا ساۋدا-ەكونوميكالىق ىقپالداستىقتى كەڭەيتۋ ماسەلەلەرى تالقىلاندى. ەكى ەلدىڭ دامۋىنا تىڭ سەرپىن بەرەتىن جاڭا باعىتتاردى قاراستىرۋ جانە ەكىجاقتى تاۋار اينالىمىن ارتتىرۋ ماڭىزدى ەكەنى ايتىلدى.

مەملەكەت باسشىسى كولىك- ترانزيت سالاسىنداعى ىنتىماقتاستىقتى نىعايتۋدىڭ ءمانى زور ەكەنىن اتاپ ءوتتى. پرەزيدەنت قازاقستاننىڭ «داربازا - ماقتاارال» تەمىرجول جەلىسىن سالۋعا كىرىسكەنىن مالىمدەدى. بۇل جولدى ودان ءارى وزبەكستان شەكاراسىنا جەتكىزۋ كوزدەلىپ وتىر. اتالعان تەمىرجول بايلانىسى ەكى ەل اراسىنداعى جۇك تاسىمالىنىڭ كولەمىن ۇلعايتۋعا مۇمكىندىك بەرەدى. قاسىم- جومارت توقايەۆ وزبەكستان تاراپىنىڭ ترانسكاسپيي حالىقارالىق كولىك باعدارىن دامىتۋ ىسىنە اتسالىسۋى بارلىق تاراپقا ءتيىمدى بولادى دەپ سانايدى.

ءوز كەزەگىندە باحتيەر سايدوۆ قۇرمەت كورسەتكەنى ءۇشىن مەملەكەت باسشىسىنا العىس ايتىپ، وزبەكستان پرەزيدەنتىنىڭ ىزگى تىلەگىن جەتكىزدى.

ءمينيستردىڭ ايتۋىنشا، ەكى ەل باسشىلارى قازاقستان مەن وزبەكستان اراسىنداعى وداقتاستىق قارىم- قاتىناستى نىعايتۋ ءۇشىن جوعارى مەجە قويىپ وتىر. وسىعان وراي باحتيەر سايدوۆ بۇعان دەيىن جوعارى دەڭگەيدە قول جەتكىزىلگەن ۋاعدالاستىقتاردى ساپالى جۇزەگە اسىرۋ جونىندەگى بىرلەسكەن جۇمىس جوسپارىن باياندادى.

سونىمەن قاتار كەزدەسۋ بارىسىندا سۋ شارۋاشىلىعى سالاسىنداعى ىنتىماقتاستىق جانە ورتالىق ازياداعى وڭىرلىك قاۋىپسىزدىكتى قامتاماسىز ەتۋ ماسەلەلەرى تالقىلاندى.

بۇدان بولەك، الداعى ۋاقىتقا جوسپارلانعان ەكىجاقتى جانە كوپجاقتى سيپاتتاعى كەزدەسۋلەر مەن ءىس-شارالار كەستەسى قاراستىرىلدى.