ق ر پرەزيدەنتى شەت ەلدەر باسشىلارى مەن قازاقستاندىقتارعا ريزاشىلىعىن ءبىلدىردى

پرەزيدەنت قاسىم- جومارت توقايەۆ قاراعاندى وبلىسىنداعى قايعىلى وقيعاعا وراي كوڭىل ايتقان بارلىق شەت مەملەكەتتەر باسشىلارى مەن قازاقستاندىقتارعا ريزاشىلىعىن ءبىلدىردى، دەپ حابارلايدى kazinform.

«قازا بولعان كەنشىلەردىڭ وتباسىلارىنا كوڭىل ايتىپ، وسىناۋ قيىن ساتتە جىلى لەبىزدەرىن جولداپ، قولداۋ كورسەتكەن مەملەكەتتەر باسشىلارىنا، قوعام قايراتكەرلەرىنە، ازاماتتارعا شىنايى ريزاشىلىعىمدى بىلدىرەمىن»، - دەپ جازدى مەملەكەت باسشىسى x پاراقشاسىندا.

ەسكە سالايىق، بۇگىن تۇندە قاراعاندى وبلىسىنداعى كوستەنكو اتىنداعى شاحتادا ءورت بولدى. ساعات 17.33تەگى مالىمەت بويىنشا 33 كەنشىنىڭ دەنەسى تابىلدى,13 ادام ىزدەستىرىلىپ جاتىر.

كەشقۇرىم بريفينگ وتكىزگەن توتەنشە جاعدايلار ءمينيسترى سىرىم ءشارىپحانوۆ جەر استىندا قالعان كەنشىلەردى ءتىرى تابۋعا ءۇمىت وتە از ەكەنىن ءمالىم ەتتى.

كاسىبي اسكەريلەندىرىلگەن اپاتتىق- قۇتقارۋ قىزمەتتەرىنىڭ رەسپۋبليكالىق ورتالىق شتابى قاراعاندى فيليالى ديرەكتورىنىڭ ورىنباسارى جۇمات وكەنوۆ مەرت بولعان كەنشىلەردىڭ جەكە باسىن انىقتاۋ قيىنعا ءتۇسىپ جاتقانىن ايتتى.

اپاتقا بايلانىستى رەسەي، بەلارۋس، قىرعىزستان، فرانسيا، وزبەكستان پرەزيدەنتتەرى مەن تۇركيا سىرتقى ىستەر مينيسترلىگى كوڭىل ايتتى.