ق. بيشىمبايەۆتىڭ ءىسى: پروكۋرور ءىستىڭ ءمان-جايىن تارقاتتى

استانا. KAZINFORM - پروكۋرور ەكس-شەنەۋنىك قۋاندىق بيشىمبايەۆقا قاتىستى ءىستىڭ ءمان-جايىمەن تانىستىردى.

«2022-جىلى تامىزدا كۇدىكتى ق. بيشىمبايەۆ استانادا س. نۇكەنوۆامەن تانىسىپ، وعان ۇناتقانىن ايتىپ، كەزدەسۋگە شاقىرعان. س. نۇكەنوۆانىڭ كەزدەسۋدەن بىرنەشە رەت باس تارتقانىنا قاراماستان ق. بيشىمبايەۆ قىرىنداپ، العاشىندا ءوزىن تەك جاقسى جاعىنان كورسەتكەن.

2022-جىلى 16-جەلتوقساندا تويلارى وتكەن، ءبىراق نەكەلەرىن رەسمي تىركەمەگەن. ولار ازاماتتىق نەكەدە تۇرعان. وتباسىلى بولعاننان كەيىن، العاشقى كۇنىنەن-اق ق. بيشىمبايەۆ تەز اشۋلانشاق، اگرەسسيۆتى جانە س. نۇكەنوۆاعا وزىمشىلدىك تانىتا باستادى. ياعني س. نۇكەنوۆانىڭ تۋىستارى جانە دوستارىمەن سويلەسۋىنە، كەزدەسۋىنە تىيىم سالدى، سونىمەن قاتار ونىڭ ۇيالى تەلەفونىنان شالىنعان قوڭىراۋلار مەن SMS- حاتتاردى باقىلاپ وتىردى»، - دەدى ايجان ايماعانوۆا سوت زالىندا ايىپتاۋدى وقي وتىرىپ.

پروكۋروردىڭ ايتۋىنشا، ق. بيشىمبايەۆ س. نۇكەنوۆاعا سول كەزدە ايتارلىقتاي تابىس اكەلگەن قىزمەتپەن اينالىسۋعا تىيىم سالعان. وسىلايشا كۇدىكتى ونىڭ تاۋەلسىزدىگى مەن جۇپتىق قارىم-قاتىناستاعى جەكە قۇقىعىنان ايىرىپ، ونى ماتەريالدىق تۇرعىدان تولىعىمەن وزىنە تاۋەلدى ەتتى.

سونداي-اق، پروكۋرور ق. بيشىمبايەۆتىڭ تاراپىنان س. نۇكەنوۆاعا قاتىناسى اگرەسسيۆتى كۇيدە بولعانىن جانە ونىڭ وتكەن ومىرىنە قاتىستى نەگىزسىز قىزعانىشپەن قاتار جۇرگەنىن مالىمدەيدى. ودان بولەك، كۇدىكتى زارداپ شەگۋشىنىڭ ار-نامىسى مەن قادىر-قاسيەتىن قورلاعان.

«ۋاقىت وتە كەلە كۇدىكتى جۇيەلى تۇردە زورلىق-زومبىلىق كورسەتە باستادى. ق. بيشىمبايەۆ پەن س. نۇكەنوۆا مەيرامحانانىڭ 5-ءشى VIP- زالىنا ءوتىپ، سپيرتتىك ىشىمدىككە، اتاپ ايتقاندا، شاراپقا تاپسىرىس بەردى. مەيرامحانادا ەكەۋى 4 بوتەلكە شاراپ ءىشىپ، الكوگول ءىشۋ بارىسىندا ءوزارا قارىم-قاتىناستى انىقتاۋدى جالعاستىردى. جانجال بارىسىندا س. نۇكەنوۆا ق. بيشىمبايەۆقا قارىم-قاتىناستان شارشاعانىن جانە وعان نۇكتە قويۋ تۋرالى شەشىم قابىلداعانىن ايتتى. سونداي-اق، بۇل فاكتى تۋرالى س. نۇكەنوۆا اعاسى امانگەلدىگە جازىپ، وعان تۇنەۋگە كەلەتىنىن ايتىپ، تاكسي شاقىرۋعا تىرىسقان. 2023-جىلعى 9- قاراشادا تۇنگى ساعات شامامەن 00:30 دا ق. بيشىمبايەۆ پەن س. نۇكەنوۆا مەيرامحانادان شىقتى، الايدا ق. بيشىمبايەۆ س. نۇكەنوۆانى اعاسىنا جىبەرمەي، ولار «گاسترو-ورتالىق» اۋماعىندا بولدى. سول كۇنى تۇنگى ساعات 2:19 دا ولار مەيرامحاناعا اس ءۇي ارقىلى قايتا ورالدى، س. نۇكەنوۆا 1-ءشى VIP زالعا ءوتتى، ال ق. بيشىمبايەۆ بارعا بارىپ، تاعى شاراپ الىپ، س. نۇكەنوۆا وتكەن زالعا باردى»، - دەيدى پروكۋرور.

بۇل ۋاقىتتا مەيرامحانا زالىندا جۇمىسشى مەيىربەكوۆ پەن ونىڭ كومەكشىسى اسىلبايەۆا بولعان. ولار تۇنگى ۋاقىتتا مەيرامحانانىڭ قابىرعالارى مەن باعاندارىن سىرلاۋ جۇمىسىن جۇرگىزگەن.

«VIP- زالدا الكوگول ءىشۋدى جالعاستىرعان ەكەۋىنىڭ اراسىندا تاعى دا جانجال تۋىندادى جانە ولار ءبىر-بىرىنە ايقايلاي باستادى. ق. بيشىمبايەۆ تاعى دا س. نۇكەنوۆتى بالاعات سوزدەرمەن قورلاي باستادى. سونىمەن قاتار، ق. بيشىمبايەۆ س. نۇكەنوۆانىڭ ار-نامىسى مەن قادىر-قاسيەتىن قورلاي وتىرىپ، وعان كيىمدەر مەن زەرگەرلىك بۇيىمدار سىيلاعانىن مىندەتسىندى. ءوز كەزەگىندە س. نۇكەنوۆا اشۋلانىپ، ۇستىندەگى ءىش كيىمىنەن باسقاسىن شەشىپ، لاقتىرىپ تاستادى. ق. بيشىمبايەۆ وعان اشۋلانىپ، جۇدىرىقپەن ۇرا باستاعان (باسى مەن دەنەسىن). ق. بيشىمبايەۆ ماس كۇيىندە س. نۇكەنوۆانى ءىش كيىمىمەن اۆتوتۇراققا الىپ ءتۇستى. ول سوققىعا جىعىلعان س. نۇكەنوۆانىڭ كۇيىن مەيرامحانا قىزمەتكەرلەرىنىڭ كورمەگەنىن قالاپ، ۇيگە باعىت العان. ولار مەيرامحانا اۋماعىنان تروتۋارعا شىعا باستاعاندا اۆتوتۇراق كۇزەتشىسى كورىپ، اۆتوكولىكتى توقتاتقان. سودان سوڭ تاڭعى ساعات 7 دە ق. بيشىمبايەۆ س. نۇكەنوۆامەن بىرگە مەيرامحاناعا قايتا ورالعان. مەيرامحانانىڭ حولىندا كۇدىكتى س. نۇكەنوۆانىڭ باسىنان سوققىلاي باستاعان، سالدارىنان زارداپ شەگۋشى جەرگە قۇلاعان. ودان ءارى ق. بيشىمبايەۆ ازاماتتىق نەكەدەگى ايەلىن اياۋسىز تەپكىلەگەن، ونىمەن قويماي س. نۇكەنوۆانى تۇرعىزىپ، باسىنان تاعى ۇرعان. سودان سوڭ كۇدىكتى زارداپ شەگۋشىنىڭ شاشىنان سۇيرەپ  1- VIP- زال اپارعان، ءومىرىن ساقتاعىسى كەلگەن س. نۇكەنوۆا VIP- زالدىڭ اجەتحاناسىنا تىعىلعان. ق. بيشىمبايەۆ اجەتحانانىڭ ەسىگىن قولمەن ۇرىپ، سوسىن مۋزىكالىق كولونكانىڭ مەتال شتاتيۆىمەن ەسىكتى قيراتقان. اجەتحانا ەسىگىن سىندىرىپ كىرگەن كۇدىكتى س. نۇكەنوۆانى تاعى دا ساباعان، اسىرەسە باسىنان»، - دەيدى ق. بيشىمبايەۆتى ايىپتاۋشى.

ودان ءارى پروكۋروردىڭ مالىمدەۋىنشە، ق. بيشىمبايەۆ ايەلىن تۇنشىقتىرا باستادى، سوڭىندا س. نۇكەنوۆا ەسىنەن تانىپ قالدى. الايدا، جابىرلەنۋشىنىڭ ءبىراز ۋاقىتتان كەيىن ەسىن جيناعىن كورىپ، كۇدىكتى تاعى دا باسىنا بىرنەشە رەت سوققى بەرگەن. سول ۇرىپ-سوعۋ س. نۇكەنوۆانىڭ ەس-ءتۇسسىز قالىپ، دەمالماعان سوڭ عانا توقتاعان.

«وسىلايشا، ق. بيشىمبايەۆ ق ر قىلمىستىق كودەكسى 1-تارماعىنىڭ 2-بولىگىنىڭ 110-بابىندا كوزدەلگەن قىلمىس جاسادى. ياعني جۇيەلى تۇردە ۇرىپ-سوعىپ، ماتەريالدىق تاۋەلدى ادامعا وزگە دە زورلىق-زومبىلىق ارەكەتتەرىمەن فيزيكالىق جانە پسيحيكالىق ازاپ كورسەتتى. بۇدان ءارى ق. بيشىمبايەۆ قىلمىستىق كودەكستىڭ 1-تارماعىنىڭ 2-بولىگىنىڭ 99-بابىنا سايكەس قاساقانا، اسا قاتىگەزدىكپەن كىسى ءولتىرۋ قىلمىسىن جاسادى. سونداي-اق قىلمىستىق كودەكستىڭ 2-تارماقتىڭ 2- بولىگىنىڭ 14- بابىنا سايكەس ق. بيشىمبايەۆتىڭ ارەكەتتەرىندە قىلمىستىڭ قاۋىپتى قايتالانۋى بايقالادى»، - دەيدى ا. ايماعانوۆا.

ايتا كەتەيىك، بۇگىن استانادا قۋاندىق بيشىمبايەۆتىڭ ءىسى بويىنشا الدىن الا تىڭداۋ باستالدى.

اتالعان ءىستىڭ سۋدياسى ايجان قۇلبايەۆانىڭ شەشىمىمەن الدىن الا تىڭداۋدىڭ جالعاسى ەرتەڭ ساعات 17:00 گە بەلگىلەندى.