دەپۋتاتتار تەز ارادا Pfizer-دى اقىلى نەگىزدە ۇسىنۋدى سۇرادى

نۇر-سۇلتان. قازاقپارات - ماجىلىستەگى «اق جول» فراكسياسىنىڭ دەپۋتاتتارى حالىقارالىق دەڭگەيدە مويىندالعان ۆاكسينالارمەن حالىقتى قاجەتتى كولەمدە قامتاماسىز ەتۋ ماسەلەسىن كوتەردى، دەپ حابارلايدى قازاقپارات ءتىلشىسى.

دەپۋتات عاني حامزين وسىعان دەيىن «اق جول» فراكسياسى شەتەلگە ساپارمەن شىعۋدى جوسپارلاپ جۇرگەن ستۋدەنتتەر، بيزنەسمەندەر مەن باسقا دا ازاماتتار ءۇشىن حالىقارالىق دەڭگەيدە مويىندالعان ۆاكسينالاردى، ونىڭ اراسىندا Pfizer-دى اقىلى نەگىزدە ۇسىنۋ ماسەلەسىن كوتەرگەنىن ەسكە سالدى.

«قازىرگى كەزدە قازاقستاندا سپۋتنيك-ۆ، Qazvac پەن Sinopharm بارشا حالىق ءۇشىن، ال Pfizer ادامداردىڭ كەيبىر ساناتتارى نا قولجەتىمدى. ولاردىڭ اراسىندا Sinopharm مەن Pfizer دۇنيەجۇزىلىك دەنساۋلىق ساقتاۋ ۇيىمى تاراپىنان مويىندالعان. 16-قاراشادا اقىلى نەگىزدە ءوز ەركى بويىنشا قازاقستان حالقىن ۆاكسينالاۋ ءۇشىن Comirnaty Pfizer-دى كوممەرتسيالىق نارىقتا COVID-19-عا قارسى ەكپە رەتىندە وتكىزۋ تۋرالى ۇكىمەتتىڭ قاۋلى جوباسىنا قولداۋ جاسالدى. الايدا وسى پرەپاراتپەن اقىلى نەگىزدە ۆاكسينالاۋ ءالى كۇنگە دەيىن باستالمادى»، - دەدى دەپۋتات دەنساۋلىق ساقتاۋ ءمينيسترى اجار عينياتتىڭ اتىنا جولداعان ساۋالىندا.

سونىمەن قاتار ول قازىرگى كەزدە Sinopharm ۆاكسيناسىنىڭ ءبىرقاتار اۋرۋحانالاردا تاپشىلىعى بايقالىپ وتىرعانى جايلى اقپارات ءتۇسىپ جاتقانىن ايتتى.

«اقىلى نەگىزدە جاسالاتىن Pfizer-دى بارشا ەل كۇتىپ وتىر. بۇل تۇرعىدا رەۆاكسينالاۋعا نيەتتى تۇرعىنداردى دا ەسكەرۋ كەرەك. ادامداردىڭ كوبىسىندە Pfizer ۆاكسيناسىن اقشا تولەتىپ سالدىرۋعا مۇمكىندىگى بار، الايدا اقىلى نەگىزدە وسى ەكپەنى سالدىرۋ قاشان باستالاتىنى بەلگىسىز. وسى ورايدا Pfizer-دى اقىلى نەگىزدە سالدىرۋدىڭ ناقتى داتاسى ەشبىر جەردە جاريالانباعان. بۇل ءوز كەزەگىندە ادامداردىڭ جوسپارىن بۇزىپ وتىر»، - دەدى ول.

بۇل تۇرعىدا «اق جول» دەپۋتاتتىق فراكسياسى ءتيىستى ۇسىنىستار جاسادى:

1. شەتەلگە شىعاتىن «بولاشاق» باعدارلاماسىنىڭ ستيپەندياتتارىن، كاسىپكەرلەردى جانە باسقا دا ازاماتتاردى قاجەت بولعان جاعدايدا اقىلى نەگىزدە تەز ارادا حالىقارالىق مويىندالعان پرەپاراتتارمەن ۆاكسينالاۋدى باستاۋ كەرەك.

2. دۇنيەجۇزىلىك دەنساۋلىق ساقتاۋ ۇيىمى مويىنداعان ۆاكسينالاردىڭ كەرەك كولەمىن ازاماتتاردىڭ بارلىق ساناتى ءۇشىن قامتاماسىز ەتۋ كەرەك.

3. Pfizer پرەپاراتىمەن اقىلى نەگىزدە ۆاكسينالاۋدىڭ ناقتى داتاسى جاريالانۋى ءتيىس.

4. وتاندىق QazVac پرەپاراتىن دۇنيەجۇزىلىك دەنساۋلىق ساقتاۋ ۇيىمى جانە الەمنىڭ جەتەكشى ەلدەرىنىڭ فارماتسيەۆتيكالىق اكىمشىلىكتەرى حالىقارالىق دەڭگەيدە تانۋ ءۇشىن قابىلدانىپ جاتقان شارالار تۋرالى حابارلاۋ.

اۆتور: رۋسلان عابباسوۆ