بالالارعا Pfizer- ءدى دۇنيەجۇزىلىك دەنساۋلىق ساقتاۋ ۇيىمىنىڭ ءوزى ۇسىنىپ وتىر - مانار سماعۇل

نۇر-سۇلتان. قازاقپارات - قوعامدىق دەنساۋلىق ساقتاۋ ۇلتتىق ورتالىعىنىڭ «سانيتاريالىق-ەپيدەميولوگيالىق ساراپتاما جانە مونيتورينگ عىلىمي-پراكتيكالىق ورتالىعى» فيليالى ديرەكتورىنىڭ ورىنباسارى مانار سماعۇل جاس وسپىرىمدەر مەن جۇكتى ايەلدەردى COVID-19-عا قارسى ۆاكسينالاۋ تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«دامىعان ەلدەردىڭ ءبارى جاس وسپىرىمدەر مەن جۇكتى ايەلدەرگە وسى ۆاكسينانى سالىپ جاتىر. ا ق ش پەن ۇلى بريتانيادا اتالعان توپتاردى ۆاكسينالاۋ تاجىريبەسى بار. ياعني، Pfizer ۆاكسيناسىنىڭ تيىمدىلىگىن ءبىز ءىس جۇزىندە كورىپ وتىرمىز. بىرىنشىدەن، ءولىم-ءجىتىم جاعدايلارى ازايعان. جالپى سىرقاتتانۋ كورسەتكىشى دە كەمىگەن. بۇل ۆاكسينا 12 جاستان اسقان بالالاردىڭ دا، جۇكتى ايەلدەردىڭ دە دەنساۋلىعىنا قاۋىپ توندىرمەيدى. دۇنيەجۇزىلىك دەنساۋلىق ساقتاۋ ۇيىمىنىڭ ءوزى ۇسىنىپ وتىر»، - دەگەن مامان قازاقستاندا ەرەسەك ادامدارعا بۇگىنگە دەيىن سالىنعان ۆاكسينالاردىڭ ءتيىمدى بولعانىنا توقتالدى.

«رەسەيلىك، قازاقستاندىق، قىتايلىق ۆاكسينالاردىڭ بالالار مەن جۇكتى ايەلدەر ءۇشىن قانشالىقتى ءتيىمدى ەكەنى بەلگىسىز بولعانىمەن، قازىر قولدانۋ ماقساتىنا سايكەستىگىن كورسەتىپ وتىر. بۇل جەردە مىنانى ءتۇسىنۋ كەرەك. بىزدە بۇعان دەيىن ەرەسەكتەرگە سالىنعان ۆاكسينالاردى بالالار مەن جاس وسپىرىمدەرگە سالۋعا مۇلدەم تىيىم سالىنعان دەۋگە بولمايدى. ويتكەنى ولار اتالمىش ەكى توپقا سىناق رەتىندە ەگىلگەن جوق. «سپۋتنيك V» قازىر وسى ماسەلە بويىنشا سىناقتان ءوتىپ جاتىر. QazVac-تا بۇل ساتىدان وتەدى. ناقتى جاس وسپىرىمدەر مەن جۇكتى ايەلدەردىڭ اراسىندا سىناقتان وتكەننەن كەيىن رۇقسات ماسەلەسى شەشىلەدى. مەنىڭ ويىمشا وعان ءسال ۋاقىت كەرەك. ءتيىستى زەرتتەۋلەر جاقسى ناتيجە بەرسە، ولاردى دا اتالمىش ەكى توپقا قولدانۋىمىز مۇمكىن. ال ازىرگە Pfizer ۆاكسيناسى عانا وسى ەكى توپقا ۇسىنىلعان. بۇعان قاراپ بىزدەگى باسقا ۆاكينالار COVID-19 ىندەتىنە Pfizer ۆاكسيناسىنداي ءتيىمدى ەمەس دەگەن وي تۋىنداماۋى كەرەك. ءبىز قولدانىپ جۇرگەن ۆاكسينالاردىڭ ءبارى ۆيرۋسقا ءتيىمدى ەكەنىن ۋاقىت كورسەتتى»، - دەدى مانار سماعۇل.