Pfizer ۆاكسيناسىن ساتىپ الۋ قۇنى نەلىكتەن قۇپيا - مينيستر ءتۇسىندىردى

نۇر-سۇلتان. قازاقپارات - قازاقستان ساتىپ الاتىن Pfizer ۆاكسيناسىنىڭ قۇنىن ءوندىرۋشى كومپانيا جاريا ەتۋگە رۇقسات بەرمەدى.

بۇل تۋرالى ق ر دەنساۋلىق ساقتاۋ ءمينيسترى الەكسەي سوي ايتتى، دەپ حابارلايدى قازاقپارات ءتىلشىسى.

«بۇعان دەيىن ايتقانىمداي، قازان مەن قاراشا ايىندا كۇتىپ وتىرمىز. بارلىعى Pfizer كومپانياسىنىڭ جەتكىلىزىمىنە بايلانىستى. باعاسىنا قاتىستى ايتار بولسام، قازىرگى ۋاقىتتا Pfizer كومپانياسىنان مالىمەتتەردى جاريا ەتپەۋ تۋرالى حات الدىق. سوندىقتان دا بۇل ماسەلە بويىنشا Pfizer كومپانياسىنا جۇگىنۋ قاجەت. ەگەر ولار دەرەكتەردى جاريا ەتۋگە رۇقسات بەرسە، وندا جاريا ەتەمىز. ولاي بولماعان جاعدايدا، كەلىسىمشارت شارتى بۇزىلىپ، ۆاكسينانى جەتكىزۋ مەرزىمى دە ساقتالماۋى مۇمكىن. سوندىقتان كەز كەلگەن كومپانيامەن جۇمىس بارىسىندا كەلىسىمشارتتى ساقتاۋعا ءتيىسپىز»، - دەدى مينيستر.

الەكسەي سويدىڭ ايتۋىنشا، Pfizer كومپانياسى قازاقستان ۆاكسينانى قانشا سوماعا ساتىپ الاتىندىعىن جاريالاۋعا رۇقسات بەرمەي وتىر.

«ءبىز جەكە سۇرانىس تا جىبەردىك. ونى جاريا ەتكىمىز دە كەلگەن. ءبىراق، قازىرگى ۋاقىتتا كومپانيا بىزگە بۇلاي جاساۋعا تىيىم سالىپ وتىر. كومپانيا بۇل ماسەلەنى تاعى قاراستىرادى دەپ ويلايمىز. بۇگىن مالىمەتتەردى جاريا ەتۋگە قاتىستى تاعى دا كەلىسسوز جۇرگىزدىك. دەگەنمەن، قازىرگى ۋاقىتتا بىزدە شەكتەۋ تۇر. سوندىقتان قالاي مۇمكىندىك تۋىندايدى، بىردەن جاريا ەتەمىز. جالپى، وزگە ەلدەردەگى باعامەن بىردەي. بۇل، كومپانيانىڭ باعا ساياساتى»، - دەدى الەكسەي سوي.