OLX-تەگى «جەتكىزۋ قىزمەتى» ەلوردانىڭ 100-دەن استام تۇرعىنىن سان سوقتىرىپ كەتتى

نۇر-سۇلتان. قازاقپارات - «OLX جەتكىزۋ» قىزمەتىنىڭ اتىن جامىلعان الاياقتار جارناما سايتتارىندا ءالى دە «ءوز قىزمەتىن» ۇسىنىپ كەلەدى، دەپ حابارلايدى قازاقپارات نۇر-سۇلتان قالاسىنىڭ پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

تاۋاردى ساتۋ تۋرالى حابارلاندىرۋدى ورنالاستىرعاننان كەيىن الاياقتار ساتىپ الۋشى بولىپ بايلانىسقا شىعادى، نومىرلەردى ءبىر كۇن عانا پايدالانىپ، ارتىنشا ءوشىرىپ تاستايدى. حات الماسۋ بارىسىندا الاياقتار باسقا قالادا ەكەنىن ءتۇسىندىرىپ، «جەتكىزۋ» قىزمەتىن پايدالانۋدى ۇسىنادى. ياعني، كارتادان تولەم جاسالعاننان كەيىن كۋرەر ساتۋشىدان كەلىپ زاتىن الادى. ول ءۇشىن الاياقتار جالعان سىلتەمەنى جىبەرەدى. ءبىر قاراعاندا، سىلتەمە ەشقانداي كۇدىك تۋدىرمايدى، ءبىراق باسقان كەزدە پايدالانۋشىنى فيشينگتىك سايتقا جىبەرەدى.

بۇل سايتتا بانك كارتاسى، CVV- كودى، ج س ن كورسەتىلگەن ساۋالنامانى تولتىرۋ، ءوتىنىمدى جىبەرۋ جانە اقشا اۋدارىمىن كۇتۋ ۇسىنىلادى.

ساتۋشى ءوتىنىمدى جىبەرگەننەن كەيىن، كورسەتكەن بارلىق دەرەكتەر فيشينگتىك سايت ارقىلى الاياقتاردىڭ قولىنا تۇسەدى. بۇدان ءارى، ولار ينتەرنەت- بانكينگتىڭ ەسەپتىك جازباسىنا كىرەدى، اقشاعا تولىق قول جەتكىزەدى جانە قولدا بار اقشانى كارت-شوتتاردان لەزدە ۇرلايدى.

ال الاياقتىق سايت بىرنەشە سەكۋندتان كەيىن بۇعاتتالادى دا جوق بولادى. جىل باسىنان بەرى اتالعان الاياقتىق سحەماسىنان جۇزدەن استام استانالىق زارداپ شەكتى. شىعىن شامامەن 2 ميلليون تەڭگەنى قۇرادى. بارلىعى بويىنشا قىلمىستىق ءىس قوزعالدى. نۇر-سۇلتان قالاسىنىڭ پوليتسيا دەپارتامەنتى ازاماتتارعا بانك كارتالارىنىڭ دەرەكتەمەلەرى مەن جەكە دەرەكتەرىن بەرمەۋ تۋرالى ەسكەرتەدى. سايتتىڭ سىلتەمەسى مەن ءتۇپنۇسقالىعىنا نازار اۋدارۋ قاجەت. فيشينگتىك سايتتاردىڭ اتاۋىندا قوسىمشا حات نەمەسە بەلگى بولادى. ادەتتە الاياقتار تاۋاردى ونى كورىپ، تەكسەرمەي-اق ساتىپ الۋعا كەلىسەدى.

اۆتور: گۇلزات اقجولوۆا