نەگىزگى ۇ ب ت-عا ءوتىنىش قابىلداۋ باستالدى

ҰБТ
فوتو: ۆيكتور فەديۋنين/ Kazinform

نەگىزگى ۇ ب ت-عا وتىنىشتەردى قابىلداۋ 6-14-مامىر ارالىعىندا جۇزەگە اسىرىلادى. تەستىلەۋدىڭ ءوزى 16-مامىردا باستالىپ، 5-شىلدەگە دەيىن جالعاسادى.

دەگەنمەن، توتەنشە جاعداي رەجيمى جاريالانعان 6 وڭىردە (اقمولا، اقتوبە، اتىراۋ، باتىس قازاقستان، قوستاناي، سولتۇستىك قازاقستان وبلىستارى) تىركەلۋ ۋاقىتى ۇزارتىلادى جانە 6-20-مامىر ارالىعىندا، ۇ ب ت 25-مامىر مەن 12-شىلدە ارالىعىندا وتكىزىلەدى.

عىلىم جانە جوعارى ءبىلىم مينيسترلىگىنىڭ شەشىمىمەن 2024 -جىلى تالاپكەرلەر نەگىزگى ۇ ب ت-نى ەكى رەت تاپسىرىپ، ەڭ ۇزدىك ناتيجەمەن گرانت كونكۋرسىنا قاتىسا الادى.

ۇ ب ت-عا قاتىسۋ ءۇشىن ۇلتتىق تەستىلەۋ ورتالىعىنىڭ app.testcenter.kz سايتى نەمەسە UTO قوسىمشاسى ارقىلى تىركەلۋگە بولادى.

تالاپكەرلەر تەستىلەۋ كۇنىن، ۋاقىتىن جانە پۋنكتىن وزدەرى تاڭدايدى.

بۇل رەتتە ولار ەكى مۇمكىندىك ءۇشىن بەيىندىك پاندەردىڭ ءبىر عانا كومبيناتسياسىن بەلگىلەيدى.

تالاپكەرلەردىڭ نەگىزگى ۇ ب ت-عا دايىندىعىن جاقسارتۋ ماقساتىندا وسىعان دەيىن ءار ءپان بويىنشا جەكە تاقىرىپتىق تالداۋ ەنگىزىلدى.

ياعني، ءار ۇ ب ت-دان كەيىن (قاڭتار، ناۋرىز) تۇلەكتەرگە جەكە تاقىرىپتار بويىنشا بىلىمدەرىن ارتتىرۋ ۇسىنىلادى. سونىمەن قاتار، ءبىرىنشى مۇمكىندىكتى تاپسىرعاننان كەيىن ولار ەكىنشى مۇمكىندىككە دەيىن دايىندىقتارىن جاقسارتا الادى.

ودان بولەك، ونلاين بايقاۋ سىناقتارى ىسكە قوسىلعان. ءبىلىم ورتالىقتارىمەن بىرلەسىپ ۇيىمداستىرىلعان تەگىن ونلاين ساباقتار جالعاسۋدا.

ال وقۋ جىلىنىڭ باسىندا ۇ ت و سايتىندا تەست تاپسىرمالارى قۇراستىرىلعان وقۋلىقتار ءتىزىمى مەن تەست جوسپارى؛ «قازاقستان تاريحى» جانە «دۇنيەجۇزى تاريحى» بويىنشا 100 تاريحي داتا ءتىزىمى؛ «ينفورماتيكا» پانىنەن تەرميندەر ءتىزىمى؛ «قازاق ادەبيەتى» جانە «ورىس ادەبيەتى» بويىنشا ادەبي شىعارمالار ءتىزىمى جاريالاندى.

تەستىلەۋ فورماتىندا وزگەرىس جوق. 2024 -جىلعى تالاپكەرلەر ءۇش مىندەتتى جانە تاڭداۋ بويىنشا ەكى پاننەن تەست تاپسىرادى.

«وقۋ ساۋاتى» مەن «ماتەماتيكالىق ساۋات» مىندەتتى پاندەرىنەن تاپسىرمالار سانى 5 سۇراققا قىسقاردى.

بۇل بەيىندىك پاندەر بويىنشا سۇراقتار سانىن 40 قا دەيىن ارتتىرۋعا مۇمكىندىك بەردى. سونداي-اق بەيىندىك پاندەردە بەرىلگەن تىزىمنەن سايكەستىكتى انىقتاۋعا ارنالعان 5 تاپسىرما قوسىلدى.

وسىلايشا، ۇ ب ت تاپسىرمالار سانى وزگەرىسسىز قالادى، جالپى 120 سۇراق.

ونىڭ ىشىندە «قازاقستان تاريحىنان» 20 تاپسىرما، «وقۋ ساۋاتىنان» 10 تاپسىرما، «ماتەماتيكالىق ساۋاتتان» 10 تاپسىرما جانە ەكى بەيىندىك ءپان بويىنشا 40 تاپسىرما. جوعارى بال – 140، ول دا وزگەرىسسىز قالدى.

تەستىلەۋدىڭ جالپى ۋاقىتى - 4 ساعات (240 مينۋت). سونىمەن قاتار ەرەكشە ءبىلىم بەرۋ قاجەتتىلىكتەرى بار بالالارعا قوسىمشا 40 مينۋت ۋاقىتى ساقتالادى.

اكادەميالىق ادالدىقتى قامتاماسىز ەتۋ ماقساتىندا تەست نۇسقالارى تاڭبالانعانىن اتاپ وتكەن ءجون.

ياعني، ۇ ب ت-عا قاتىسۋشىلاردىڭ ءارقايسىسىنىڭ جەكە تەست نۇسقاسى بولادى. سونىمەن قاتار، كالكۋلياتور، حيميالىق ەلەمەنتتەردىڭ پەريودتىق جۇيەسى مەن تۇزداردىڭ ەرىگىشتىك كەستەسى كومپيۋتەر ەكرانىندا قولجەتىمدى ەتىلەدى.

تالاپكەرلەردىڭ پىكىرى مەن قالاۋىن ەسكەرە وتىرىپ، ولارعا كەستەلەردىڭ قاعاز نۇسقاسى بەرىلەدى.

تەست تاپسىرۋشىلار تەستىلەۋ اياقتالعاننان كەيىن 30 مينۋت ىشىندە اپەلياتسياعا ءوتىنىش بەرە الادى. سەرتيفيكات اپپەلياتسيالىق كوميسسيانىڭ شەشىمىنەن كەيىن تالاپكەردىڭ جەكە كابينەتىندە قولجەتىمدى بولادى.

شەكتى بال وزگەرگەن جوق: «قۇقىق» جانە «پەداگوگيكالىق عىلىمدار» ءبىلىم سالالارى ءۇشىن كەمىندە 75 بال، «دەنساۋلىق ساقتاۋ جانە الەۋمەتتىك قامتاماسىز ەتۋ (مەديتسينا)» كەمىندە 70 بال، «اۋىل شارۋاشىلىعى جانە بيورەسۋرستار»، «ۆەتەريناريا» كەمىندە 60 بال (ۇلتتىق ج و و ءۇشىن)؛ ۇلتتىق جوعارى وقۋ ورىندارىنا ءتۇسۋ ءۇشىن كەمىندە 65 بال، باسقا جوعارى وقۋ ورىندارىنا كەمىندە 50 بال جيناۋ كەرەك.

تەستىلەۋگە كىرگىزۋ كەزىندە قول جانە رامالىق مەتال ىزدەگىشتەر پايدالانىلادى.

بۇل تالاپكەرلەردىڭ قاۋىپسىزدىگىن قامتاماسىز ەتىپ، ەرەجەلەردى بۇزۋ مەن تىيىم سالىنعان زاتتاردى (ۇيالى تەلەفون، شپارگالكا جانە ت. ب. ) الىپ ءوتۋدىڭ الدىن الۋ ءۇشىن قاجەت.

تەستىلەۋ بارىسىندا اۋديتوريانىڭ جانە بەينەباقىلاۋدىڭ اۋدانىنا بايلانىستى رۇقسات ەتىلگەن ماگنيتتىك تولقىندار شەگىندە ۇتقىر جانە راديوەلەكتروندىق بايلانىس سيگنالدارىن باساتىن قۇرىلعىلار قولدانىلادى.

اۆتور

جانات قاپالبايەۆا

سوڭعى جاڭالىقتار