نەيروحيرۋرگ قىزدارعا 40 جاستان كەيىن تۇرمىس قۇرعان دۇرىس - مىڭجىلقى بەردىقوجايەۆ
استانا. KAZINFORM - نەيروحيرۋرگقا جار بولۋ - تەك ماحاببات ەمەس، ۇلكەن ءتوزىم مەن جاۋاپكەرشىلىكتى تالاپ ەتەتىن تاڭداۋ. بەلگىلى نەيروحيرۋرگ مىڭجىلقى بەردىقوجايەۆتىڭ جۇبايى لاۋرا ناريمان وسى ءومىردىڭ قىر-سىرىن ءبولىستى.
- ەكەۋمىز دە قىزىلوردالىقپىز. ءبىراق ءبىز رەسەيدە تانىستىق. مىڭجىلقى مەنى ءوزى تاۋىپ الدى دەپ ايتۋعا بولادى. مەن قازاقستانعا دەمالىسقا كەتىپ قالسام، 6 رەت قوڭىراۋ شالىپتى. سوسىن «بۇل ميگراتسيالىق ءبولىم بە؟» دەپ قايتا حابارلاستىم. سويتسەم، «قىزىلوردالىقپىن، سەن دە قىزىلوردالىق ەكەنسىڭ، كەزدەسەيىك، تانىسايىق» دەدى. سانكت-پەتەربۋرگ قالاسىندا وقيتىن قىزىلوردالىق جالعىز ستۋدەنت قىز مەن ەدىم. مەن دە «جارايدى» دەپ كەلىسىپ، كەزدەسىپ، تانىستىم. 1,5 جىل دوس بولدىق. ءبىراق ءۇشىنشى كەزدەسۋدە ماعان «كۇيەۋگە شىقشى» دەپ ايتتى. مەن «جوق، الدىمەن ديپلومىمىزدى الىپ، ەلگە ورالايىق، سودان كەيىن بارىپ ۇيلەنەيىك» دەدىم، - دەيدى ول Jibek Joly ارناسىنىڭ «بۇگىن LIVE» باعدارلاماسىنا بەرگەن سۇحباتىندا.
ءوز كەزەگىندە مىڭجىلقى بەردىقوجايەۆ تا بۇل ويدى قۋاتتايدى.
- ادام وزىنە تانىس دۇنيەنى ىزدەيدى عوي. قىزىلوردادا ورتاق تانىستارىمىز كوپ ەكەن. قىزىلوردانىڭ اڭگىمەسى جانعا جايلى. قىزىلوردانىڭ قىزى، شىققان جەرى - ءبارى جاقسى. مەن ول كەزدە مەديتسينانى 9 جىل وقىپ جاتتىم. لاۋرا ماگيستراتۋرانىڭ 1-كۋرس ستۋدەنتى ەدى. تاماشا قىزدى كەزدەستىرگەننەن كەيىن «ۇيلەنەيىك» دەپ ايتتىم. ءبىراق قازاق بولعاندىقتان توي، قۇدالىق بولۋى كەرەك. لاۋرا «جوق، بولمايدى، ءبارىن رەتىمەن ىستەيمىز» دەگەن سوڭ، 1,5 جىلدان كەيىن ەلگە قايتىپ كەلدىك، - دەيدى مىڭجىلقى بەردىقوجايەۆ.
بۇگىندە بۇل وتباسىنىڭ ومىرىندە مەديتسينا سالاسىنىڭ وزىندىك ورنى بار. لاۋرا ناريمان بۇل تۇرعىدا جاۋاپكەرشىلىكتىڭ جوعارى ەكەنىن ايتادى.
- ول سانكت-پەتەربۋرگ قالاسىندا وقىپ جۇرگەندە-اق كەزەكشىلىكتەرگە شىعاتىن، ۇيدە بولمايتىن. سوندىقتان و باستان كىمگە كۇيەۋگە شىعىپ جاتقانىمدى جاقسى ءبىلدىم. ءاربىر ايەلگە حيرۋرگكە تۇرمىسقا شىقساڭ، كوپ نارسەنى ءبىلۋىڭ كەرەك دەر ەدىم. كەيدە ءتۇن ىشىندە الىپ كەتەدى. جىلدىڭ تەڭ جارتىسى ەلدە بولمايدى: شەتەلدە، كونفەرەنتسيالاردا، وپەراتسيالاردا جۇرەدى. مۇنداي كەزدە ايەل ادامعا كوپ اۋىرتپاشىلىق تۇسەدى. ويتكەنى ءۇيدىڭ ماسەلەلەرى، بالا-شاعا بار. سوندا دا تەلەفون ارقىلى بەينەقوڭىراۋ شالىپ، سويلەسىپ تۇرامىز. ماڭىزدى دۇنيەلەردى كۇيەۋىم الىستا بولعاندا قوڭىراۋ ارقىلى اقىلداسامىز. ءبىراق «قينالىپ، قاشان كۇيەۋىم كەلىپ كومەكتەسەدى ەكەن» دەگەن وي جوق. تۇرىپ، ءبارىن ءوزىم ىستەي بەرەمىن، - دەيدى نەيروحيرۋرگتىڭ جارى.
ال مىڭجىلقى بەردىقوجايەۆ وتباسى تۇسىنىستىگىنىڭ ماڭىزىن اتاپ ءوتتى.
- ارينە، مەنىڭ نەيروحيرۋرگ بولعانىم ءبىر جاعىنان قورقىتاتىن فاكتور بولۋى مۇمكىن. ويتكەنى پسيحولوگتەر «دارىگەرلەردەن قورىق» دەپ ايتىپ جاتادى عوي. لاۋرانىڭ اپكەسى - دارىگەر-نەفرولوگ. ول دارىگەرلەردىڭ قانداي بولاتىنىن كىشكەنتايىنان كورگەن. سوندىقتان مەنىڭ نەيروحيرۋرگ بولعانىم ونى قورقىتقان جوق. ۇيلەنگەننەن كەيىن دە مەنىڭ جۇمىستا، كەزەكشىلىكتە بولۋىم مۇمكىن ەكەنىن تۇسىنىستىكپەن قابىلدادى، - دەيدى ستۋديا قوناعى.
سونىمەن قاتار، ول جاستارعا، اسىرەسە قىز بالالارعا كاسىبي باعىتتا كەڭەس بەردى.
- قازىر قىز بالالار نەيروحيرۋرگيانى تاڭداپ جاتىر. ءوزىم دە نەيروحيرۋرگ بولىپ، وپەراتسيا جاساپ جۇرگەن بىرنەشە قىزدى تانيمىن. ارينە، ولار الدىمەن كاسىبىن جولعا قويىپ، اياققا نىق تۇرۋى كەرەك. ودان كەيىن وپەراتسيانى كۇندەلىكتى داعدىعا اينالدىرۋ قاجەت. ەگەر ەرتە كۇيەۋگە شىعىپ، بالالى بولىپ، دەكرەتتىك دەمالىسقا كەتسە، قيىن بولادى. سول ءۇشىن، مۇمكىن بولسا، مانساپتى قالىپتاستىرىپ، 40 جاسقا جاقىنداعان كەزدە تۇرمىسقا شىققانى دۇرىس دەگەن اعالىق كەڭەسىم، - دەيدى دارىگەر.
مىڭجىلقى بەردىقوجايەۆتىڭ ايتۋىنشا، جۇمىسىنىڭ باسىم بولىگى شەتەلدە وتەدى.
- مەن ۋاقىتىمدى جانۇياما، بالا-شاعاما بولگىم كەلەدى. بالالار كەيدە دەمالىستى بىزبەن بىرگە وتكىزگىسى كەلەدى. ءبىراق مەنىڭ جۇمىسىم استانامەن بايلانىستى ەمەس. جۇمىسىمنىڭ باسىم بولىگى شەتەلدە وتەدى. ونىڭ ءبارى وسى جانۇيانى اياققا تۇرعىزۋعا، اسىراۋعا باعىتتالعان، - دەيدى ول.
