نيۋفاۋندلەند ماڭىنان سۋعا باتقان كونە كەمە تابىلدى

استانا. KAZINFORM - نيۋفاۋندلەند جاعالاۋى ماڭىنان سۋعا باتقان كونە كەمە تابىلدى، دەپ حابارلايدى euronews.

نيۋفاۋندلەند جاعالاۋىنان بەلگىسىز كەمەنىڭ اۋدارىلعان كورپۋسىن كەيپ-رەي كەنتىنىڭ 21 جاستاعى تۇرعىنى گوردون بلەكمور تاپقان. ول تەڭىز قۇستارىن اۋلاپ جۇرگەنىندە سۋدان كولەڭكە كورىپ قالعان. ءبىر كۇن بۇرىن بۇل كولەڭكەنى كورمەگەن ەدى.

سودان بەرى كەمە تابىلعان جەرگە قيسىق تاقتايلارى مەن ولاردى جالعاپ تۇرعان اعاش شەگەلەردى زەرتتەگىسى كەلەتىن ادامدار كوپتەپ كەلىپ ءجۇر.

جاعاجايلار جىلدار ىشىندە ايتارلىقتاي ەروزياعا ۇشىرادى. بۇل ايماقتا 2022-جىلدىڭ 24- قىركۇيەگىندە «فيونا» پوست-تروپيكالىق داۋىلى ءوتىپ، 100 گە جۋىق ءۇيدى، جاعالىق سىزىقتى قيراتىپ، كەيپ-رەي جاعاجايى بويىندا قۇمدى كوتەرىپ جىبەردى.

وتكەن اپتادا ول جەردە تولقىندار ۇلكەن بولعانى سونشالىق، ولار اپاتقا ۇشىراعان كەمەنىڭ كورىنىپ قالۋىنا سەبەپ بولۋى ابدەن مۇمكىن.

مامانداردىڭ ايتۋىنشا، كەمە 1800-جىلدارى سالىنعان. سول داۋىردەگى كەمەلەردە شەگە رەتىندە اعاش ديۋبەل قولدانىلعان. كەمەنىڭ سىنىقتارىندا ەنى ەكى سانتيمەتردەن اساتىن مىس قازىقشالار بار. ولار كورپۋستىڭ تاقتايلارىن ءبىر-بىرىنە بەكىتۋ ءۇشىن پايدالانىلدى.

كەمە كورپۋسىنىڭ ءبىر بولىگىنىڭ ۇزىندىعى شامامەن 24 مەتر، بۇل كەمەنىڭ ودان دا ۇزىنداۋ بولعانىن ءبىلدىرىپ تۇر.

كەيپ-رەي تۇرعىندارى بۇل جەرگە ماماندار كەلىپ، كەمە تاريحىن انىقتاي الاتىنىنا ۇمىتتەنەدى.