نيدەرلاندتاعى مۇراجايدا جارىلىستان كەيىن كونە التىن دۋلىعا ۇرلاندى

استانا. KAZINFORM - درەنتسە مۇراجايىنان ۇرلانعان باستى ارتەفاكت رۋمىنيانىڭ ۇلتتىق تاريح مۇراجايىنان نەسيەگە الىنعان كوتسوفەنەشتي التىن دۋلىعاسى بولدى، دەپ حابارلايدى euronews.com.

олтин дубулға
فوتو: x.com/Lucius_Gellius

ۇرىلار اسسەن قالاسىنداعى درەنسە مۇراجايىنا كىرۋ ءۇشىن جارىلىس ۇيىمداستىرىپ، بۇل ولارعا «داكيا - التىن مەن كۇمىس پاتشالىعى» دەپ اتالاتىن ءىرى كورمەدەن بىرنەشە ارتەفاكتىلەردى ۇرلاۋعا مۇمكىندىك بەردى.

پوليتسيانىڭ مالىمەتىنشە، سەنبى كۇنى تاڭەرتەڭ مۇراجايدا كۇشتى جارىلىس بولىپ، ەسىكتەر مەن تەرەزەلەر ۇشىپ، جاقىن ماڭداعى عيماراتتارعا زاقىم كەلگەن.

ءبىزدىڭ داۋىرىمىزگە دەيىن 450 -جىلعا جاتقىزىلاتىن كوسوفەنەشتيدىڭ التىن دۋلىعاسى فراكيالىق-گەتتىك زەرگەرلىك ونەردىڭ شەديەۆرى سانالادى. ول دەمالىس كۇندەرى جابىلعان كورمەنىڭ باستى ەكسپوناتتارىنىڭ ءبىرى بولدى.

كورمەگە سونىمەن قاتار رۋمىنيانىڭ 15 مۇراجايىنان الىنعان 600 دەن استام التىن جانە كۇمىس زاتتار قويىلدى. داكيا يمپەرياسى قازىرگى رۋمىنيا اۋماعىندا بولدى، ەلدىڭ ۇلتتىق مۇراجايى قازىر ءوزىنىڭ نەگىزگى ەكسپوناتتارىنان ايىرىلدى.

- بۇل اسسەندەگى درەنتسە مۇراجايى مەن بۋحارەستتەگى رۋمىنيانىڭ ۇلتتىق تاريح مۇراجايى ءۇشىن اۋىر كۇن. مۇراجاي اشىلعالى 170 جىل ىشىندە مۇنداي ءىرى وقيعا بۇرىن- سوڭدى بولماعان. بۇل رۋمىنياداعى ارىپتەستەرىمىزدى دە قاتتى قىنجىلتادى، - دەدى درەنسە مۇراجايىنىڭ باس ديرەكتورى گارري تۋپان.

تەرگەۋ امالدارىنا كورشى ەلدەردىڭ قۇقىق قورعاۋ ورگاندارى، سونداي-اق ينتەرپول جۇمىلدىرىلدى.

وسىعان دەيىن Greenpeace ۇيىمىنىڭ نيدەرلاندقا قارسى سوتتا جەڭىسكە جەتكەنى تۋرال جازعان ەدىك.

اۆتور

زارينا تۋعانبايەۆا

سوڭعى جاڭالىقتار