نيۋ-يوركتە ءتىل بىلمەسە دە، تاكسي جۇرگىزۋشىسى بولىپ جۇرگەن قازاق

 ءتىل بىلمەۋ ەر ادامنىڭ ەڭبەك ەتۋىنە كەدەرگى بولماعان. ەگدە جاستاعى قازاقستاندىق نيۋ-يوركتە تاكسي جۇرگىزۋشىسى بولىپ ەڭبەك ەتىپ ءجۇر. 

بۇل تۋرالى الەۋمەتتىك جەلىدە ەر ادامنىڭ كەلىنى بەينەجازبا جاريالادى.

ونىڭ ايتۋىنشا، ءتىل بىلمەۋ ەر ادامنىڭ ەڭبەك ەتۋىنە كەدەرگى بولماعان. تۇسىنبەگەن ءسوزدى تەلەفونداعى سوزدىكپەن اۋدارۋدى ۇيرەنىپ الىپتى. بۇگىندە تابىسى دا جاقسى.

«اتاما Ubereats ۇناپ تۇر. ازانمەن مامانىڭ بال شايىن قۇيىپ الىپ، كولىگىمەن جۇمىسقا كەتەدى. جاقىندا العان Kia-سى دا ۇيلەسە قالدى. باسىندا تىلدەن قينالسا، قازىر ءبىراز سويلەمدى ءبىلىپ العان. اۋدارىلماعان سويلەمىن سكرينداپ الىپ، سكرينداعى ءسوزدى بىردەن اۋدارىپ بەرەتىن iPhone-نىڭ قاسيەتىن دە ۇيرەنگەن. ءوز تابىسىنا ءوزى ريزا. كۇنىنە 150-200$ تاۋىپ، قۋانىپ كەلەدى، كەشكىسىن اڭگىمەسىن تىڭداپ ارقا-جارقا بوپ شاي ىشەمىز. ءبىر ەبىن تاپقان جۇمىس ءوزى ءۇشىن. قايراتى مەن «ىستەيمىن» دەگەن قاجىرى بىزگە ۇلگى. الىپ مەملەكەتتىڭ مۇمكىندىگىن قولىنان كەلگەنشە پايدالانعىسى كەلگەن اتامنىڭ بۇل ارەكەتى - تازا ەڭبەك»، - دەيدى ايەل.

ونىڭ ايتۋىنشا، امەريكالىقتار، ءتىپتى، ەكى مينۋتتىق جەردە تۇرسا دا، تاماقتى تاكسيمەن الدىرادى. ال تاكسي جۇرگىزۋشى تەز جەتەتىن ءارى تابىسى جاقسى تاپسىرىستى قابىلداۋعا تىرىسادى. ەكى ايدان بەرى تاكسي جۇرگىزۋشىسى بولىپ جۇرگەن ەر ادام ۆيدەودا ول جاقتا جان قينايتىن جۇمىس جوق ەكەنىن ايتادى. ونىڭ سوزىنشە، ول جاقتا بەنزيننىڭ ليترى بەس ءجۇز تەڭگەدەن ساتىلادى ەكەن.